Kupwila ko Bakabula Kuvulama

“PANYUMA ya kuno kupwila musakwamba’mba, ‘Bantu ba Lesa kechi bakekuvulama kuno kupwila kwa mwaka ne.’” Bino byo byambo bya kushinkwila byaambile ba Stephen Lett ba mu Jibumba Jitangijila ja Bakamonyi ba kwa Yehoba byalengejile luonde kwikala na mujojo wa kuteleka ku majashi. Luno luonde lwaishile ku kupwila kubiwa pa mwaka pa mwaka kwa Watch Tower Bible and Tract Society of Pennsylvania, pa 2 October, 2010 mu Nzubo ya Kupwilamo Kukatampe ya Bakamonyi ba kwa Yehoba mu muzhi wa Jersey, ku New Jersey, mu U.S.A. Ñanyi bintu byo besambilepo pa kuno kupwila?

Jashi ja kushinkwila kuno kupwila jaambile Mulongo Lett, waambile pa kalaki wa Yehoba wa mwiulu watongolwa mu Baibolo mu buku wa Ezikyo. Uno kalaki wa lukumo lukatampe wimenako jibumba ja Lesa jitangijilwa na mwine Yehoba. Mulongo Lett waambile’mba, lubaji lwajo lwa mwiulu muji bilengwa bya mu mupashi, lwendela pa lubilo lwa kubesha kwa mvula. Luno lubilo lukatampe ke kulanguluka kwa mwine Yehoba. Lubaji lwa pano pa ntanda lwa jibumba ja Yehoba Lesa nalo kechi lwaimanatu pamo ne. Mulongo Lett watongwele lupimpu lwawama bingi lwaubiwa katataka mu lubaji lwa pano pa ntanda lwa jibumba ja Lesa.

Kyakumwenako, misampi yavula babena kwiivwanga pamo na ikwabo kuba’mba baingilanga pa misampi mu bino byalo bate muchima pa mwingilo wa kusapwila. Mulongo Lett watundaikile luonde kutwajijila kulombelako Jibumba Jitangijila jibena kwimenako kalume kuba’mba kechi jafwainwa kutwajijilatu kwikala jakishinka ne, bino ne kwikala ja maana.—Mat. 24:45-47.

Masawakya ne Misambo ya Lutundaiko

Mulongo Tab Honsberger wa mu kavoto ka musampi mu kyalo kya Haiti waambile sawakya wa bya malwa byajingako panyuma ya kitentanshi kyaubiwe pa 12 January, 2010 kyaipayile bantu nobe 300,000. Uno mulongo waambile’mba bantangi babupopweshi babujilenga bantu amba aba bafwa, Lesa ye wibakambula na mambo a kubula lwitabilo, bino wazhikijilako bamwakamwa. Nangwa baambilenga bino, bambanzhi bajinga mukaleya banyemene kimye kyo kakundukile na kitentanshi. Bena Haiti bavula bamichima ya kishinka babena kutana lutekenesho mu bukine bwaamba pa ene mambo ano moba etu o atamina. Mulongo Honsberger waambile byaambile mulongo umo wakishinka wafwishishe mukazhi ku kitentanshi amba: “Ne luno nkijila, kechi nayuka kimye kyo nkaleka kujila ne, pano bino jibumba ja Yehoba jintekenesha bingi. Nji na luketekelo lo ñambapo javula ku bakwetu.”

Mulongo Mark Sanderson wa mu kisemi kya Betele mu Brooklyn waambile pa sawakya wafumine ku kyalo kya Philippines. Uno mulongo wajinga mu Kavoto ka Musampi mu kyokya kyalo, waambile na lusekelo pa basapwishi byo babena kuvujilakotu kabiji ne mafunjisho a Baibolo nao byo avula kukila ne bene basapwishi. Washimikizhe byaubile mulongo umo wa jizhina ja Miguel wajinga na munkana ye batapile. Mulongo Miguel watwajile uno mbanzhi ku kije kya mambo ko bamutayile pakazhima panyuma ya kumutotolwesha. Pakupitapo kimye, byo ayile na kusapwila mu kaleya, mulongo Miguel wasapwijile uno mbanzhi. Nangwa kya kuba waumvwine moyo, Miguel wisambile nanji bulongo. Ko kyakayanga watendekele kumufunjisha Baibolo uno mwanamulume, kabiji wanungulukile ne kutemwa Yehoba. Luno wabatizhiwa. Mulongo Miguel witemwa bingi na uno mwanamulume kabiji ubena kukebapo mashinda a kumufumishishamo mu kaleya.a

Pa jino jashi palondejile jashi ja misambo ya mepuzho jaambile mulongo Mark Noumair mufunjishi wa mu Dipatimenti ya Sukulu wa Lesa. Wisambile na balongo basatu ne bakazhi babo ba Alex Reinmueller ne bakazhi babo ba Sarah, ba David Schafer ne babakazhi babo ba Krista, kabiji ba Robert Ciranko ne bakazhi babo ba Ketra. Mulongo Alex Reinmueller wa mu Kavoto Kasampanya Mabuku washimikizhe bukine byo bwamufikile pa muchima kimye kyo ajinga painiya mu kyalo kya Canada saka aji na myaka ya kusemwa 15, kabiji javula waingilangatu bunke. Byo bamushikishe wamutundaikile kuya ku Betele, Mulongo Reinmueller watongwele balongo basatu ba lwitabilo. Walondolwele bano balongo basatu byo bamukwashishe kukoma ku mupashi. Ba Sarah bakazhi ba uno mulongo baambile pa bulunda bwabo na nyenga umo mu kyalo kya China wachinchikile pa myaka yavula mu tuleya na mambo a lwitabilo lwanji. Nyenga Sarah waambile’mba wafunjile kuketekela mwi Yehoba kupichila mu lulombelo.

Mulongo David Schafer, nkwasho mu Kavoto ka Lufunjisho, watakaikile bingi bainanji na mambo a lwitabilo lwabo lwakosa kabiji watongwelepo ne balongo bamo baingilanga mwingilo wa kuvikaula myandalo bamukwashishe kwingilako bupainiya bwa kukwasha byo akijinga mwanyike. Mukazhanji aye Krista, naye washimikizhe byo atundaikilwe na ba mwingilo bakikulumpe ba pa Betele bajinga ‘bakishinka mu bicheche’ kwesakana na mwaambijile Yesu.—Luka 16:10.

Mulongo Robert Ciranko nkwasho mu Kavoto ka Kunemba washimikizhe pa bankana banji bana bafumine mu kyalo kya Hungary kabiji bena Kilishitu bashingwa. Byo akijinga mwanyike, watemenwe bingi byo atainwe ku kushonkena kwajingako mu 1950 po ayukile amba jibumba ja Yehoba jabaya bingi kechi balongo ne banyenga bonkatu ba mu kipwilo kyo ajingamo ne. Mukazhanji Ketra, washimikizhe byo afunjile kwikala wa kishinka byo aingijilenga bupainiya mu kipwilo mwajinga bantu bapondokele mu lwitabilo ne makatazhotu akwabo. Wachinchikile kabiji kulutwe na lwendo bamutongwele kwikala painiya wiikajila kabiji bamutumine kuya na kwingijila ku kipwilo kingi kya kwatankene bingi.

Ba Manfred Tonak baambile pa sawakya wa bibena kwenda mwingilo mu kyalo kya Ethiopia. Kino kyalo kyatongolwapo ne mu Baibolo kabiji luno kiji na basapwishi ba mambo awama 9,000. Bavula bekala mu muzhi mukatampe wa Addis Ababa nangwa pepi na uno muzhi. Onkao mambo, kubena kukebewa basapwishi ba kuya na kukwasha mu mapunzha a mwalepalepa. Bakamonyi ba mu Ethiopia bekala mu byalo bingi bebechile kubwela mu kyalo kyabo kuba’mba bakwashe kusapwila mu mapunzha amo amo a mwalepalepa. Bavula babwelele ne kutundaika Bakamonyi bakwabo kabiji bataine bantu bavula bingi baumvwinenga.

Jashi jimo jaletele bingi lusekelo jajinga ja kushilañana ja aambilenga pa Bakamonyi ba kwa Yehoba mu kyalo kya Russia byo babena kupita mu bije. Ba Aulis Bergdahl ba mu Kavoto ka Musampi mu Russia baambile pa lumanamo lubena kupitamo Bakamonyi mu Russia kikatakata mu muzhi wa Moscow. Ba Philip Brumley ba mu Kavoto Katala pa bya Mambo pa ofweshi wa musampi mu United States baambile pa kije kya European Court of Human Rights (ECHR) kyatajile pa mambo atanu na ana o balobejile Bakamonyi. Panyuma ya kutalapo bulongo pa ano mambo onse atanu na ana ne kupalanguzha bishinka byonse, kije kyaambile’mba, kechi pajipotu ne mambo antaka ne, kabiji kyalumbulwile ene mambo o kyakaine. Mulongo Brumley waambile’mba, byo bakitalatalapo pa ano mambo, twaketekela kuba’mba kino kije kikakwasha ne mu mambo a Bakamonyi baji mu byalo bikwabo.

Panyuma ya jino jashi ja lusekelo, Mulongo Lett wabijikile’mba kije kya ECHR kyaswa kutalapo pa mambo abanda a misonko ikatampe kafulumende wa kyalo kya France yo asonkesha Bakamonyi ba kwa Yehoba. Kino Kije kikatampe kechi kiswatu mambo onse o bekiletela ne. Kije kya ECHR kyatalapo pa mambo 39 a Bakamonyi ba kwa Yehoba, pa ano onse twabingako mambo 37, akwabo abiji bakitalapo. Mulongo Lett watundaikile bantu ba Lesa bonse kulombangapo kwi Yehoba pa ano mambo.

Mulongo Richard Morlan mufunjishi wa Sukulu wa Bakulumpe mu Kipwilo ye waambile sawakya wapeleleko. Waambile na lusekelo pa lusanchilo lwa bakulumpe mu bipwilo batainweko ku uno sukulu.

Majashi Akwabo Aambile ba mu Jibumba Jitangijila

Mulongo Guy Pierce wa mu Jibumba Jitangijila waambile jashi jafikile bavula pa muchima jaimenejile pa byambo bya kinembelo kya mwaka wa 2011 kya kuba’mba: ‘Ketekelai mu jizhina ja Yehoba.’ (Zefwa. 3:12) Mulongo waambile’mba nangwa kya kuba kino ke kimye kya lusekelo ku bantu ba Yehoba, bino kechi kya kuba mukose ne. Juba jikatampe ja Yehoba jafwenya kala pepi; nangwa byonkabyo, bantu bavula baketekela mu bupopweshi bwa bubela, mu bya bumulwila ntanda mu bunonshi, mu bya kutabataba bya mu buno bwikalo ne bikwabotu. Pa kuba’mba twikale na mwakufyama mwa kine kine, twafwainwa kwita pa jizhina ja Yehoba. Kino kilumbulula kunemeka ne kukinka manungo mu mwine Mwina jino jizhina kabiji ne kumutemwa na muchima yense.

Mulongo David Splane wa mu Jibumba Jitangijila waambile jashi jawama bingi jajinga na mutwe wa kuba’mba: “Nanchi mwatwela mwakukokolokela mwa Lesa Nyi?” Waambile’mba mwakukokolokela mwa Lesa kechi kilumbulula kwikalatu nzoo ne, mambo mu jino juba ja kukokoloka kwa kifwanyikizho, Yehoba ne Mwananji “bakingila” kuba’mba nkebelo ya Lesa yo alengejile bintu pano pa ntanda ikafike bulongo. (Yoa. 5:17) Pano twakonsha kutwela byepi mwakukokolokela mwa Lesa? Twakonsha kutwelamo umvwe ke tubule kulenga mambo ne kwingila mingilo ya kukeba kwitokesha atwe bene pa muchima. Twafwainwa kwikala na lwitabilo ne kulangulukanga pa nkebelo ya Lesa, kabiji ne kuba mingilo yonse yo twakonsha kuba ya kutundaika ino nkebelo. Kimye kimo kechi kyapela kuba bino ne, pano bino twafwainwa kumvwinanga lujimuno ne kulondela mikambizho ifuma ku jibumba ja Yehoba. Mulongo Splane wasashijile luonde kwingila papelela bulume bwabo kuba’mba batwele mwakukokolokela mwa Lesa.

Jashi ja kupezhako jaambile Mulongo Anthony Morris wa mu Jibumba Jitangijila jajinga na mutwe wa kuba’mba, “Tubena Kupembelela Ka?” Mulongo Morris waambile na kifyele kuvululamo luonde pa mambo a bungauzhi bukyangye kufika bo babena kupembelela bantu balwitabilo. Buno bungauzhi bwavwangamo ne bwa kuba’mba, “Mutende ne luzhikijilo!” kabiji ne bwa lonaiko lwa bupopweshi bwa bubela. (1 Tesa. 5:2, 3; Lum. 17:15-17) Mulongo Morris witujimwineko kuba’mba, umvwe twaumvwa masawakya a binkunka bibena kubula kufikizha buno bungauzhi kechi twafwainwa kwambanga’mba, “Kyamweka ano Amagedonyi” ne. Waambile’mba twafwainwa kwikala na muchima wa lusekelo ne wa kupembelela ye baambapo mu Mika 7:7. Kabiji watundaikile bonse kukwatankena pamo na Jibumba Jitangijila byonka byuba bashilikale pa kuya ku nkondo. Waambile’mba: “Kosai, michima yenu ichinchike, Anweba bonse mwamutengela Yehoba.”—Sala. 31:24.

Pa kupezhako, kwajinga bya kubijika byawama bingi. Mulongo Geoffrey Jackson wa mu Jibumba Jitangijila wabijikile’mba, kuji lunengezho lwa kulupula Kyamba kya Usopa mu Kizungu kyapela kumvwa. Kepo Mulongo Stephen Lett abijikile’mba Jibumba Jitangijila janengezha bakulumpe ba kuya na kupempula bakalama ba makambi ne bakazhi babo mu United States. Wanungilepo kuba’mba Sukulu wa Lufunjisho lwa Mwingilo pano utelwanga’mba Sukulu wa Baibolo wa Balongo Bakatanda. Kununga pa uno sukulu, kukekalanga ne Sukulu wa Baibolo wa Bena Kilishitu Baji mu Masongola. Uno sukulu ukafunjishanga baji mu masongola kuba’mba bekale bafikilamo bulongo kwingila mingilo ya mu jibumba ja Yehoba. Mulongo Lett naye wabijikile’mba kusa kwikalanga mabumba abiji abiji pa mwaka pa mwaka ku Patterson a Sukulu wa Bakulumpe Benda ne Bakazhi Babo ne Sukulu wa Baji mu Kavoto ka Musampi ne Bakazhi Babo, kabiji aba bapitamo kala mu uno sukulu nabo bebaswisha kutanwako ja bubiji.

Byambo bya kapela mpako byajinga mu lulombelo lwa kupezhako lwa panshi ya muchima lwalombele mulongo John E. Barr wa myaka 97 kabiji waingila myaka yavula mu Jibumba Jitangijila.b Byo bapalañenenga, bonse baitabizhenga mu michima yabo amba kine jino juba kechi tukejivulama ne.

[Tubyambo twa mushi]

[Mabulañano pa peja 19]

Misambo ya mepuzho yawamine bingi ku bonse bajinga mu luonde

[Mabulañano pa peja 20]

Yehoba wapesha bingi mwingilo wa kusapwila mu Ethiopia