Fundainga Mambo A Lesa

Kisemi Kyenu Kyakonsha Kwikala Byepi kya Lusekelo?

Mu kino kibaba muji mepuzho kampe o mwakipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu mikumbu ya ano mepuzho.

1. Mambo ka masongola a mu jifunde kyo aletela lusekelo mu kisemi kukila kwitolatu?

Yehoba Lesa wa lusekelo ye watendekeshe masongola. Aleta lusekelo mambo kechi alengatu bulunda ne, bino aleta ne mutende pa nzubo kuba’mba baana bakome bulongo. Lesa umona byepi masongola? Ukeba amba ekale a kikupu, a ba mulume ne mukazhi benembesha mwayila jifunde. (Luka 2:1-5) Lesa ukeba ba mulume ne mukazhi kwimwesha bukishinka. (Bahebelu 13:4) Yehoba waswishatu bena Kilishitu kwikana ne kusongola nangwa kusongolwa ku muntu mukwabo inge kya kuba’mba umo pe abo wauba bukende.—Tangai Mateo 19:3-6, 9.

2. Ba mulume ne mukazhi bafwainwa kwikalanga byepi?

Yehoba walengele banabalume ne banabakazhi kwikwasha mu masongola. (Ntendekelo 2:18) Mulume byo aji mutwe wa kisemi, wafwainwa kukebela ba mu nzubo yanji bikebewa ne kwibafunjisha pe Lesa. Wafwainwa kwipana kutemwa mukazhanji. Ba mulume ne mukazhi bafwainwa kwitemwa ne kwinemeka. Byo kiji kuba’mba ba mulume ne mukazhi bonse bambulwakulumbuluka, bafwainwa kufunda kwilekelangako mambo, pa kuba’mba bekale ba lusekelo mu masongola.—Tangai Efisesa 4:31, 32; 5:22-25, 33; 1 Petelo 3:7.

3. Umvwe kechi mwi balusekelo mu masongola enu ne, nanchi mwafwainwa kunyema mukwenu wa mu masongola nyi?

Umvwe anweba ne mukwenu wa mu masongola mubena kupita mu makatazho, fundai kwimweshanga butemwe. (1 Kolinda 13:4, 5) Mambo a Lesa kechi atundaika kwabana amba ko kupwisha makatazho mu masongola ne. Nangwa byonkabyo, inge bintu byakilamo kutama, mwina Kilishitu wakonsha kusalapo aye mwine kana kyawama kwabana nangwa ne.—Tangai 1 Kolinda 7:10-13.

4. Anweba baana, Lesa ukeba amba mwikalenga byepi?

Yehoba ukeba’mba mwikalenga balusekelo. Wimupa mafunde awama o mwakonsha kulondela pa kuba’mba mwikale balusekelo mu bwanyike bwenu. Ukeba’mba mumwenemo mu maana ne mu bintu byapitamo bansemi benu. (Kolose 3:20) Yehoba umvwa bingi bulongo inge ke mukokele bansemi benu.—Tangai Musapwishi 11:9–12:1; Mateo 19:13-15; 21:15, 16.

5. Anweba bansemi, mwafwainwa kuba byepi pa kuba’mba baana benu bekale balusekelo?

Mwafwainwa kwingilanga na ngovu kukebela baana benu kajo, mwa kulaala, ne bivwalo. (1 Timoti 5:8) Pano bino pa kuba’mba baana benu bekale balusekelo, mwafwainwa ne kwibafunjisha kutemwa Lesa ne kufunda kwi aye. (Efisesa 6:4) Umvwe mwaikala bakumwenako bawama mu kutemwa Lesa mwakonsha kukwasha baana benu nabo kutemwa Lesa. Umvwe mafunde enu keafume mu Mambo a Lesa, akonsha kukwasha baana benu kulanguluka pa bintu byawama.—Tangai Mpitulukilo ya mu mizhilo 6:4-7; Byambo bya Mana 22:6.

Baana bomvwa bingi bulongo inge mwibatundaika ne kwibatakaika. Kabiji bakeba kwibololako ne kwibajimuna. Kwibafunjisha mu jino jishinda kukebazhikijila ku byubilo byakonsha kwibapwishisha lusekelo. (Byambo bya Mana 22:15) Pano bino, pa kwibajimunako kechi mwafwainwa kwibashintaukilanga ne.—Tangai Kolose 3:21.

Bakamonyi ba kwa Yehoba banemba mabuku avula, kikatakata anembelwa kukwasha bansemi ne baana. Ano mabuku aimena pa Baibolo.—Tangai Salamo 19:7, 11.

Pa kuba’mba muyukileko byavula, monai kitango 14 kya uno buku wa Nanchi Baibolo Kine Ufunjisha’mba ka? wanembwa na Bakamonyi ba kwa Yehoba.