Mepuzho Afuma ku Batanga

Twakonsha byepi kumvwisha biji mu sawakya wa mwingilo wa mwaka?

Pa mwaka pa mwaka tutengela kutambula sawakya wikala mu buku wa Yearbook. Tumvwa bingi bulongo pa kumona bantu ba Yehoba byo babena kwingijila pamo mwingilo wa ntanda yonse wa kusapwila ne kufunjisha. Bino pa kuba’mba tumvwishe mwatala uno sawakya, twafwainwa kuyuka bulongo bibelengelo byo bilumbulula. Akimonai bino byakumwenako bicheche.

Mwaka wa mwingilo. Utendeka mu September kupwa mu August mwaka mukwabo. Yearbook wikala na sawakya wa mwaka wa mwingilo wafumako. Onkao mambo, Yearbook wa 2011 uji na sawakya wa mwaka wa mwingilo wa 2010 watendekele pa 1 September 2009 kupwa pa 31 August, 2010.

Kibelengelo kikatampe kya basapwishi ne Avaleji wa Basapwishi. “Basapwishi” ke bakamonyi ba kwa Yehoba babatizhiwa kubikapo ne babula kubatizhiwa bafikilamo kwikala basapwishi ba Bufumu. “Kibelengelo kikatampe” ke kibelengelo kyabaya kya ñondo umo mu mwaka wa mwingilo basapwishi bavula mo baletele masawakya abo kabiji babajilako ne masawakya akelelwe o babujile kubajila ku ñondo wapwa. Kino kibena kulumbulula’mba basapwishi bamo bakonsha kwibabala jibiji. Pano bino, kino kibelengelo kikatampe kechi kyavwangako kibelengelo kya basapwishi baingijileko mu mwingilo bino balubileko kupana sawakya ne. Kino kibena kumwesha’mba musapwishi yense wafwainwa kupana sawakya wanji bukiji. “Avaleji wa basapwishi” ke kibelengelo kya basapwishi bonse bapainenga masawakya abo amu mwingilo mu mwaka yense.

Maola onse. Kwesakana na 2011 Yearbook, Bakamonyi ba kwa Yehoba baingijile maola kukila pa 1.6 bilyonyi mu mwingilo wa mu bujimi. Nangwa byonkabyo, kino kibelengelo kechi o maola onse o twaingijishe mu bya mpompwelo nabiji lupempu lwa bukafunga, kupwila ne kimye kyo twikala na kufunda Baibolo kwa pa bunke ne kulangulukapo ne.

Mali o twaingijishe. Mu mwaka wa mwingilo wa 2010 Bakamonyi ba kwa Yehoba baingijishe mali kukila pa $155 milyonyi kulaminamo bapainiya beikajila, bamishonale ne bakalama benda mu mwingilo wabo wa mu bujimi. Pano bino ano mali kechi avwangamo oa o twingijisha kupulinta mabuku alumbulula Baibolo; nangwa mali o twingijisha kulaminamo bamingilo ba pa Betele bakila pa 20,000 pa misampi ntanda yonse ne.

Bajako pa kivuluko. Kino ke kibelengelo kya bantu babatizhiwa bajako bipashañano bya pa kivuluko ntanda yonse. Nanchi kino kyo kibelengelo kya bashingwa bakiji panopantanda nyi? Ine. Bamo bajako na mambo a byo baitabijilemo kala nangwa kuvulañana kwa bongo. Abino byo bintu bimo bilengela bamo kulanguluka’mba baitwa kuya na kwikala mwiulu. Onkao mambo, kechi twakonsha kuyuka kine kibelengelo kya bashingwa bakiji pano pa ntanda ne, kabiji kechi kyetu kya kuba’mba tuyuke ne. Jibumba Jitangijila kechi jiji na mutanchi wa bonse bajako ne, mambo kechi baji na jishinda ja kumvwañenamo na bashingwa bonse bakiji pano pa ntanda ne.a

Bino kyo twayuka ke kya kuba’mba, bashingwa “bakalume ba Lesa wetu” bakekalapo pano pa ntanda kimye luvula lwa lonaiko lwa malwa akatampe kyo lukafika. (Lum. 7:1-3) Kufikatu ne kyo kyo kimye, bashingwa basakutwajijila kutangijila mwingilo mukatampe wa kusapwila ne kufunjisha ukyangye kwikalako mu bwikalo bwa bantu.

[Tubyambo twa mushi]