Byo Tufunjilako Kwi Yesu
Bilengwa bya Mupashi byo Bitukunza
Yesu wajinga kilengwa kya mupashi pamo ne shanji “panopantanda kasa pakyangye kulengwa.” (Yoano 17:5) Onkao mambo, ye wafikilamo kukumbula ano mepuzho alondelapo.
Nanchi bamalaika betuta muchima nyi?
▪ Byambo byaambile Yesu bitulengele kuyuka’mba bamalaika bata bingi bantu muchima. Waambile’mba: “Kuji lusekelo ku meso a bamalaika ba Lesa pa ndengamambo umo walapila.”—Luka 15:10.
Yesu walumbulwile kuba’mba bamalaika baji na mwingilo wa kukwasha bakalume ba Lesa kukosesha bulunda na Lesa. O ene mambo Yesu pa kujimuna baana banji ba bwanga pa mambo a kutuntwisha bakwabo o aambile’mba: “Jimukai! kechi musule nangwa kamotu ka tuno tucheche ne: mambo nemwambila namba, bamalaika bato baji mwiulu bakelwa kutala pa kilungi kya Tata wa mwiulu.” (Mateo 18:10) Bino Yesu kechi walumbulwilenga’mba mwananji wa bwanga yense uji na malaika wa kumuzhikijila ne. Yesu waambilenga’mba ba malaika ba Lesa bata bingi muchima baji mu kipwilo kya bwina Kilishitu.
Satana wakonsha kwitulukuka byepi?
▪ Yesu wajimwineko baana banji ba bwanga amba Satana ulengela bantu kubula kufunda bukine pe Lesa. Waambile’mba: “Umvwe muntu waumvwa mambo a bufumu, ne kwiakwatakanya ne, ponkapo awa mubi waiya, ne kumusompolao akushiwa mu muchima wanji.”—Mateo 13:19.
Mu kishimpi kya mwanamulume wakushile nkunwa mu bujimi bwanji, Yesu wasolwele jishinda jimo Satana jo ongwelamo bantu. Uno mwanamulume waimejilengako Yesu kabiji nkunwa yaimejilengako bena Kilishitu bashingwa bakalamanga pamo ne Yesu mwiulu. Yesu waambile’mba mulwanyi wanji waishile, “wakushilemo bincha mu kajo.” Bincha bimenako bena Kilishitu ba bubela. “Awa mulwanyi wibikushile ye Diabola.” (Mateo 13:25, 39) Byonka bincha byo bimwekanyika nobe wichi wasapuka, ne aba bebepekezha’mba bena Kilishitu, bamweka nobe bapopweshi bakine. Bupopweshi bufunjisha mafunjisho a bubela bwalengela bantu kubula kukokela Lesa. Satana wingijisha bupopweshi bwa bubela kulengela bantu kubula kwikala na bulunda bwawama na Yehoba.
Twakonsha kuchinuzhuka byepi kulukukwa na Satana?
▪ Yesu watelele Satana amba “mfumu wa panopantanda.” (Yoano 14:30) Byo alombelenga kwi Lesa, Yesu waambile byo twakonsha kwizhikijila kwi Satana. Yesu walombejileko baana banji ba bwanga kwi Shanji amba: “Mwibalame kwi yewa mubi. Abo kechi bo ba panopantanda ne, byonka byo nji amiwa kechi ne wa panopantanda ne. Mwibazhijike na bukine: mambo enu bo bukine.” (Yoano 17:15-17) Kuyuka Mambo a Lesa kwakonsha kwitulengela kubula kongolwa na bya mu ino ntanda ibena kulamwa na Satana.
Nga bamalaika betukwasha byepi mu ano moba?
▪ Yesu waambile’mba: “Mu juba jikapelako: bamalaika bakeya kusalululamo batama mu baoloka.” (Mateo 13:49) Tubena kwikala mu ‘moba apelako’ amo bantu bavula mo babena kutambwila mambo awama a Bufumu bwa Lesa.—Mateo 24:3, 14.
Kechi bonse bafunda mambo a Lesa betabilwa kwi aye ne. Bamalaika bo batangijila mwingilo Yehoba ye apa bantu banji ne kwabanya bantu batemwa Lesa ku boba babula kulondela byo bafunda. Pa kwamba pa boba betabilwa kwi Lesa, Yesu waambile’mba: “Bo boba baumvwa mambo, ne kwialamisha mu muchima wafwainwa ne wawama, ne kupanga bipangwa saka batekanya.”—Luka 8:15.
Umvwe mukeba kuyukilako byavula, monai kitango 10 kya uno buku wanembwa na Bakamonyi ba kwa Yehoba.
[Kipikichala pa peja 16]
Bamalaika bakwashañana mu mwingilo wa kuleta bantu mu kipwilo kya bwina Kilishitu