Kuswikwa na Mwingilo mu Jibumba ja Yehoba

Byashimikizha ba Vernon Zubko

NAKOMEJILE pa bujimi ku bwipi na muzhi wa Stenen, wajinga mu kibunji kya Saskatchewan, ku Canada. Bansemi bami, abo ba Fred ne ba Adella, baingilanga bingi na ngovu kunengezhezha amiwa, bakolojami babakazhi ba Aurellia ne bankasami, ba Alvin, Allegra, ne Daryl bikebewa bya ku mubiji ne ku mupashi. Ne lelo jino, tusanchila bingi bansemi betu pa kwitufunjisha bukine.

Batata, abo bajinga bena Kilishitu bashingwa, bajinga basapwishi bachinchika. Baingilanga bingi na ngovu pa kuba amba bamonenga mwakujiila, pano bino bakebanga ne muntu yense kuyuka amba bajinga Bakamonyi. Baambanga bukine kimye kyonse. Kechi nkalubamo kizaku ne kuchinchika kwabo ne. Javula bañambilanga amba: “Twajijila kwikala wabambakana mu jibumba ja Yehoba, mambo kuba bino kukakukwasha kukepeshako makatazho.”

Javula twasapwilanga mu mikwakwa mu Stenen ne mu bimasamasa. Kusapwila kechi kwampelejile ne. Mu muzhi uji yense mwatanwanga bantu bashinta, abo baiyanga ne kwituba mukeyu atweba bakyanyike. Byo najinga na myaka ya kusemwa itanu na isatu, naimene pachimpukila mukwakwa na Kyamba kya Usopa ne Awake! jibumba ja bakyanyike lo jaishile ne kunzhokoloka. Bansompwele kisochi ku mutwe ne kwikisomeka pa kipabi kyajinga pa bwipi ne amiwa. Kya jishuko, mulongo wa kikulumpe wansopelenga wamwene byaubiwenga. Waishile ne kungipuzha amba, “Vern, paji lukatazho nyi?” Ponkapotu aba bansongwalume banyemene. Nangwa kya kuba akya kyamwekele kyanzhingijisheko pacheche, kyamfunjishe kuba amba umvwe tubena kusapwila busapwishi bwa mu mukwakwa, twafwainwa kwendanga kechi kwimanatu nobe kichi ne. Byo nakomenenga, luno lufunjisho lwampele bulume bwa kusapwila ku nzubo ku nzubo.

Amiwa ne Alvin twabatizwe mu May mwaka wa 1951. Najinga na myaka ya kusemwa 13. Ne lelo jino nkivuluka Mulongo Jack Nathan waambile jashi ja lubatizhilo, awo witutundaikile kubula kuleka ñondo kupwa kwakubula kwambapo pe Yehoba ne.a Mu kisemi kyetu, twanemekele bingi mwingilo wa bupainiya. Onkao mambo, mu 1958, panyuma ya kupwisha sukulu, nayile na kwingila bupainiya ku Winnipeg, Manitoba. Nangwa kya kuba Batata baumvwanga bingi bulongo kwingijila nabo pamo mwingilo wa kupala mapulanga, abo pamo ne Bamama bantundaikile kyabaya bingi kutendeka mwingilo wa kimye kyonse kabiji banswishishe kuya na kwingila bupainiya.

Nzubo Ingi ne Mwina Kwami

Mu 1959, ofweshi wa musampi waambijile yense wakonsheshe kuvilukila ku Quebec, kwajinga kukajilwa kukatampe kwa basapwishi. Nayile na kwingila bupainiya ku Montreal. Bwikalo bwami bwapimpwilwe bingi. Lwajinga lupimpu lukatampe bingi kwi amiwa byo nafunjilenga kwamba Kifulenchi ne kufunda bisho byapusana pusana. Kalama wetu wa mwanzo wañambijile amba, “Kechi wambenga amba, abye kechi byo byo twaubanga kwetu ne.” Alwa lujimuno lwawamine bingi.—1 Ko. 9:22, 23.

Kimye kyo navilukijile ku Quebec kechi najinga na wa kwingila nanji mwingilo wa bupainiya ne. Nangwa byonkabyo, nyenga wakyanyike wa jizhina ja Shirley Turcotte, ye nasambakene mu Winnipeg, waikele mukwetu wa kwingila nanji kikupu byo twisongwele mu February 1961. Ne aye wafumine ku kisemi kyatemenwe bingi Yehoba. Patanshitu kechi nayukile amba Shirley ukekala wakuntundaika ne, pano bino wantundaikile pa myaka yavula.

Kuya na Kusapwila pa Jikuji ja Gaspé

Byo papichile myaka ibiji panyuma ya masongola etu, betutumine kuya na kwingila bupainiya bwiikajila mu Rimouski, Quebec. Mwaka walondejilepo, ofweshi wa musampi witutumine kuya na kusapwila pa Jikuji ja Gaspé, ku kitulu kya ku musela wa Canada. Mwingilo wetu wajinga wa kubyala nkunwa ya bukine yavula. (Sapwi. 11:6) Twalongele magazini kukila pa 1,000, mabuku pepi na 400, bya kuja ne bya kuvwala mu motoka wetu, ne kuya na kusapwila pa ñondo umo. Twasapwijile mu mizhi icheche yonse yajinga mu Gaspé. Nzubo ya mabilabila yajimwine bantu kuba amba Bakamonyi babena kwiya ne kwibambila kuba amba kechi bafwainwa kutambula mabuku etu ne. Nangwa byonkabyo, bangikazhi bavula kechi baumvwishishe ne, balangulukilenga kuba amba babena kwibabujila jimo pa mambo a mabuku etu, onkao mambo batambwilenga mabuku.

Mu yoya myaka, mu mapunzha amo a Quebec kechi mwajinga bwana bwabene bwa kusapwila ne, kabiji kechi kyajinga kya kukumya umvwe bemwimika ku bakapokola ne. Kino kyaubiwe mu muzhi umo mo twashilenga mabuku ku nzubo ku nzubo. Kapokola witwambijile kuya nanji ku kiteshenyi kya bakapokola, ne kya kine twayile nanji. Nataine kuba amba shabyambo umo mu yewa muzhi wabikileko mukambizho wa kwitukanya kusapwila. Mukulumpe wa bakapokola byo abujilepo pa joja juba, napele shabyambo nkalata yafumine ku ofweshi wa musampi mu Toronto yamwesheshenga lūsa lwetu lwa kusapwila. Panyuma ya kutanga nkalata, ponkapo shabyambo waambile amba: “Kechi nkeba makatazho ne. Mumpe wa mu parish ye wañambijile kuba amba nemukanye kusapwila.” Byo twakebeshenga kuba amba bantu bayuke amba mwingilo wetu kechi wa mu bufyamfya ne, twapelawizhizhe kubwela pa mpunzha po betutanyijile bakapokola ne kutwajijila kusapwila.

Juba jalondejilepo byo twabwelele ku mukulumpe wa bakapokola, wazhingijile bingi pa kumvwa kuba amba betukainye kusapwila. Wazhingijile bingi byo aambilenga na shabyambo pa lamya! Kapokola witwambijile amba umvwe twaikala na lukatazho twafwainwatu kumwita aye yenka kuba amba etukwashe. Nangwa kya kuba twajinga benyi kabiji kechi twayukile kwamba bulongo Kifulenchi ne, twamwene kuba amba bantu bajinga bingi na lusa kabiji batambwilanga benyi. Pano bino twazhinaukilenga kuba amba: ‘Kana bakayuka bukine nyi?’ Palutwe kacheche twataine mukumbu kimye kyo twabwelele na kushimika Mazubo a Bufumu mu Gaspé. Twataine kuba amba bantu bavula bo twasapwijile pano ke balongo betu. Kya kine, Yehoba ye ukomesha.—1 Ko. 3:6, 7.

Twatambwijile kya Buswanyi

Mwanetu wamukazhi Lisa wasemenwe mu mwaka wa 1970. Buno buswanyi bwafumine kwi Yehoba bwalengejile lusekelo lwetu kubayilako. Naingijilanga pamo na Shirley ne Lisa mingilo ya buntungi bwa Mazubo a Bufumu avula. Lisa byo apwishishe sukulu, waambile amba: “Kyawama, Bansemi bami, byo kiji kuba’mba nemulekeshe mwingilo wa kimye kyonse pa kimye kimo, mbena kukeba kweseka kwingijisha kyokya kimye kupichila mu kwikala painiya.” Pano pabapite ne myaka makumi abiji, kufuma patendekejile Lisa kwingila mwingilo wa bupainiya, pamo ne bamwata wanji, abo ba Sylvain. Bonse babiji bajinga na jishuko ja kwingilako mingilo ya buntungi mu byalo bingi. Kikonkwanyi kyetu kya kisemi ke kumona amba twapezhako bwikalo bwetu ne kwipana kwingilako mwingilo wa Yehoba. Kechi nkalubamo byambo byaambile Lisa byo atendekele bupainiya ne. Mambo ye wantundaikile kutendeka kwingilako jibiji mwingilo wa kimye kyonse mu 2001, kabiji natwajijila mu mwingilo wa bupainiya kufumatu pa kyokya kimye. Mwingilo wa bupainiya watwajijila kumfunjisha kuketekela mwi Yehoba mu bintu byonse byo nguba kabiji ne kuyuka bya kupezhako bwikalo bwami ne kwikala na lusekelo lukatampe.

Mwingilo wa Buntungi Ukebewa Kumwesha Butemwe, Kwilama ne Bukishinka

Yehoba wamfunjisha amba umvwe twipana ne kuswa kwingila mwingilo yense ye etupa, tukamona mapesho avula. Kwingilako mwingilo wa mu Kavoto ka Bantungi ba Mpunzha ne kwingilako mingilo ikwabo ya buntungi pamo na balongo ne banyenga yami mu Quebec ke jishuko jikatampe bingi kwi amiwa.

Nangwa kya kuba ba mwingilo bepana bamo kechi bakonsha kwamba majashi bulongo pa mutuntamo ne, bino bengila bingi bulongo mingilo ya buntungi bwa Mazubo a Bufumu. Bano balongo betu batesha bingi muchima pa mwingilo kabiji ne bya bupe byabo biyukanyikwa. Bino bya bupe byabo bimwekela mu bishimikwa byawama byo twingijisha pa kupopwela Yehoba.

Bakingipuzhapo kala amba: “Kyubilo ka kyanema kikebewa ku ba mwingilo bepana kwingilako mwingilo wa kushimika Mazubo a Bufumu?” Kwesakana na byo napitamo, muntu wafwainwa patanshi kutemwa Yehoba ne Mwananji kabiji ne balongo. (1 Ko. 16:14) Kya bubiji, kwilama ne bukishinka bikebewa bingi. Inge bintu byabula kwingila byonka byo tukeba, muntu wakishinka ukatwajijila kulondela lutangijilo lwa jibumba. Kabiji bukishinka bukamukwasha kwipana kwingilako mingilo ikwabo kulutwe.

Namusanchila Bingi Yehoba

Nangwa kya kuba batata bafwile mu 1985, bukwasho bwabo bwa kwikala wapayankana mu jibumba ja Yehoba kechi nkebulubamo ne. Byonka biji bakwabo batambwila mingilo yabo mu lubaji lwa jibumba ja Yehoba ja mwiulu, kwakubula nangwa kuzhinaukatu ne, ne abo bapayankana bingi. (Lum. 14:13) Bamama pano bafikizha myaka ya kusemwa 97. Na mambo a kikola kya kinkanku, kechi bakonsha kwamba byonka byo baambanga ne, pano bino bayuka Baibolo. Betumwesha byaamba binembelo ne kwitutundaika kutwajijila kwingijila Yehoba mu bukishinka. Tusanta bingi pa kwikala na bano bansemi ba butemwe!

Kabiji nsanchila bingi Yehoba pa kumpa Shirley, mukazhami wakishinka wingila pamo ne amiwa. Uvuluka bingi byambo byamwambijile bainanji bya kuba’mba: “Vern ukatwajijila kuswikwa na bukine, kabiji obewa kechi ukamwenangamotu bunke bobe ne, bino uyuke kuba amba ne bakwenu nabo bakafundanga kwi aye.” Byo twisongwele myaka 49 yapitapo, twaumvwañene kuba’mba tukakotela pamo, kwingijila Yehoba pamo, kabiji ne kuba amba inge kya kuba tukapuluke mpelo ya buno bwikalo kabiji tukekale ne na bulume bujipo na bakyanyike, tukatwajijila kumwingijila pamo. Ee kine, ‘twingijisha mu mwingilo wa Nkambo.’ (1 Ko. 15:58) Yehoba witulama kabiji umona kuba’mba kechi tubena kukajilwa nangwa kimo kyawama ne.

[Tubyambo twa mushi]

[Kipikichala pa peja 31]

“Kikonkwanyi kyetu kya kisemi ke kya kumona amba twapeezhako bwikalo bwetu ne kwipana kwingilako mwingilo wa Yehoba.”