Kebeshainga Bibusa Bya Yehoba
“[Lesa] ye ufweta boba bamukebesha.”—HEBE. 11:6.
1, 2. (a) Bantu bavula bakeba byepi bibusa bya Lesa? (b) Mambo ka o twafwainwa kwikela na kizaku kya kukeba bibusa bya Yehoba?
MU MAPUNZHA amo umvwe muntu wachamuna, bantu batemwa kwamba amba: “Lesa emubile bibusa!” Bantangi ba bupopweshi bwapusana pusana bakonsha kupesha bantu, banyama ne bintu bibula kupema. Bantu bakonsha kuya ku machechi amo na mambo a kukeba kwibapesha. Bamulwila ntanda balomba kwi Lesa kupesha kyalo kyabo. Abya mulanguluka amba kuno kulomba mapesho kwabo kwayilamo nyi? Nanchi ino milombelo ikumbulwa nyi? Pano nanchi bañanyi batambwila mapesho a Lesa, kabiji mambo ka?
2 Yehoba waambijile jimo kuba amba mu moba akapelako, ukekala na bantu batoka kabiji ba mutende bakafuma mu mikoka yonse ya bantu bakasapwilanga mambo awama a Bufumu kufika ne mwapela ino ntanda nangwa kya kuba bakebapata ne kwibamanyika. (Isa. 2:2-4; Mat. 24:14; Lum. 7:9, 14) Atweba tuji na mutembo wa kwikala lubaji lwa bano bantu, twafwainwa kwikala na bibusa bya Lesa, mambo kwakubula bino bibusa kechi twafwainwa kwingila bulongo ne. (Sala. 127:1) Pano twakonsha kutambwila byepi bibusa bya Lesa?
Bibusa Bikala pa Bantu Balukokelo
3. Umvwe bena Isalela baji bakokejile, ki ka kyakonsheshe kufumamo?
3 Tangai Byambo bya Mana 10:6, 7. Byo kwashajiletu pacheche kuba’mba mukoka wa bena Isalela atwele mu Ntanda ya Mulaye, Yehoba wamwesheshe kuba amba bakekala bwikalo bwawama ne kuzhikijilwa umvwe bakokela jiwi janji. (Mpitu. 28:1, 2) Bibusa bya Yehoba kechi byakonsheshetu kwikala pa bantu ba Lesa kwapwa ne, bino byakonsheshe ne ‘kwibobilwa.’ Kwakubula nangwa kuzhinaukatu ne, bantu balukokelo bakonsheshe kubilwa bibusa.
4. Lukokelo lwa kine lwavwangamo ka?
4 Bena Isalela bafwainwe kwikala na ñanyi byubilo pa kuba amba bekale na lukokelo? Muzhilo wa Lesa waambile amba bantu banji inge kebabule kumwingijila “na lusekelo ne na kusangalala kwa michima” bakamufichisha ku muchima. (Tangai Mpitulukilo ya mu mizhilo 28:45-47.) Yehoba kechi ukeba lukokelo lwa bukifulumuya, nabiji lolwa lwakonsha kubapo banyama nangwa bandemona ne. (Mako 1:27; Yako. 3:3) Kukokela Lesa kufuma panshi ya muchima kumwesha butemwe. Buno butemwe bumwekela mu lusekelo lufuma mu kwitabila kuba amba mikambizho ya Yehoba kechi yakatazha kulondela ne, kabiji ne kuba amba “ye ufweta boba bamukebesha.”—Hebe. 11:6; 1 Yoa. 5:3.
5. Kuketekela mulaye wa Yehoba kwakonsheshe kukwasha byepi bantu kukokela muzhilo uji mu Mpitulukilo ya mu mizhilo 15:7, 8?
5 Akilangulukai luno lukokelo lwa luketekelo byo lwafwainwe kumwekela mu kulama muzhilo waambiwapo mu Mpitulukilo ya mu mizhilo 15:7, 8. (Tangai.) Kubepekezha kulondela uno muzhilo kwakonsheshe kukabululako bayanji pacheche, pano nanchi kwakonsheshe kukwasha ne bantu ba Lesa kwikala na bulunda bwawama mwi abo bene na bene nyi? Ne kyakilamo kunema, nanchi kino kyakonsheshe kumwesha lwitabilo mu bulume bwa Yehoba bwa kukwasha bakalume banji ne kusanchila jishuko ja kulondela bumpanyi bwanji nyi? Ine, kwalepeshatu! Lesa wamwene byajinga mu michima ya bantu bajinga na bumpanyi bwa kine kabiji wibalayile kwibapesha mu mingilo yabo ne mu byonse byo baubilenga. (Mpitu. 15:10) Kwikala na lwitabilo mu uno mulaye kwakonsheshe kwibalengela kwingila ne kwikala na bibusa byavula.—Mana 28:20.
6. Byambo bya mu Bahebelu 11:6 bitulaya ka?
6 Kununga pa kwitabila mwi Yehoba kuba amba ye Ufweta bantu banji, byambo bya mu Bahebelu 11:6 byamweshapo kyubilo kikwabo kikebewa pa kuba amba twikale na bibusa bya Lesa. Yukai kuba amba Yehoba ufweta boba “bamukebesha.” Kyambo kine kyo baingijisha pano kimwesha kukebesha kuba kintu ne kuteshako muchima. Kino byo kitumweshapo biji bino bibusa! Walaya bino bibusa ke Lesa wakine “ubula kubepa.” (Titu. 1:2) Wamwesha pa myaka yavula kuba amba byo alaya bikala bya kine. Byambo byanji kechi bikala byatu ne, bikala bya kine kimye kyonse. (Isa. 55:11) Onkao mambo twakonsha kwikala na luketekelo lwa kuba amba umvwe twaikala na lwitabilo lwa kine, ne atweba Witufweta.
7. Twakonsha kuketekela byepi kutambwila bibusa kupichila mu ‘lukunwa’ wa kwa Abalahama?
7 Yesu Kilishitu wamwesheshe kuba amba wajinga lubaji lutanshi lwa ‘lukunwa’ wa kwa Abalahama. Bena Kilishitu bashingwa lo lubaji lwa bubiji lwa ‘lukunwa’ waambijilwe jimo. Bebakambizhe ‘kulondolola byanji byawamisha, yenka aye [wibechile] byo baji mu mfishi, bekale mu kyeya kyanji kya kukumya.’ (Nga. 3:7-9, 14, 16, 26-29; 1 Pe. 2:9) Kechi twafwainwa kuketekela kwikala na bulunda bwawama ne Yehoba ne, umvwe twalengulula boba Yesu bo atongola kulama bintu byanji. Kwakubula bukwasho bwa ‘kalume wakishinka kabiji wa maana,’ kechi twakonsha kumvwisha mwatala bintu byo tutanga mu Mambo a Lesa nangwa kuyuka bya kwibingijisha ne. (Mat. 24:45-47) Kupichila mu kwingijisha bintu byo tufunda mu Binembelo, twakonsha kuketekela kutambwila bibusa bya Lesa.
Kebeshainga Kuba Kyaswa Muchima wa Lesa
8, 9. Mushakulu Yakoba wibikileko byepi kuba bintu kwesakana na lulombelo lwanji?
8 Mulanguluko wa kwibikishako na ngovu kutambwila bibusa bya Lesa wakonsha kwituvululamo mushakulu Yakoba. Kechi wayukile byafwainwe kufika mulaye wa kwa Lesa kwi Abalahama ne, bino waketekejile kuba amba Yehoba ukavuzha ba mu kisemi kya nkambo yanji, ba mu bisaka byanji bakekala ke mukoka mukatampe. Onkao mambo, mu 1781 B.C.E.,Yakoba wayile ku Halana na kukeba mwanamukazhi wa kusongola. Kechi wakebelengatu kwikala na mulunda ne, bino wakebele mwanamukazhi waakamwanga Lesa kabiji mupopweshi wa Yehoba wafwainwe kwikala inanja baana wawama.
9 Twayukishatu bulongo kuba amba Yakoba wataine mulongo wanji aye Lechela. Watemenwe Lechela kya kuba waswile ne kwingijila bashanji Lechela, ba Labanyi, myaka itanu na ibiji pa kuba amba ekale ke mukazhanji. Ajino kechi ke jishimikilatu ja bantu befwalamine ne. Yakoba wayukile mulaye Lesa Wa bulume bonse ye alayile ba nkambo yanji ba Abalahama kabiji wamubwezhezhepo jibiji kwi bashanji, ba Izaka. (Nte. 18:18; 22:17, 18; 26:3-5, 24, 25) Kabiji Izaka waambijile mwananji Yakoba amba: “Lesa wa bulume bonse akupeshe, akulengele kusemununa ne kukuvuzha namba wikale ke jibumba ja mikoka ya bantu. Kabiji akupe ne mapesho a kwa Abalahama obe mwine ne ba mu kisemi kyobe pamo; namba obewa ukatambule ntanda yo waikalamo bwenyi, ke yobe, yonkaya ntanda yo apaine Lesa kwi Abalahama.” (Nte. 28:3, 4) Kwibikishako kwa kwa Yakoba kutana mwanamukazhi wafwainwa ne kwikala na kisemi kwamwesheshe luketekelo lwanji mu byaambile Yehoba.
10. Mambo ka Yehoba kyo apeshejile Yakoba?
10 Yakoba kechi wakebelenga bunonshi mwakulamina kisemi kyanji ne. Watele muchima ku milaye yo bamulayile pa mambo a kisemi kyanji. Watele muchima ku kyaswa muchima wa Yehoba. Yakoba wakebeshenga kwingila na ngovu yanji yonse pa kuba amba ekale na bibusa bya Lesa kechi na mambo a mikiika ne. Watwajijile na kuba bino kufikatu ne ku bukote bwanji, kabiji Yehoba wamupesheshe.—Tangai Ntendekelo 32:24-29.
11. Twafwainwa kwibikishako kuba ka byo twayuka nkebelo ya Lesa?
11 Byonka byajinga Yakoba, ne atweba kechi twayuka bishinka byonse bya pa mambo a nkebelo ya Yehoba ne. Pano bino kupichila mu kufunda Mambo a Lesa, twayuka bikobiwa mu “juba ja Yehoba.” (2 Pe. 3:10, 17) Kyakumwenako, kechi twayuka kimye kine kikeya jino juba ne, bino twayuka amba jiji pepi. Tuketekela Mambo a Lesa byo aamba amba, kupichila mu kusapwila bulongo mambo awama mu kakimye kacheche kashalako, tukepulusha atweba bene ne boba betumvwa.—1 Timo. 4:16.
12. Twakonsha kuketekela ka?
12 Twayuka kuba amba mpelo yakonsha kwiya kimye kiji kyonse, Yehoba kechi wakonsha kupembela kuba amba bantu bonse pa muntu pa muntu panopantanda batambwile mambo awama ne. (Mat. 10:23) Kabiji tutambwila mikambizho yawama pa bya kwingila bulongo mwingilo wa kusapwila. Twibikako papelela bulume bwetu kwingilako na bukishinka uno mwingilo, kwingijisha bintu byetu byonse. Nanchi kimye kyonse tusapwilangatu mu mpunzha muji bantu batambwilanga bukine nyi? Twakonsha kuyukila byepi jimo? (Tangai Musapwishi 11:5, 6.) Mwingilo wetu ke wa kusapwila, ne kuketekela kuba amba Yehoba uketubila bibusa. (1 Ko. 3:6, 7) Twakonsha kuketekela amba umona byo twibikishako, kabiji kupichila mu mupashi wanji wazhila, uketutangijila mu jishinda jo twafwainwa kuyamo.—Sala. 32:8.
Kulomba Mupashi Wazhila
13, 14. Bulume bwa mupashi wazhila wa Lesa bwa kukwasha bakalume banji bwamweka byepi?
13 Ibyepi umvwe tubena kwiumvwa kuba amba kechi twafikilamo kwingila mwingilo ye betupa nangwa mwingilo wa kusapwila ne? Twafwainwa kulomba Yehoba kwitupa mupashi wanji wazhila kuba’mba etukwashe kwingila na bulume bwetu bonse mwingilo wanji. (Tangai Luka 11:13.) Mupashi wa Lesa wakonsha kulengela bantu kufikilamo kwingila mingilo nangwa kwikala na mashuko a kwingilako mingilo imo kechi na mambo a bwikalo bwabo bwa kunyuma nangwa byo bapichilemo ne. Kyakumwenako, panyumatu ya Kufuma mu Ijipita, mupashi wa Lesa wakwashishe bakafunga ne bazha kushinda balwanyi babo nangwa kya kuba kechi bapijilwe kulwa nkondo ne. (Lupu. 17:8-13) Panyumatu ya kakimye kacheche, uno yenka mupashi wafunjishe Bezalela ne Oholyaba bya kwingila, kwingijisha kifwanyikizho kya Lesa kya kufikilamo tente wa lusambakeno.—Lupu. 31:2-6; 35:30-35.
14 Uno yenka mupashi ye wafunjishe ne bakalume ba kwa Lesa ba mu ano moba kuta muchima ku bikebewa bya jibumba kimye kyo bakebelenga kutendeka kwipulintila abo bene mabuku. Mu nkalata yo anembele, Mulongo R. J. Martin watalanga pa minkinyi, walumbulwile byaingijiwe mu 1927. “Pa kimye kyafwainwa, Nkambo washinkwile kinzhilo, kabiji kwaishile munkinyi mukatampe, uno munkinyi waishile ku bantu babujile kuyukapo nangwa bya kumufika ne kumwingijisha ne. Pano bino Nkambo wayuka bya kukwasha boba bepana kwi aye. . . . Panyuma ya milungu icheche, twayukile bya kwingijisha yewa munkinyi, kabiji ne luno ubena kwingilatu bulongo mwingilo wabujile kuyuka ne bene bamupangile kuba amba wafwainwa kwingila.” Yehoba watwajijila kwitupesha pa byo twibikishako kwingila mwingilo lelo jino.
15. Loma 8:11 wakonsha kutundaika byepi boba babena kupita mu meseko?
15 Mupashi wa Yehoba wingila mu mashinda apusana pusana. Uno mupashi uji na bakalume ba Lesa bonse, kabiji wibakwasha kushinda mikiika yakilamo kutama. Ibyepi umvwe kya kuba twalefulwa na mambo a meseko? Twafwainwa kutundaikwa na byambo bya kwa Paulo biji mu Loma 7:21, 25 ne 8:11. Kya kine, ‘mupashi wa yewa wasangwile Yesu mu bafu’ wakonsha kwitwingijilako, kwitupa bulume bwa kushinda bya lwiso lwa buntunshi. Kino kibaba banembejile bena Kilishitu bashingwa, pano bino jifunde jijimo jingila ne ku bakalume ba Lesa bonse. Atweba bonse twikala na bumi kupichila mu kwitabila mwi Kilishitu, kwibikako kukana milanguluko yatama, kabiji ne kwikela mwayila lutangijilo lwa mupashi.
16. Twafwainwa kuba ka pa kuba amba tutambwile mupashi wazhila wa Lesa?
16 Nanchi twakonsha kuketekela Lesa kwitupa bulume umvwe kechi tubena kwibikako nenyi? Ine. Kununga pa kulomba, twafwainwa kuta muchima pa kufunda Mambo a Lesa anembwa na mupashi. (Mana 2:1-6) Kunungapo, mupashi wa Lesa uji pa kipwilo kya bena Kilishitu. Kutanwa kwetu ku kupwila kimye kyonse kumwesha amba twakebesha ‘kumvwa bintu byamba mupashi ku bipwilo.’ (Lum. 3:6) Kabiji twafwainwa kwingijishanga bintu byo tufunda. Byambo bya Mana 1:23 bitujimunako amba: ‘Alulukai, mumvwe byo mbena kwimufunda; kabiji amiwa nsakwimwitulwila mupashi wami ne kwimuyukisha byambo byami.’ Kya kine, Lesa upana mupashi wanji wazhila “ku bamukokela.”—Byu. 5:32.
17. Bukwasho bwa mapesho a Lesa twafwainwa kwibwesakanya ku ka byo twibikishako kwingila na ngovu?
17 Nangwa kya kuba kwibikishako kukebewa bingi pa kuba amba twikale na bibusa bya Lesa, bino yukai amba kwingilatu na ngovu kechi ko kwakonsha kulengela muntu kwikala na bintu byavula byawama Yehoba byo apana ku bantu banji ne. Mapesho afuma mu kwibikishako kwetu twafwainwa kwiesakanya ku mubiji byo amwenamo mu kajo kawama. Lesa walengele mibiji yetu kuba amba ikeyowenga kajo ne kwiilengela kwingila bulongo. Kabiji upana ne kajo. Kechi twayukisha bulongo bukwasho buji mu kajo byo bwaishilemo ne, kabiji atweba bavula kechi twakonsha kulondolola bulongo mibiji yetu byo ikala na bulume bufuma mu kajo ko tuja ne. Twayukatu amba kengila ne kuba amba twafwainwa kwikaja pa kuba’mba ketukwashe. Umvwe ke tuje kajo kawama bulongo, mufuma bintu byawama bingi. Byonkabyo, Yehoba wabikako bintu bikebewa pa kwikala na bumi bwa myaka, kabiji witukwasha pa kuba amba tufikizhe bino bikebewa. Kya kine, witukwasha bingi kabiji ukebewa kutotwa. Nangwa byonkabyo, twafwainwa kukokela, kuba bintu kwesakana na nkebelo ya Lesa, pa kuba’mba tutambwile bibusa byanji.—Hagai 2:18, 19.
18. Mwakebesha kuba ka, kabiji mambo ka?
18 Onkao mambo, ibikishaiko kwingila na muchima wenu yense. Ketekelainga Yehoba kwimukwasha kimye kyonse. (Mako 11:23, 24) Kimye kyo mubena kuba bino, ikalai na luketekelo lwa kuba amba awa “ukeba naye, wikimona.” (Mat. 7:8) Bashingwa na mupashi bakebapa “munchinya wa bumi” mwiulu. (Yako. 1:12) ‘Mikooko ikwabo’ ya kwa Kilishitu, abo babena kwibikako abo bene kubilwa bibusa kupichila mu lukunwa wa kwa Abalahama, bakasekela byo Bakamumvwa saka aamba amba: “Iyai, anweba bo bapesha kwi Batata, swanai bufumu bo emutujila ne ku ntendekelo ya panopantanda.” (Yoa. 10:16; Mat. 25:34) Kya kine, aba “bo apesha Yehoba bakaswana ntanda, . . . ne kwikalamo myaka ne myaka.”—Sala. 37:22, 29.
Mwakonsha Kulumbulula Nyi?
• Ki ka kyavwangwa mu lukokelo lwa kine?
• Ki ka kikebewa pa kuba amba tutambwile mapesho a Lesa?
• Twakonsha kutambwila byepi mupashi wazhila wa Lesa, kabiji wakonsha kwitukwasha byepi?
[Bipikichala pa peja 9]
Yakoba wisunshile na malaika pa kuba amba atambwile mapesho a Yehoba.
Nanchi ne anweba mwibikishako nyi?
[Kipikichala pa peja 10]
Mupashi wazhila wa Lesa wafunjishe ba Bezalela ne Oholyaba kuyuka bya kwingila mingilo