Fwenyai Kwipi na Umvwa Milombelo

BAVULA bamba’mba baitabila mwi Lesa bakankalwa kutongola bishinka paimena lwitabilo lwabo. Kabiji kechi bakonsha kulumbulula kyatamina bupopweshi nangwa Lesa kyo aswishisha buyanji ne. Balomba kwi Lesa ye babula ne kuyuka bulongo.

Bino mwakonsha kufwenya kwipi ne Lesa, kechi kupelelatu mu kuba bino ne. Mwakonsha kwikala na lwitabilo lwakonsha kwimulengela kumutemwa ne kumunemeka. Lwitabilo lwa kine lwaimena pa bishinka. (Bahebelu 11:1) Umvwe mwafunda bukine pe Lesa, mukamuyuka ne kwisamba nanji byonka byuba balunda na muntu. Monai byo kyajinga ku bamo balombanga bino saka bazhinauka Lesa kwikalako.

◼ Ba Patricia, batongolwa mu kibaba kitanshi. Baambile’mba: “Juba jimo najinga na bakwetu jikumi satwisamba pa bya bupopweshi. Nebabujile’mba nalupukile mu nzubo kimye batata bakananga’mba Lesa ufwako kyo besambilenga na Kamonyi wa kwa Yehoba waishile pa nzubo petu. Mukwetu umo waambile’mba, ‘Kyamweka Bakamonyi ba kwa Yehoba bamba bya kine.’

Mukwabo waambile’mba: “‘Tukaye na kupwila nabo pa kuba’mba tukemwene.’ Twayile na kupwila. Nangwa kya kuba twazhinaukilenga, atweba bamo twatwajijile kupwila mambo Bakamonyi betutambwilanga bulongo.

“Juba jimo pa Mulungu natelekele ku jashi jandengejile kupimpula bwikalo bwami. Ñambi walumbulwile ene mambo bantu o bayanjila. Kechi nayukile kuba’mba muntu mutanshi bamulengele walumbuluka kabiji ne kuba’mba muntu umo ye waletele bundengamambo ne lufu lwakumbana ku bantu bonse ne. Ñambi waambile ne ene mambo lufu lwa kwa Yesu kyo lwanemena pa kuba’mba bantu bakekale na bumi bwaelele muntu mutanshi.a (Loma 5:12, 18, 19) Bino byambo byamfikile bingi pa muchima. Nashiinwe kuba’mba, ‘Kya kine Lesa koaji wituta muchima.’ Natwajijile kufunda Baibolo, kabiji ne pa kimye kitanshi mu bumi bwami nalombele saka nashiinwa kuba’mba kine koaji.”

◼ Ba Allan batongolwa mu kibaba kitanshi baambile’mba: “Juba jimo Bakamonyi ba kwa Yehoba baishile pa nzubo petu. Bakazhi bami bebatambwijile ne kwibatwezha mu nzubo, mambo byambo byo basapwijilenga pa kwikala myaka ne myaka pano pa ntanda bibafikile pa muchima. Kechi nasekejilemo ne. Nafumine mu kibamba mwajinga benyi ne kwita benakwami ku kibamba kwakutekela, nekwibambila’mba, ‘Bya buleya byo! Bintu byo babena kwamba kechi bya kine ne.’

Benakwami bakumbwile’mba, “yainga mukebashiine’mba bya bubela.”

“Nakankelwe kwibashiina. Mambo bakokele bingi muchima, banshijile buku waamba pa bumi, kana bwaishilekotu bwine nyi, inyi kana kuji wibulengele. Bishinka byajinga mu yewa buku byaumvwanyikile kabiji nakebelenga kuyukilapo byavula pe Lesa. Natendekele kufunda Baibolo na Bakamonyi, kabiji naishile kuyuka kuba’mba byo yaamba byapusana bingi na byo nalangulukanga pa bupopweshi. Byo nafunjilenga pe Yehoba, byandengejile kutendeka kulomba kwi aye. Najinga na miteeto yatama, onkao mambo nalombele bukwasho. Neumvwa kuba’mba Yehoba ukumbula milombelo.”

◼ Ba Andrew bekala mu England baambile’mba: “Nangwa kya kuba natemenwe bya sayansi, naitabijile kuba’mba bumi bwaishilekotu bwine na mambo a kuba bantu bamo baambanga’mba kya kine. Nakaine kwitabila mwi Lesa mambo a bintu byatama bimweka.

“Kimye kimo nalangulukanga’mba: ‘Inge mwiulu muji Lesa, nakebanga kuyuka byo abena kuba. Mambo ka o kwavujila malwañano ne nkondo?’ Inge naikala na makatazho, nalombanga bukwasho, pano bino kechi nayukile ye naambanga nanji ne.

“Muntu umo wapele benakwami talakiti wa kuba’mba, Nanchi Ino Ntanda Ikapuluka Nyi? wanembwa na Bakamonyi ba kwa Yehoba. Nalangulukangapo bingi pa buno bonka bwipuzho. Uno talakiti wandengejile kutendeka kulanguluka pa Baibolo kuba’mba, ‘Nanchi mikumbu ijimo yanema kulangulukapo nyi?’ Palutwe kacheche, kimye kyo najinga pa kukokoloka, muntu umo wampele buku wa kuba’mba, The Bible—God’s Word or Man’s?b Byo nayukile kuba’mba Baibolo wakwatankana na sayansi, nakebele kufunjilapo byavula pa Baibolo. Kamonyi wa kwa Yehoba umo byo akebele’mba amfunjishenga Baibolo, naswile. “Byo naumvwishishe bikeba Yehoba, nayukile’mba koaji kya kine kabiji nafwainwa kukasuluka kwamba nanji mu milombelo.”

◼ Jan wakomejile mu bupopweshi bwa ba Protestant mu London. Waambile’mba: “Bukamfutumfutu bwa mu bupopweshi ne kuvula kwa buyanji kwandengejile kufuma mu bupopweshi. Nalekele sukulu mukatampe ne kutendeka kwimba kidali mwakumwena mali. Kino kyo kimye kyo nasambakene ne ba Pat. Bakomejile mu bupopweshi bwa Bakatolika kabiji balekele kuya ku chechi nobe amiwa.

“Twaikalanga mu nzubo mwabulanga kwikala bantu kala, pamo na bakwetu batemenwe bupopweshi bwa ku Musela pano bino nabo balekele kuyako. Twisambanga kufika ne pakachi ka bufuku pa ene mambo o twaikelako. Nangwa kya kuba Amiwa ne ba Pat kechi twaitabijile mwi Lesa ne, bino twayukile’mba kuji ‘upana bumi.’

“Byo twavilukijile ku kabeta ka buyeke bwa England na kukeba nkito ya bunyimbi, mwanetu wamulume wasemenwe. Juba jimo bufuku wakolelwe, kabiji nalombele kwi Lesa ye nabula kwitabila. Palutwe kacheche, bulunda bwetu ne ba Pat bwapwile kabiji nebashile ne kusenda mwana. Nalombele jibiji na kwandapo kuji ubena kumvwa. Kechi nayukile kuba’mba ba Pat nabo balombelenga ne.

“Jonkaja juba, Bakamonyi ba kwa Yehoba babiji bakonkonsheshe ku kinzhilo kya ba Pat ne kwibamwesha mafunde a mu Baibolo amo. Ba Pat bantumijile lamya ne kungipuzha inge nakonsha kutemwa kufunda Baibolo na Bakamonyi ba kwa Yehoba. Twafunjile’mba pa kuba’mba tusangajike Lesa twafwainwa kunembesha masongola etu ku kafulumende. Kyamwekele kukatazha mambo twikatazhanga bingi mu masongola etu.

“Twakebelenga kuyuka byavula pa kufika kwa bungauzhi bwa mu Baibolo, kyo tuyanjila ne pa Bufumu bwa Lesa byo bulumbulula. Kyapeleleko, twaishile kuyuka’mba Lesa wituta muchima kabiji twakebelenga kuba byo akeba. Twisongwele. Maana a mu Mambo a Lesa etukwasha kukomesha bulongo baana betu basatu. Tuji na luketekelo lwa kuba’mba, Yehoba umvwa milombelo yetu.”

Pesapesai Bishinka Anweba Bene

Byonka byo kiji ku bantu bavula, bantu batongolwa mu kino kibaba kechi bebaluwikile ku bupopweshi bwa bubela ne, kabiji beumvwijile ene mambo Lesa o aswishisha buyanji. Nanchi mwamona kuba’mba kufunda bukine bwa mu Baibolo ko kwibalengejile bano bonse kushiinwa kuba’mba kya kine Yehoba umvwa milombelo nyi?

Nanchi mwakonsha kukeba kwipeselapesela bishinka bimwesha kuba’mba Lesa koaji nyi? Bakamonyi ba kwa Yehoba bakatemwa bingi kwimukwasha kufunda bukine pe Yehoba ne byo mwakonsha kufwenya kwipi ne aye ‘Umvwa milombelo.’—Salamo 65:2.

[Tubyambo twa mushi]

[Mabulañano pa peja 10]

“Byo naumvwishishe bikeba Yehoba, nayukile’mba kya kine koaji kabiji nafwainwa kukasuluka kwamba nanji mu milombelo”

[Kipikichala pa peja 9]

Lwitabilo lwa kine lwaimena pa bishinka ne pa kukeba kuyuka bukine pe Lesa