MUTWE WA PA NKUPIKO | BAMALAIKA—NANCHI KO BAJI NYI? MAMBO KA O KYANEMENA KUYUKILA BINO?
Bamalaika byo Bakonsha Kwimukwasha
Bamalaika bakishinka bata bingi muchima ku byuba bantu kabiji bapayankana bingi na kuba kyaswa muchima wa Yehoba. Lesa byo alengele ntanda, bamalaika “baimbilenga pamo na lusekelo ne baana ba Lesa byo babijikilenga saka batakaika.” (Yoba 38:4, 7) Kufumatu ne kala, bamalaika ‘basakisha’ kumona bikafika bungauzhi bwaambile bangauzhi pano pa ntanda.—1 Petelo 1:11, 12.
Baibolo waamba’mba Lesa wingijisha bamalaika kuzhikijila bapopweshi banji pa kuba’mba bafikizhe kyaswa muchima wanji. (Salamo 34:7) Akimonai byo oba:
Yehoba byo aletele lonaiko mu muzhi wa Sodoma ne Gomola, bamalaika bakwashishe Lota wajinga wa kishinka ne kisemi kyanji kufuma mu muzhi Lesa ye akebelenga konauna.—Ntendekelo 19:1, 15-26.
Mu Babilona wajingako kala, bansongwalume Bahebelu bebatayile mu kisha kya mujilo, bino Lesa ‘watumine malaika wanji kwiya na kupokolola bakalume banji.’—Danyela 3:19-28.
Mwanamulume wa kishinka aye Danyela byo bamutayile mu jiyengo ja mabokwe, waambile’mba, “Lesa wami wajikutuma malaika wanji ne aye wajikushinka tunwa twa mabokwe.”—Danyela 6:16, 22.
Kufumatu ne kala, bamalaika bakwashanga bantu bakishinka
BAMALAIKA BAKWASHANGA KIPWILOKITANSHI KYA BENA KILISHITU
Kimye kimo, malaika wa Lesa wazhikijile kipwilo kitanshi kya bena Kilishitu pa kuba’mba byakebelenga Yehoba byubiwe. Monai byo aubile:
Malaika washinkwile bibelo bya kaleya ne kutangijila batumwa bo bakashile kuya na kusapwila mu nzubo ya Lesa.—Byubilo 5:17-21.
Malaika watangijile Filipa wajinga musapwishi kuya mu mukwakwa wapichile mu kiselebwa wafumine ku Yelusalema kuya ku Gaza na kusapwila mwina Etiopya wayilenga na kupopwela ku Yelusalema.—Byubilo 8:26-33.
Kimye kya Lesa byo kyafikile kya kuswisha bantu babujile Bayudea kwikala bena Kilishitu, malaika wamwekele mu kimwesho bufuku ku mukulumpe wa bashilikale wa bena Loma aye Koneleusa ne kumubuula’mba ete mutumwa Petelo mu nzubo.—Byubilo 10:3-5.
Mutumwa Petelo byo bamukashile mu kaleya, malaika wamwekele kwi aye ne kumufumya mu kaleya.—Byubilo 12:1-11.
BAMALAIKA BYO BAKONSHA KWIMUKWASHA
Mu ano moba, kafwako bishinka bimwesha kuba’mba Lesa wingijisha bamalaika kukwasha bantu mu jishinda ja kukumya byonka byalumbulula Baibolo ne. Nangwa byonkabyo, Yesu waambile pa moba etu amba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.” (Mateo 24:14) Nanchi mwayuka kuba’mba mwingilo wingila baana ba bwanga ba kwa Kilishitu utangijilwa na bukwasho bwa bamalaika nyi?
Bamalaika bakwasha bantu kusapwila mambo awama ntanda yonse
Buku wa Lumwekesho umwesha kuba’mba bamalaika bakatwajijila kukwasha bantu kufunda pe Yehoba Lesa ne byo akobila bantu mwaya ntanda yonse. Mutumwa Yoano wanembele’mba: “Namwene ne malaika mukwabo saka apita pakachi ka jiulu, kabiji wajinga na mambo awama a myaka ne myaka a kusapwila ku bekala pa ntanda, ku bisaka bya bantu byonse ne ku mikoka yonse ku ba njimi yonse ne ku mitundu yonse ya bantu. Waambilenga na jiwi jikatampe amba: ‘Akamwai Lesa ne kumupa lukumo, mambo kimye kyanji kya kuchibilamo mambo kyafika, onkao mambo, popwelainga awa walengele jiulu ne ntanda ne kalunga ka mema ne masulo a mema atupauka.’” (Lumwekesho 14:6, 7) Bintu bibena kumweka mu ano moba bimwesha’mba bamalaika babena kutangijila mwingilo wa kusapwila pa Bufumu ntanda yonse. Inge kya kuba ndengamambo umo walapila ne kubwela kwi Yehoba, “bamalaika ba Lesa basekela bingi.”—Luka 15:10.
Ki ka kikamweka inge mwingilo wa kusapwila wapwa? Baibolo waamba’mba “mazhita a mwiulu” a bamalaika bakatundaika Yesu Kilishitu, Mfumu wa bamfumu kulwa “nkondo ya aja juba jikatampe ja Lesa wa Bulume Bonse” pa Amagedonyi. (Lumwekesho 16:14-16; 19:14-16) Bamalaika ba bulume bakengila mwingilo wa bunchibamambo Yesu byo ‘akashinkanya na boba babula . . . kukookela mambo awama a Nkambo yetu Yesu.’—2 Tesalonika 1:7, 8.
Yukai kuba’mba bamalaika bemuta bingi muchima. Bakeba kukwasha bingi boba bengijila Lesa. Kabiji Yehoba wibengijisha javula kukosesha ne kuzhikijila bakalume banji ba kishinka ba pano pa ntanda.—Bahebelu 1:14.
Onkao mambo, atweba bonse twafwainwa kwifuukwilapo. Nanchi tukatambwila mambo awama abena kusapwilwa ntanda yonse nyi? Bakamonyi ba kwa Yehoba baji ko mwikala bakatemwa bingi kwimukwasha kuyuka mwingilo wanema wingila bamalaika ba Lesa ba bulume.