“Kalama Wawama Muchima Kabiji Mulunda Netu”

MULONGO JOHN (JACK) BARR, wajinga wa mu Jibumba Jitangijila ja Bakamonyi ba kwa Yehoba, wapwishishe bwikalo bwanji bwa pano pa ntanda pa Kibelushi lukelo pa 4 December, 2010. Wajinga na myaka 97. Bamwambapo’mba wajinga “kalama wawama muchima kabiji mulunda netu.”

Mulongo Jack Barr wasemekejilwe mu muzhi wa Aberdeen, mu kyalo kya Scotland, mu jivumo jabo bajinga basatu kabiji ye wajinga mukala. Bansemi banji bonse babiji bajinga bashingwa. Mulongo Barr javula waambanga bingi pa nkomeno yanji, kabiji wasantanga bingi pa kyakumwenako kyawama kya bashanji ne bainanji.

Byo afikile pa jifumbi ja bunsongwalume, kyamukatazhanga bingi kwisamba na bantu boabula kuyuka. Pano bino, wibikileko bingi kushinda luno lukatazho, juba jimo pa Mulungu mabanga mu mwaka wa 1927 saka aji na myaka ya kusemwa 14 waambijile bashanji amba winengezha kuya nabo mu mwingilo wa kusapwila ku nzubo ku nzubo. Bino byo byo atendekele kusapwila. Kufumatu joja juba kufika ne kimye kyo afwile, Mulongo Barr watwajijile kwikala musapwishi wabambakana wa mambo awama.

Mapuso ashi akepaye bainanji a mulengejile mulongo Jack kulangulukishapo pa nkebelo ya bumi saka akijitu mwanyike, kabiji mu 1929 wipaine kwi Yehoba, ne kumwesha kwipana kwanji mu lubatizhilo mu 1934. Mu 1939, wayile na kwingijila pa Betele ku London, mu kyalo kya England. Uno ye mwaka ye atendekele mwingilo wa kimye kyonse ye aingila pa myaka 71.

Pa 29 October mu 1960, Mulongo Barr watwelele mu bulunda bo aambanga’mba “bwawamine bingi” byo asongwele ba Mildred Willett baingijile bupainiya ne bumishonale pa myaka yavula. Mulongo ne Nyenga Barr bajinga na byubilo byawama, bakwatankene bingi, kabiji batwajijile kwikala bino kufikatu ne kimye ba Mildred kyo bapwishishe bwikalo bwabo bwa pano pa ntanda mu October mu 2004. Mulongo ne Nyenga Barr batanganga kibaba kya mu Baibolo pa juba pa juba mu masongola abo.

Bayukile Mulongo Jack Barr bamba amba wajinga mwanamulume wakoka muchima wapananga bulongo lujimuno lwaimena pa Binembelo na kifyele. Wajinga na mukoyo wa kwingila, walangulukilangako bakwabo, wajinga kafunga wawama bingi muchima kabiji mulunda wakishinka. Byo akumbulangapo pa kupwila, majashi o aambanga ne milombelo yanji, byonse byamweshanga byo anemekele bukine mu bwikalo bwanji kabiji ne bulunda bo ajinga nabo ne Yehoba byo bwakosele.

Nangwa kya kuba Mulongo Barr witusha, twasekela mambo watambula bumi bwabumbulwa kufwa, bo atengelanga ne kwambapo javula. Wakebeshanga bingi kutambwila buno bumi.—1 Ko. 15:53, 54.a

[Tubyambo twa mushi]