Mashinda amo a Kwingijisha pa Kupopwela kwa Kisemi Nangwa pa Lufunjisho lwa pa Bunke

KU NTENDEKELO ya 2009, Bakamonyi ba kwa Yehoba mwaya ntanda bapimpwile mutanchi wa kupwila kwa kipwilo. Kupwila kubiji kwa mukachi ka mulungu bekubikile pa juba jimo, ne kutundaika bonse kwingijisha juba jaikelangapo kokwa kupwila kwikelapo na kupopwela kwa kisemi nangwa lufunjisho lwa pa bunke. Nanchi mubena kulondela luno lunengezho nyi? Abya lubena kwimukwasha nyi?

Bamo kechi bayuka bintu bya kwisambapo pa Kupopwela kwa Kisemi ne. Nangwa byonkabyo, Jibumba Jitangijila kechi jabikileko luno lunengezho na mulanguluko wa kunengezhezha bisemi bintu byo bafwainwa kwisambangapo ne. Na mambo a kuba bwikalo bwa bantu bwapusana, muntu mwine bunke nangwa mutwe wa kisemi ye wafwainwa kumona bya kufunda pa jojo juba mambo ye wayuka bulongo byakonsha kukwasha.

Bamo banengezhezha pamo kupwila kwa kipwilo, pano bino kupopwela kwa kisemi kechi kwafwainwatu kwikala kwa kunengezhezhamo kupwilatu konka ne. Bakwabo nabo batanga, kwisamba, ne kufwanyikizha bantu batongolwa mu mashimikila a mu Baibolo, kikatakata inge baji na baana babacheche. Kabiji napo kechi kyakonsha kuyilamo kimye kyonse kwikalangatu na mwisambo wa mepuzho ne mikumbu byonka byo kikala pa kupwila kwa kipwilo ne. Kino ke kimye kya kufwanyikizha bintu ne kwisamba saka twakasuluka pa bintu byo tutanga mu Baibolo. Ku bino kilengela kupopwela kwa kisemi kubula kulenga mukose.

Nsemi wamulume umo uji na baana basatu wanembele’mba: “Byo tuba javula bifuma mu byo tutanga mu Baibolo. Bonse tutangila jimo bitango, banyike pa kutanga bamonapo byepelo bimo bya kupesapesapo, apa bino baiya baambapo. Michael uji na myaka itanu na ibiji watemwa bingi kulenga bipikichala nangwa kunemba jifuka pa byo aji kutanga. Davida ne Kaitlyn, baji na myaka [13 ne 15] kimye kimo banemba mashimikila a pa byo babatangenga nobe babena kulumbulula byo bamwene. Kimye kimo byo twatangilenga pe Yosefwa byo alumbulwilenga biloto bya kwa kuki ne kaseya wa kwa Felo, Kaitlyn wanembele nobe ye kaili wamweneko byaubiwenga.”—Nte. kita. 40.

Bino kwambatu kine, bwikalo bwapusana. Bintu byawamina kisemi kimo kechi byakonsha kwingila ku kisemi kikwabo ne. Mu kakitenguluzha kaji ku bushiya muji mashinda amo o mwakonsha kwingijisha pa kupopwela kwa kisemi nangwa pa lufunjisho lwa pa bunke. Bino ne anweba bene mwakonsha kulangulukapo akwabo.

[Kitenguluzha/Kipikichala pa peja 6, 7]

Bisemi muji banyike:

• Kutanga ne kwisamba mu buku wa Ifipusho Abacaice Bepusha—Ifyasuko Fibomba.

• Isambai pa bwipuzho bwa kuba’mba, “Wakonsha kuba byepi inge . . . ?” (Monai Kyamba kya Usopa kya Kibemba kya May 15, 1996, jipa 14, mafuka 17-18.)

• Isambai pa bikonkwanyi bya pa kimye kicheche ne bya pa kimye kikatampe.

• Kutamba pa kimye pa kimye mavidyo aimena pa Baibolo ne kwisambapo.

• Isambai “Kibaba kya bakyanyike” mu Kyamba kya Usopa.

Bamulume ne mukazhi Babula baana:

• Isambai kitango 1, 3, 11-16 mu buku wa Kintu Kilengela Kisemi Kwikala kya Lusekelo.

• Isambai byo mwapesele pesele pa bishinka byo mwataine pa kutanga Baibolo.

• Kunengezhezha pamo Lufunjisho lwa Baibolo lwa Kipwilo ne Lufunjisho lwa Kyamba kya Usopa.

• Bonse bubiji bwenu monaipo mashinda mo mwakonsha kwingijilako pakatampe mu mwingilo.

Balongo bakatanda ne banyenga bazhike nangwa baji mu masongola na babula kwitabila:

• Fundainga mabuku akatataka alupulwa pa kushonkena kwa nkambi.

• Tangainga ma Yearbook a katataka ne a kala.

• Kebakebainga mikumbu ya mepuzho atemwa kwipuzha bantu mu nyaunda yenu.

• Nengezhainga bya kwamba mu mwingilo wa mu bujimi.

Bisemi muji baana babacheche:

• Fwanyikizhainga bantu batongolwa mu Baibolo.

• Kayainga tubisela tulengela kuvuluka bintu nabiji twikala mu Awake! pa mapa 30 ne 31.

• Langulukaingapo mashinda akatataka a kubilamo bintu. (Monai kibaba kya kuba’mba, “Bino Bintu Bikwashañana Bingi” mu Kyamba kya Usopa kya February 15, 2011, jipa 11.)

• Kwisamba kibaba kya kuba’mba “Funjishainga baana benu” kikala mu Kyamba kya Usopa.