Nanchi Musanta pa Bintu Byawama byo Mutambwila Nyi?

BYO bebapokolwele mu jishinda ja kukumya mu buzha ku Ijipita, bena Isalela patanshi batemenwe bingi kwikala bakasuluka kupopwela Yehoba. (Lupu. 14:29–15:1, 20, 21) Nangwa byonkabyo, panyuma ya bino bapimpwile milanguluko yabo. Batendekele kwijizhañanya pa mambo a bwikalo bwabo. Mambo ka? Mambo balekele kuta muchima ku bintu bibobijile Yehoba ne kutendeka kulanguluka pa kukatazha kwa bwikalo mu kiselebwa. Baambijile Mosesa amba: “Mambo ka o mwitufuminya mu kyalo kya Ijipita amba tufwile muno mu kiselebwa? Mambo kechi muji kajo ne, ne mema nao kafwamo, kabiji twibitala bibi bino bikajo [maana] byatamatu.”—Bala. 21:5.

Byo papichile myaka yavula, Mfumu Davida wa bena Isalela bakala waimbile amba: “Pakuba amiwa naketekela mu lusa lwenu: Muchima wami ukasekela mu lupulukilo lwenu. Nkembanga kwi Yehoba, Mambo aye wangubila bingi byawama.” (Sala. 13:5, 6) Davida kechi walubilemo bintu byawama Yehoba byo amubijile mu lusa lwanji lukatampe ne. Walangulukanga kimye kyonse pa bino bintu. (Sala. 103:2) Ne atweba Yehoba witubila bintu byawama bingi, kabiji kechi twafwainwa kumonanga bino bintu nobe byatutu ne. Onkao mambo twayai twambe pa mapesho a Lesa o twiyowa lelo jino.

“Balunda ne Yehoba ke Boba Bamwakamwa”

Nyimbi wa masalamo waimbile amba: “Balunda ne Yehoba ke boba bamwakamwa.” (Sala. 25:14, NW) Bantu bambulwa kulumbuluka baji na jishuko ja kufwenya kwipi ne Yehoba. Pano ibyepi inge ketuteshe muchima ku bwikalo bwetu kya kuba twalubako ne kulomba kwi aye? Akilangulukai pa kyakonsha kubiwa ku bulunda bwetu ne Yehoba. Byo aji mulunda netu, Yehoba ukeba atweba kumuketekela ne kumubula mu lulombelo bintu bituletela moyo, bikeba michima yetu ne bijikila. (Mana 3:5, 6; Fili. 4:6, 7) Nanchi kechi twafwainwa kutako muchima kuwamisha milombelo yetu nenyi?

Kamonyi wa kyanyike wa jizhina ja Paul byo alangulukile pa milombelo yanji, wamwene kuba amba wafwainwe kwiiwamishako.a Waambile amba: “Najinga na muteeto wa kubwezhapotu byambo bimo pa kulomba kwi Yehoba.” Paul byo apesele peselenga pa uno mutwe mu buku wa Watch Tower Publications Index, wafunjile amba mu Baibolo muji milombelo yafika ku 180. Mu ino milombelo muji byambo bya bakalume ba Yehoba bajingako kala bya kufuma panshi ya muchima. Paul waambile amba: Kulanguluka langulukapo pa bino byakumwenako bya mu Binembelo, kwankwashishe kufunda kulombangatu pa kintu kyo mbena kukeba kulombapo kwapwa. Kino kyankwasha bingi kubula Yehoba byonse binkatazha. Luno kindetela bingi lusekelo byo nafwenya kwipi ne aye mu lulombelo.

“Kajo pa Kimye Pafwainwa”

Kintu kikwabo kyawama Lesa kyo etupa ke bukine bwa mu Binembelo bo tufunda. Byo tuja kajo kawama kavula ka ku mupashi, tuji na bishinka byavula byafwainwa kwitulengela ‘kwimbanga na mambo a lusekelo lwa mu michima yetu.’ (Isa. 65:13, 14) Nangwa byonkabyo, twafwainwa kujimuka na byambo byatama byakonsha kwitupwishisha kizaku kyetu kya bukine. Kyakumwenako, kuteleka ku byambo byatama bya bantu basenduka mu lwitabilo kwakonsha kongola milanguluko yetu ne kwitulengela kubula kumona buneme bwa “kajo” ka ku mupashi ka “pa kimye pafwainwa” ketunengezhezha Yehoba kupichila mwi ‘kalume wakishinka kabiji wa maana.’—Mat. 24:45-47.

André, waingijila Yehoba pa myaka yavula, wapichile mu kintu kyatama bingi byo aongwelwe na milanguluko yatama ya bantu basenduka mu lwitabilo. Wamwene amba kwingijisha keyala wa pa Intaneti wa bantu basenduka mu lwitabilo pa ka kimye kacheche kechi kwakonsheshe kumubika mu kizumba ne. Uvuluka amba: “Patanshitu natemenwe byambo bya bantu basenduka mu lwitabilo byo baambilenga abo bene amba bya kine. Byo natwajijile kulanguluka pa bintu byo baambilenga natendekele kulanguluka amba kyawamatu ne kusha jibumba ja Yehoba. Pano bino mukuya kwa kimye, byo napesele pesele pa bintu byatama bya bantu basenduka mu lwitabilo byo baambijilenga Bakamonyi ba kwa Yehoba, nataine kuba amba bano bafunjishi ba bubela bafunjishenga bintu bya bujimuku. Bajinga na bishinka bya bubela mambo byo baambilenga byajinga bya kusombatu. Onkao mambo, natendekele jibiji kutanga mabuku etu alumbulula Baibolo ne kutanwa ku kupwila. Kabiji navulukile ne kimye kyabaya kyo naikele kwakubula kutanwa ku kupwila.” Kya lusekelo ke kya kuba amba André wabwelele mu kipwilo.

‘Balongo Bonse’

Yehoba witupesha bingi pa kwikala na balongo betu botwakwatankana nabo mu butemwe. (Sala. 133:1) O ene mambo mutumwa Petelo o anembejile amba: “Temwai balongo.” (1 Pe. 2:17) Kwikala na balongo betu bena Kilishitu, kwitulengela kumwenamo bingi mu lutundaiko lufuma ku bashetu, bainetu balongo ne banyenga yetu ba ku mupashi bo tuji nabo mu lwitabilo.—Mako 10:29, 30.

Pano bino kuji bintu byavula bingi byakonsha kulubankanya kimye kimo bulunda bo tuji nabo na balongo ne banyenga yetu ba ku mupashi. Kyakumwenako, bumbulwa kulumbuluka bwa muntu bwakonsha kwituzhingijisha ne kwitulengela kwikala na muchima wa kumuzhachisha. Umvwe kyaikala bino, nanchi kechi kyawama kuvuluka amba Yehoba watemwa bakalume banji nangwa kya kuba bambulwa kulumbuluka nenyi? Kabiji kunungapo, “umvwe twaamba namba, bundengamambo tufwabo, twijimbaika atwe bene, ne bukine kechi buji mwi atweba ne.” (1 Yoa. 1:8) Nanchi kechi twafwainwa kwibikishako ‘kutwajijila kwitemwa atweba bene na bene, ne kwilekela mambo’ nenyi?—Kolo. 3:13.

Wakyanyike wa jizhina ja Ann wafunjijile mu kitoba buneme bwa kupwanañana na bena Kilishitu. Wakumpwilwe kufuma mu kipwilo kya bwina Kilishitu byonka byaubile mwana walubile wa mu kishimpi kya kwa Yesu. Panyuma ya bino mwaishile maana kabiji wabwelele mu bukine. (Luka 15:11-24) Ann wafunjijileko ka ku kino kintu kyo apichilemo? Washimikizha amba: “Pano byo nabwela mu jibumba ja kwa Yehoba, nanemeka bingi balongo ne banyenga bonse pa muntu pa muntu nangwa kya kuba bambulwa kulumbuluka. Kala natemenwe bingi kwibazhachisha. Pano luno kechi nkeba kintu nangwa kimo kundengela kupusumuna jishuko jami ja kwikala pamo na bakwetu ba mu lwitabilo ne. Kafwako nangwa kimo kya mu ntanda kyakonsha kwitulengela kusha paladisa wa ku mupashi ne.”

Santainga Kimye Kyonse pa Bintu Byawama byo Mutambwila

Kwikala na luketekelo mu Bufumu bwa Lesa kuba amba bo bukapwisha makatazho onse a bantu kyo kintu kyo twafwainwa kunemekesha. Kimyetu kitanshi kyo twaikele na luno luketekelo, twajinga bingi na lusanchilo. Twiumvwine byonka biumvwine mupoteshi wa mu kishimpi kya kwa Yesu ‘wakapotolweshe byonse byo ajinga nabyo’ ne kupotamo “mangalite umo ufwa mutengo wabaya.” (Mat. 13:45, 46) Yesu kechi waambile amba awa mupoteshi walekele kwikala na lusanchilo pa yewa mangalite ne. Po pamotu ne atweba kechi twafwainwa kuleka kwikala na lusanchilo pa luketekelo lwawama lo tuji nalo ne.—1 Tesa. 5:8; Hebe. 6:19.

Akimonai kyakumwenako kya kwa Jean, waingijila Yehoba kukila pa myaka 60. Waamba amba: “Kintu kyankwasha kutwajijila kuvulukanga Bufumu bwa Lesa ke kwibwambapo ku bantu. Inge namona byo beumvwa ku muchima pa kuyuka Bufumu byo buji, ntundaikwa bingi. Kumona bukine bwa Bufumu byo bupimpula bwikalo bwa boba bafunda Baibolo kundengela kulanguluka amba, buno bukine bombulako bakwetu bwawama bingi.”

Tuji na bishinka byawama bitulengela kusanta pa bintu byavula byawama bya ku mupashi byo tubena kwiyowa. Nangwa kya kuba tupita mu meseko nabiji lumanamo, kukolwa, bukote, bijikila, bulanda bwa kufwisha batemwe betu ne makatazho a bya mali, twayuka amba bino bintu bya pa ka kimyetu kacheche. Mu Bufumu bwa Lesa, kununga pa mapesho a ku mupashi o tuji nao, tukekala ne na mapesho a ku mubiji. Makatazho onse o tupitamo lelo jino akapwa mu ntanda ipya.—Lum. 21:4.

Byo tubena kupembelela kyokya kimye, twayai tutwajijile kunemeka bintu byawama bya ku mupashi byo tuji nabyo ne kumwesha lusanchilo lwamwesheshepo nyimbi wa masalamo waimbile amba: “Anweba Yehoba Lesa, mingilo ya kukumya yo mwaingila yo yavula, ne milanguluko yenu yo mwitulanguluka nayo pamo. Ka paji nangwa umo wa kwimutanchikilayo bulongo ne; umvwe nasaka kwiimwesha ne kwiyamba, yakila mu kuvula kechi yakonsheka kubalwa ne.”—Sala. 40:5.

[Tubyambo Twa Munshi]

[Kipikichala pa peja 18]

Tuji na bukwasho bwa ku mupashi mu kimye kya meseko