Kwenda Mu Bololoke Mufuma Lusekelo

“Mapesho a Yehoba o alengela muntu kunonka; kabiji kechi unungako [kyatama, NW] ne.”—BYAMBO BYA MANA 10:22.

1, 2. Mambo ka o twafwainwa kubula kulangulukilangatu pa bintu bya kulutwe?

NTEMWAMAANA umo mwina America waambile’mba: “Umvwe ketulangulukishe pa bintu bya kulutwe . . . kyakonsha kwitulengela kubula kusekela mu bintu byo tuji nabyo luno.” Abino byo bilanguluka ne banyike bata muchima pa bintu byo bakobanga kulutwe na lwendo inge bakoma. Kino kibalengela kubula kumwenamo byawama mu bwanyike bwabo.

² Kimo kimye ne atweba bapopweshi ba Yehoba byo byo tulanguluka. Monai kino byo kyakonsha kwikala. Atweba Bakamonyi ba kwa Yehoba tukebesha bingi kuba’mba Lesa akafikizhe mulaye wanji wa kwalula ino ntanda ke paladisa. Tutengela bwikalo mo tukabulanga kukolwa, kukota, kumvwa misongo, ne kumanama. Kechi kyatama kutengela bino bintu ne, pano bino ki ka kyakonsha kubiwa umvwe twakizhamo kulanguluka pa bintu byawama bya ku mubiji biji kulutwe ne kuvulama mapesho a ku mupashi o tubena kumwenamo luno? Kyakonsha kutama bingi! Twakonsha kulefulwa ne ‘kukozhewa ku muchima mambo kyo twaketekela kyabanda kumweka.’ (Byambo bya Mana 13:12) Makatazho o tupitamo mu bwikalo akonsha kwitulefula. Mu kifulo kya kuchinchika ano makatazho, twakonsha kutatula kwijizhañanya. Bino byonse twakonsha kwibishindatu inge tubena kusanta pa mapesho o tuji nao luno.

3. Bi ka byo twaya twisambepo mu uno mutwe?

³ Byambo bya Mana 10:22 byaamba’mba: “Mapesho a Yehoba o alengela muntu kunonka; kabiji kechi unungako [kyatama, NW] ne.” Nanchi bunonshi bwa ku mupashi buji na bakalume ba kwa Yehoba ano moba kechi bo bwafwainwa kwituletela lusekelo nenyi? Twayai twisambepo bunonshi bumo bwa ku mupashi ne byo tumwenamo pa muntu pa muntu. Umvwe saka twikalako na kimye kya kulanguluka pa mapesho avula Yehoba o apa ‘muntu waoloka wenda mu koloka kwanji’ kitukosesha kutwajijila kwingijila Shetu wa mwiulu na lusekelo.—Byambo bya Mana 20:7.

‘Mapesho Etulengela Kunonka’ Luno

4, 5. Ñanyi lufunjisho lwa mu Baibolo lo mwanemeka, kabiji mambo ka?

⁴ Twafunda mafunjisho alumbuluka a mu Baibolo. Bupopweshi bwa Kilishitendomu bwamba’mba bwaitabila mu Baibolo. Pano bino kechi bwaitabila mu byo afunjisha ne. Nangwatu bantu baya mu bupopweshi bumo javula babenamo, kechi bekala na mulanguluko umo pa bifunjisha Binembelo ne. Bano bantu bapusana bingi na bakalume ba kwa Yehoba! Nangwa kya kuba twapusana mushobo, bisho, ne mutundu, tupopwela Lesa ye twayuka jizhina janji bulongo. Kechi ke Lesa ujimo bantu basatu ne. (Mpitulukilo ya mu mizhilo 6:4; Masalamo 83:18; Mako 12:29) Kabiji twayuka kuba’mba mambo a bumfumu bwa Lesa bwa pa bilengwa byonse katatakatu akapwe kabiji atweba bonse pa muntu pa muntu twafwainwa kwikala balumbulukatu. Twayuka bukine pa mambo a lufu kabiji kechi tuji na moyo ujipo na bantu bavula baitabila’mba Lesa umanyika bantu mu mujilo wa Helo nangwa kwibatwala ku mpunzha ya kwesekelako bantu pa lwendo lwabo lwa kuya mwiulu ne.—Musapwishi 9:5, 10.

⁵ Kabiji kitusangajika bingi kuyuka’mba kechi twilengeletu atweba bene ne. Bino Lesa ye witulengele mu kipasha kyanji mwine. (Ntendekelo 1:26; Malakai 2:10) Nyimbi wa masalamo waimbile kwi Lesa wanji amba: “Amiwa nkemubila sante; mambo nalengelwe wakatazha, wakukumya: Mingilo yenu yo yakukumya; Kyo kyo ayukisha muchima wami bulongo.”—Masalamo 139:14.

6, 7. Ñanyi lupimpu mu bwikalo bwenu nangwa bwa bakwenu lwimukwasha?

⁶ Tuchinuzhuka miteto ne byubilo byatama. Pa mwela ne mu mapepala a byambo monka bajimwina bantu pa bintu byatama bifuma mu kupepa fwanka, kutomesha malwa, ne bulalelale. Bino bantu kechi bomvwina luno lujimuno ne. Pano kikala byepi umvwe muntu wa kishinka wafunda kuba’mba Lesa wakine wakanya bino bintu kabiji bantu bebyuba bamufichisha bingi ku muchima? Wibisankilapo! (Isaya 63:10; 1 Kolinda 6:9, 10; 2 Kolinda 7:1; Efisesa 4:30) Nangwa kya kuba uba bino kikatakata mu kukeba kutokesha Yehoba Lesa ku muchima, bino ne aye mwine wikala mutende saka aji na bumi bwawama.

⁷ Bantu bavula kechi kibapelela kuleka byubilo byatama ne. Pano bino bamo bebileka. Bepana kwi Yehoba ne kubatizwa mu mema, ne mu jino jishinda besolola patoka kuba’mba baleka kuba bintu bibula kutokesha Lesa pa muchima. Kino kintu kitukosesha bingi atweba bonse! Twikala bakosa ne kubula kwivwanga mu bubi ne byubilo byatama.

8. Ñanyi lujimuno lwa mu Baibolo lukwasha kisemi kwikala kya lusekelo?

⁸ Kisemi kyetu kikala kya lusekelo. Ano moba mu byalo byavula bisemi byaabenamo. Masongola avula abena kupwa, kabiji kino kibena kulengela baana kususuta. Mu byalo bimo bya mu Europe, bisemi byavula bilamwatu na nsemi umo kwapwa. Nga atweba Yehoba ukwasha byepi kisemi kyetu kuba’mba twendenga mu bulumbuluke? Mwane tangai Efisesa 5:22–6:4, ne kumvwa lujimuno luji mu Byambo bya Lesa lo byajimuna banabalume, banabakazhi ne baana. Kwingijisha byambo byanembwa pa kino Kinembelo ne binembelo bikwabo kukosesha bingi masongola, kabiji kukwasha bansemi kukomesha bulongo baana ne kwikala na lusekelo mu kisemi. Nanchi ano kechi o mapesho etusangajika nenyi?

9, 10. Ndangulukilo yetu ya bwikalo bwa kulutwe yapusana byepi na ya bantu ba ino ntanda?

⁹ Betulaya kuba’mba katatakatu makatazho aji mu ntanda akapwe. Nangwa kya kuba kuji kuyilako palutwe mu bya kulengalenga ne kuyukilako bintu bikwabo ne kwingila na ngovu kwa bandamabyalo bakishinka, makatazho aamba ne kyambo. Klaus Schwab watendekele kipamo kya World Economic Forum katatakatu papo waambile kuba’mba “makatazho mu ntanda abena kuyilakotu palutwe, kabiji kafwako mwakwiapwishisha ne.” Waambile ne pa “makatazho abena kupitamo byalo byonse nabiji bumbanzhi, konauna ntanda, ne kwalauka alauka mu bya bukomo.” Schwab wapezhezheko’mba: “Kino kyo kimye bantu kyo bafwainwa kukwatankena pamo ne kulangulukapo bukiji bukiji mashinda mwakupwishisha makatazho aji mu ntanda.” Mu kino kitota kya myaka kya bu 21 bantu kechi balangulukapo’mba kulutwe na lwendo bakekala bulongo ne.

¹⁰ Atweba kitusangajika bingi kuyuka’mba Yehoba wanengezha jishinda jawama ja kupwishishamo makatazho onse a bantu. Jino jishinda ke Bufumu bwa Bumesiasa! Kupichila mu buno bufumu, Lesa wa kine ‘ukapwisha makondo’ ne kuleta ‘mutende wavula.’ (Masalamo 46:9; 72:7) Mfumu watongolwa aye Yesu Kilishitu, ‘ukebapokolola bakajilwa, balanda, ne bayanji kabiji ukakuula myeo yabo ku kunyantwa ne ku bukapondo.’ (Masalamo 72:12-14) Mu buno Bufumu kechi mukekala bipowe bya nzala ne. (Masalamo 72:16) Yehoba “ukashimuna mipolo yonse ku meso abo; ne lufu kechi lukekalako jibiji ne; nangwa mabingo nangwa kujila, nangwa misongo, kechi bikekalako jibiji ne: bintu bitanshi byapichijila.” (Lumwekesho 21:4) Bufumu bebwikajika kala mwiulu kabiji katatakatu bukafumyepo makatazho onse panopantanda.—Danyela 2:44; Lumwekesho 11:15.

11, 12. (a) Nanchi kukeba bya lusangajiko kuleta lusekelo lwa kimye kyonse nyi? Londololai. (b) Ki ka kituletela lusekelo lwa kine?

¹¹ Twayuka kileta lusekelo lwa kine. Ki ka kileta lusekelo lwa kine? Shayuka umo wafunda bya milanguluko ya bantu waambile’mba bintu bisatu bileta lusekelo ke kubapo bintu bimo bya lusangajiko, kwingila ne kwikala na kisemi, ne kubila bakwetu byawama. Pa kwibitanchika bulongo mu ndonda bino bintu bisatu, bya lusangajiko byo byaikele kya busatu kabiji waambile’mba: “Bino byambo byanema bingi mambo bantu bavula bataya kimye kyabaya mu bya lusangajiko mu bwikalo bwabo.” Nga Baibolo waambapo’mba ka?

¹² Mfumu Solomone wa bena Isalela waambile’mba: “Naambile mu muchima wami namba: Nanchi, naya ngeseke bya lusangajiko, nsangalale. Kabiji umvwai, kino nakyo kyajinga kyatu. Naambile na mambo a tuseko namba: To twa bukonye! Kabiji ne na mambo a bya lusangajiko namba: Nabyo byo bya ka?” (Musapwishi 2:1, 2) Binembelo nabyo bilumbulula’mba bya lusangajiko ke bya kakimye kachechetu. Nga kwingilapo mwingilo? Tuji na mwingilo wawama kwingila, wa kusapwila mambo a Bufumu ne kulenga baana ba bwanga. (Mateo 24:14; 28:19, 20) Byo tubulako bakwetu mambo a lupulukilo alumbululwa mu Baibolo, twingila mwingilo uketulengela kwipulusha atweba bene ne betumvwa pamo. (1 Timoti 4:16) Byo twaikala “ba mu mwingilo umo ne Lesa,” tutana kuba’mba “mu kupana muji bingi lusekelo kukila mu kutambula.” (1 Kolinda 3:9; Byubilo 20:35) Uno mwingilo witulengela kwikala na lusekelo mu bwikalo bwetu ne kulengela Mulenga wetu kumukumbula Satana Diabola umwendeleka. (Byambo bya Mana 27:11) Kine, Yehoba witumwesha kuba’mba umvwe twamunemeka twikala ba lusekelo kimye kyonse.—1 Timoti 4:8.

13. (a) Mu ñanyi jishinda Sukulu ya Mwingilo wa Teokalasi mo iletela lusekelo? (b) Nga anweba buwame ka bo mwatana mu ino Sukulu ya Mwingilo wa Teokalasi?

¹³ Tuji na lufunjisho lwanema kabiji lwawama. Gerhard ke mukulumpe mu kipwilo kya Bakamonyi ba kwa Yehoba. Uvuluka kimye kyo akijinga mwanyike amba: “Byo nakijinga mwanyike najinga na lukatazho lwa kwamba. Umvwe nazhingila nakankalwanga kwamba bulongo kabiji kino kyandengelanga kwamba na kikukuma. Nelangulushanga bingi ne kupopomenwa. Bansemi bami bantwajile ku sukulu umo bibye amba mfunde kwamba bulongo, bino kechi kyankwashishe nangwa pacheche ne. Kino kikukuma kyabaile bingi. Nangwa byonkabyo, Yehoba wanengezha lunengezho lwawama bingi lwa Sukulu ya Mwingilo wa Teokalasi. Byo nanembeshe mu uno sukulu, wankoseshe bingi. Naesekelenga na ngovu kwingijisha byo nafunjilenga. Ne kya kine byankwashishe bingi! Natendekele kwamba bulongo kabiji naingijilenga na kuchinchika mu mwingilo. Luno ñamba ne majashi a mvula bantu. Namusanchila bingi Yehoba wankwashishe kupimpula bwikalo bwami kupichila mu uno sukulu.” Jishinda Yehoba jo etufunjishishamo mwingilo wanji jituletela bingi lusekelo.

14, 15. Ñanyi bukwasho bo tutambwila mu kimye kya malwa? Ambai kya kumwenako.

¹⁴ Twikala balunda na Yehoba ne kwikwasha atweba bene na bene na balongo betu mwaya ntanda yonse. Katrin wikala mu Germany wajinga bingi na kijikila byo aumvwine sawakya wa kitentanshi ne kinkunkwila kya mema kyaubiwe ku kabeta ka ku bulenge musela wa Asia. Kino kyamwekele mwananji saka aji mu Thailand. Papichile maawala 32 uno nsemi kwakubula kuyuka kana mwananji wajinga mumi nangwa wajinga pa bantu bo bakozhezhe nangwa kufwa. Katrin waumvwine bingi bulongo byo bamubujile pa lamya kuba’mba mwananji ujitu bulongo!

¹⁵ Ki ka kyamukwashishe Katrin kuchinchika kyo kyo kimye kyo ajinga na kijikila? Mwine wanemba’mba: “Kino kyonse kimye nalombelenga kwi Yehoba. Kino kyankwashishe kwikala mutende saka nakosa. Kabiji balongo ba ku mupashi baishilenga na kunkosesha.” (Filipai 4:6, 7) Akilangulukai byo akonsheshe kwikala inge waji waikeletu kwa kubula kulomba kwi Yehoba ne kubula kumukosesha ku balongo ba ku mupashi! Bulunda bwetu na Yehoba ne na Mwananji kubikapo ne balongo betu ba bwina Kilishitu bwituletela bingi lusekelo, kabiji twafwainwa kutapo muchima!

16. Ambai kya kumwenako kimwesha munema wa kuketekela’mba kukekala lusanguko.

¹⁶ Tuji na luketekelo lwa kukamonañana jibiji na batemwe betu bafwa. (Yoano 5:28, 29) Nsongwalume umo wa jizhina ja Matthias wajinga Kamonyi wa kwa Yehoba. Bino na mambo a kubula kuyuka mapesho o ajinga nao, wasankijilepo kipwilo kya bwina Kilishitu saka akijitu mwanyike. Pano wanemba’mba: “Kechi nesambanga kya kine na batata ne. Pa myaka yavula twaubangatu monka twapusena. Nangwa byonkabyo, batata bakebangatu amba ngubenga byawama. Bantemenwe bingi, pano bino amiwa kechi nekimonangapo namba kintu ne. Mu 1996, naikajile kwipi na mwanya pobajinga saka nakwata kuboko kwabo na kuchikauka ne kwibambila namba, ndekelaiko mambo pa byonse byo naubile ne kwibabula kuba’mba nebatemwa bingi. Pano bino kechi bajinga na bulume bwa kumvwa byo naambilenga ne. Panyumatu ya kukolwa moba acheche, bafwile. Umvwe nkekala mumi ne kumonañana na batata kimye kyo bakasangulwa, kechi tukavulukapo ne bya kunyuma ne. Luno byonji mukulumpe mu kipwilo kabiji twibapainiya ba kimye kyonse pamo ne mukazhami, batata bafwainwa bakatemwa bingi pa kumvwa bino.” Kitukosesha bingi kuketekela’mba kukekala lusanguko!

‘Kechi Unungako Kyatama Ne’

17. Kulanguluka languluka pa mapesho a Yehoba kwitukwasha byepi?

¹⁷ Yesu Kilishitu waambile pe Shanji wa mwiulu amba: “Aye uselesha juba janji ku babi ne ku bawama pamo; ne kunokesha mvula pa baoloka ne pa babula koloka pamo.” (Mateo 5:45) Umvwe kya kuba Yehoba Lesa upesha babula koloka ne babi, wakizhamo ne kukizhamo kupesha bantu banji benda mu bulumbuluke! Salamo 84:11 waamba’mba: “Benda mwalumbuluka, [Yehoba] kechi ukebatana nangwa kintu kimo kyawama ne.” Inge twalanguluka byo alama ne kutesha muchima bantu bamutemwa, michima yetu iyula na lusanchilo ne lusekelo!

18. (a) Mambo ka Yehoba kyo abujila kunungako kyatama ku mapesho anji? (b) Mambo ka bantu ba Lesa bavula kyo bamanamina?

¹⁸ “Mapesho a Yehoba” o alengela bantu banji kunonka ku mupashi. Kabiji witubula’mba “kechi unungako [kyatama, NW] ne.” (Byambo bya Mana 10:22) Pano nga mambo ka meseko kyo afikila bantu bakishinka ba Lesa bavula ne kwibalengela kumanama? Kuji bintu bisatu bilengela’mba tupitenga mu meseko ne kufikilwa na malwa. (1) Milanguluko yetu yatama. (Ntendekelo 6:5; 8:21; Yakoba 1:14, 15) (2) Satana ne bademona banji. (Efisesa 6:11, 12) (3) Ntanda yatama. (Yoano 15:19) Nangwa kya kuba Yehoba uswisha bintu byatama kubiwa kwi atweba, kechi ye ulengela’mba byubiwenga ne. Mambo “bya kupana byonse byawama ne bya bupe byonse byalumbuluka bifuma mwiulu, kasa bikila panshi kufuma kwi Tata wa byeya.” (Yakoba 1:17) Mapesho a Yehoba kechi alengela muntu kumanama ne.

19. Aba batwajijila kwenda mu bulumbuluke bwabo babena kutengela ka?

¹⁹ Pa kuba’mba tunonkenga ku mupashi kikupu, twafwainwa kufwenya kwipi ne Lesa. Inge twaikala balunda na Lesa ‘twitujila jimo kitendekesho kyawama kya myaka ikeya, namba tukwachishe ku bumi, bonkabwa bwa kine kine,’ bumi bwa myaka ne myaka. (1 Timoti 6:12, 17-19) Mu ntanda ipya tukekala na bunonshi bwa ku mupashi ne bwa ku mubiji. Aba ‘bakokela jiwi ja Yehoba’ bakekala na bumi, bonkabwa bwa kine kine. (Mpitulukilo ya mu mizhilo 28:2) Twayai tutwajijile kwenda mu bulumbuluke bwetu kasa twakosatu.

Bi ka byo Mwafundamo?

• Mambo ka o kyatamina kukizhamo kulanguluka pa bintu bya kulutwe?

• Mapesho ka o twikala nao ano moba?

• Mambo ka bakalume bakishinka ba Lesa kyo bamanamina?