Kwashainga Bakyanyike Kuyuka Bulongo Jibumba ja Yehoba
BAANA bakeba bingi kufunda. Akilangulukai pa mepuzho ajinga na baana ba bena Isalela mu Ijipita bufuku bwa Kijiilo kitanshi kya Lupitailo a kuba’mba: ‘Mambo ka kyo baipaijile mwana mukooko?’ ‘Mambo ka Batata kyo babena kusanshila mashi ku mashiki a kibelo?’ ‘Tubena kuya pi?’ Yehoba wamwesheshe amba watele muchima ku ano mepuzho kupichila mu byo akambizhe bansemi ba balume ba mu Isalela. Pa mambo a kusekelela Kijiilo kya Lupitailo kulutwe na lwendo, Yehoba wibambijile amba: ‘Baana benu byo bakemwipuzha’mba: Nanchi kino kijiilo mwikitwala mu ka? Mukebabule’mba: Kyo kitapisho kya lupitailo lwa Yehoba, lo apitaijile mazubo a bena Isalela monka mu Ijipita, byo aipayile bena Ijipita ne kupokolola mazubo etu.’ (Lupu. 12:24-27) Palutwe kacheche, Yehoba wavulwilemo bansemi ba bena Isalela pa mambo a buneme bwa kukumbula mepuzho a baana babo aambilenga pa “malamuna ne byatongolwa” byo ebakambizhe Yehoba.—Mpitu. 6:20-25.
Kya kine, Yehoba wakebele baana kwikala na mikumbu yafwainwa ya mepuzho abo aambilenga pa mpopwelo ya kine, mikumbu yafwainwe kwibatundaika kutemwa Yehoba Lesa wabo kabiji Mupulushi wabo. Ne lelo jino, Yehoba byo byo akeba ku bakyanyike. Jishinda jimo bansemi jo bafwainwa kufunjishishamo baana babo kutemwa Lesa kya kine ne bantu banji pamo ke kupichila mu kwibakwasha kuyuka bulongo biji jibumba ja Yehoba ne kumvwisha byo tumwenamo mu lunengezho lwajo. Onkao mambo, twayai tumone mashinda amo akonsha kukwasha bakyanyike kufunda byavula pa jibumba ja Lesa.
Kipwilo mo Muya
Baana bafwainwa kuyuka kipwilo muya kisemi kyenu. Pa kuba’mba bayuke, anweba bansemi mwafwainwa kuyanga nabo ku kupwila kwa bwina Kilishitu konse. Inge ke mube bino, ko kuba amba mubena kulondela lunengezho lwa Yehoba ku bena Isalela, lo akambizhe amba: ‘Mukebakonkanye bantu, banabalume, ne banabakazhi, ne baana . . . , namba bakomvwenga ne kufunda kumwakamwa Yehoba Lesa wenu, ne kuteshakotu michima yabo mu kulama byambo byonse bya ino mizhilo; kabiji amba ne baana babo bakyangye kwiiyuka bakomvwenga ne kufunda kumwakamwa Yehoba Lesa wenu.’—Mpitu. 31:12, 13.
Baana bakonsha kutendeka kufunda Mambo a Yehoba kufumatu ku bulukeke. Mutumwa Paulo waambile pe Timoti amba: “Wayukile kufuma ne ku bwanyike bobe binembelo byazhila.” (2 Timo. 3:15) Kimye kya kupwila ku Nzubo ya Bufumu, baana ba bacheche nabo batendeka kumvwa bibena kwambiwa ne kuyuka nyimbo ya Bufumu. Ku kupwila ko ko bafunda bya kwingijisha ne kunemeka Baibolo ne mabuku alumbulula Baibolo. Kabiji ku kupwila kwetu ko ko bamona kyubilo kya butemwe bwa kine kiyukanyikisha baana ba bwanga bakine ba Kilishitu. Yesu waambile amba: ‘Mukambizho mupya nemupa anweba, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’ (Yoa. 13:34, 35) Butemwe bwa kine ne luzhikijilo lwa kine lubiwa mu Nzubo ya Bufumu lukafika baana pa michima ne kwibakwasha kutwajijila kutanwa ku kupwila kwa bwina Kilishitu mu bwikalo bwabo bonse.
Umvwe mwaikala na muteeto wawama wa kufikanga bukiji pa Nzubo ya Bufumu kabiji ne kupembelelako panyuma ya kupwisha kupwila, kikalengela baana benu kwisampa bulunda. Mu kifulo kya kwibaleka saka bakayatu na bakwabo banyike, nanchi kechi mwafwainwa kwibatwala ku balongo ne banyenga yenu ba mafumbi apusana pusana nenyi? Umvwe beyuka na bakikulumpe, baana benu bakafunda bintu byavula bingi ne kwikala na maana. Byonkatu Zekaliya wa kukala wajinga ‘mufunjishi wa bya kumwakamwa Lesa’ byo akwashishe Uziya wakyanyike wajinga mfumu wa Yuda, ne lelo jino aba baingijila Yehoba mu bukishinka myaka yavula bakonsha kukwasha bingi bakyanyike. (2 Moba 26:1, 4, 5) Inge muji mu Nzubo ya Bufumu, mwakonsha kulumbulwila baana benu bingila butala bwa mabuku, kipabi kya mabulañano, ne bintutu bikwabo.
Jibumba ja Ntanda Yonse
Baana bafwainwa kuyuka amba kipwilo mo muya ke lubaji lwa jibumba ja ntanda yonse jiji na bipwilo kukila pa 100,000. Balondolwelai mbaji ya mu jino jibumba, byo jingila, ne lubaji lwafwainwa kuba baana mu kwijitundaika. Babulai ene mambo o mutongela kubuñana kwa juba jimo, kwa mwanzo, ne kushonkena kwa nkambi, ne kufwakasha kwa kalama wa mwanzo.—Monai kakitenguluzha kaamba amba, “Mitwe ya Kwisambapo Kimye kya Kupopwela kwa Kisemi,” pa jipa 28.
Byo muji na jishuko, mwafwainwa kutambwila bakalama benda, bamishonale, ba mu kisemi kya Betele, ne ba mwingilo bakwabo ba kimye kyonse na kujiila pamo nabo kajo ku nzubo yenu. Kange mulanguluke kuba’mba bafwakyo kimye kya kwisamba na baana ne. Bano bakalume ba kimye kyonse besekesha na ngovu kwikala byonka byajinga Yesu, awo watemenwe baana ne kwisamba nabo. (Mako 10:13-16) Umvwe baana benu kebomvwe bibena kushimikizha bano bakalume ba Yehoba ne kumona lusekelo lo baji nalo mu mwingilo wazhila, ne abo bakonsha kwibikila bikonkwanyi bya mwingilo wa kimye kyonse.
Ñanyi kintu kikwabo kyo mwakonsha kuba mu kisemi kyenu pa kuba’mba mukwashe baana benu kuyuka bulongo jibumba ja Yehoba? Akimonai ano mashinda amo: Nengezhai kisemi kyonse kuba amba mufundenga buku wa kuba’mba, Jehovah’s Witnesses—Proclaimers of God’s Kingdom. Ambai pa kwipana, kwipelula ne bukishinka bwa bakalume ba Yehoba. Bamweshai Yehoba byo ebengijishe kukumbanya mambo awama mwaya ntanda yonse. Ingijishai mavidyo anengezhiwa na jibumba ja Yehoba kufunjishishamo mafunjisho anema a kala ne a kino kimye. Umvwe mwakonsha, fwakeshai ofweshi wa musampi ne Betele wa mu kyalo kyenu nangwa kampe wa mu byalo bikwabo. Umvwe mwauba bino, mukalengela baana benu kuyuka bulongo lubaji lwa panopantanda lwa jibumba ja Yehoba jibena kutangijilwa na jibumba ja kalume wakishinka byo jakwatankana mu kupana kajo ka ku mupashi ne kutangijila balongo mwaya ntanda, byonkatu byo jaubilenga mu myaka kitota kitanshi C.E.—Mat. 24:45-47; Byu. 15:22-31.
Kwamba Byambo Byakonsha Kukwasha Baana Bonse
Pa kufunjisha baana benu, vulukainga jishinda Yesu jo afunjishengamo batumwa banji. Wibambijile amba: “Amiwa nji na bintu byavula bya kwimubula, bino kechi mwakonsha kwibitambula katataka ne.” (Yoa. 16:12) Yesu kechi wabujile baana banji ba bwanga bintu byavula pa kimye kimo ne. Mu kifulo kya bino, wibafunjishenga pachepache bukine bwanema pa kuba’mba bebumvwishenga bulongo. Po pamotu, ne anweba kechi mwafwainwa kubula baana benu bintu byavula pa kimye kimo ne. Umvwe kemwibabule bintu bichebiche byubiwa kimye kyonse mu jibumba, mukebalengela kutako muchima ne kutemwa kufunda biji kipwilo kya bena Kilishitu. Inge bintu bikeba baana benu ke bipimpulwe, mwakonsha kwamba bintu byo bayukila jimo ne kunungapo bikwabo pa byo bafunda kala.
Kipwilo kya bena Kilishitu kikwashañana bingi ku mupashi, kabiji bakyanyike baswikwa na mingilo ya kipwilo bekala benengezha kukana bintu byatama bya mu ntanda ya kwa Satana. (Loma 12:2) Twaketekela kuba’mba mwikalanga bingi balusekelo mu kukwasha baana benu kuyuka bulongo jibumba ja Yehoba. Kupichila mu bukwasho bwanji, bakwashai kutwajijila kwikala bakishinka ku jino jibumba ne kwi Lesa wa butemwe ye twingijila.
[Kitenguluzha/Kipikichala pa peja 28]
Mitwe ya Kwisambapo Kimye kya Kupopwela kwa Kisemi
Ino yo mitwe imo yaamba pa jibumba ja Yehoba yo mwakonsha kwisambapo kimye kya Kupopwela kwa Kisemi ko mwikala nako.
▪ Pitulukai mwapita kipwilo kyenu koko. Kimye ka po kyalengelwe kabiji kyalengelwe byepi? Ñanyi Mazubo a Bufumu o mwaingijishanga? Kimye kyo mubena kwisamba uno mutwe, nanchi kechi kyakonsha kuwama kwitako wa mu kipwilo kyenu waingila myaka yavula kuba’mba eye ku nzubo yenu na kukumbula mepuzho a baana benu nenyi?
▪ Londololai nkebelo ya kupwila kwapusana pusana ne kushonkena kukatampe, kabiji ne baana byo bakonsha kumwenamo.
▪ Isambai pa masukulu apusana pusana kyo aikelako mu jibumba ja Yehoba. Ambai byakumwenako bibena kumwesha bipangwa byawama byafumamo na mambo a kwingila kwa bano balongo bapita mu ano masukulu.
▪ Kwashai bakyanyike kuyuka buneme buji mu kwikala basapwishi ba kimye kyonse ba mambo awama. Babulai byo bakonsha kwikalamo na lubaji mu sawakya wa ntanda yonse unembwa mu Yearbook of Jehovah’s Witnesses.
▪ Isambai pa mbaji yapusana pusana ya mwingilo wa kimye kyonse yakonsha kwingila bakyanyike mu jibumba ja Yehoba. Mu Kitango 10 kya mu buku wa Bakwatankana Kuba Kyaswa Muchima wa Yehoba muji byambo byawama bingi.
▪ Kwashai bakyanyike kuyuka ene mambo bintu bimo kyo byubiwa mu kipwilo. Balondolwelai ene mambo o bafwainwa kubula kwitolwela kufuma ku jibumba ja Yehoba nangwatu mu tubintu tucheche. Babulai byo bakonsha kuleta mutende mu kipwilo kupichila mu kulondela lutangijilo lwa bakulumpe mu kipwilo.
[Kipikichala]
Baana benu bakamwenamo mu kulenga bulunda na bakalume baji mu mwingilo wa kimye kyonse
[Bipikichala pa peja 26]
Byonka byo kyajinga ku bena Isalela ba kala, ne lelo jino bansemi bebikako kukumbula baana babo mikumbu yafwainwa ya mepuzho o bebepuzha pa mambo a jibumba ja Yehoba