Lekai Yehoba Emutangijilenga Ku Bwana Bwa Bene Bwa Kine

“[Tajijishainga] mu mizhilo yalumbuluka ya bwana bwa bene.”—YAKO. 1:25.

MWAKONSHA KULUMBULULA NYI?

Ñanyi muzhilo ulengela kwikala na bwana bwa bene, kabiji bañanyi bamwenamo mu uno muzhilo?

Ñanyi kintu kilengela kwikala na bwana bwa bene bwa kine?

Ñanyi bwana bwa bene bubena kupembelela boba baji mu jishinda ja ku bumi?

1, 2. (a) Ki ka kibena kumweka ku bwana bwa bene buji mu ntanda, kabiji mambo ka? (b) Kulutwe kuji ñanyi bwana bwa bene bubena kupembelela bakalume ba Yehoba?

TUBENA kwikala mu kimye kyavula byubilo bya lunkumbwa, bumpupabizhila ne malwañano mu ntanda. (2 Timo. 3:1-5) Kino kyalengela makafulumende kulenga mizhilo, kuvuzha bakapokola ne kulenga biñambañamba bya kumwenako bibena kuba bantu. Mu byalo bimo, pa kuba’mba bevimbile, bantu babika ngengele ya kwibajimunako mu mazubo abo, maloko avula a kushinkilako binzhilo kabiji ku mazubo abo bazhokoloshako lupango wa malaichi. Bavula bakana kulupuka pangye bufuku nangwa kukanya baana babo kukayila pangye bunke bwabo. Kino kyamweshatu patoka kuba’mba bantu kechi bakasuluka ne, kabiji kibena kumweka nobe bikatwajijila.

² Kala mu bujimi bwa Edena, Satana waambile’mba kintu kyakonsha kulengela muntu kwikala na bwana bwa bene bwa kine ke kwitolwela kufuma kwi Yehoba. Buno bwajinga bubela bwafitatu bwii! Mambo bantu byo babena kulengulula mizhilo yabikako Lesa, buyanji po po bubena kubayilako. Ne atweba bakalume ba Yehoba tubena kumanama na mambo a buno bwikalo bwatama. Nangwa byonkabyo, tuji na luketekelo lwa kumona mpelo ya bundengamambo ne bubole bwanonka bantu buzha kabiji ne kwiyowa kintu kitelwa mu Baibolo amba “bwana bwa bene bwa lukumo lwa baana ba Lesa.” (Loma 8:21) Yehoba watendeka ne kala kunengezhezha bakalume banji buno bwana bwa bene. Mu ñanyi jishinda?

3. Ñanyi muzhilo Yehoba ye apa baana ba bwanga ba kwa Kilishitu, kabiji ñanyi mepuzho o tusakwisambapo?

³ Mukumbu waimena pa kyatongwele nembi wa Baibolo Yakoba amba “mizhilo yalumbuluka, ya bwana bwa bene.” (Tangai Yakoba 1:25.) Javula bantu besakanya muzhilo ku bizhila, kechi ku kukasuluka ne. Pano nga ‘muzhilo walumbuluka wa bwana bwa bene’ ye mu ka? Kabiji uno muzhilo witulengela byepi kwikala bakasuluka?

MUZHILO WITULENGELA KWIKALA BAANA BA BENE

4. Nga ‘muzhilo walumbuluka wa bwana bwa bene’ ye mu ka, kabiji bañanyi bamwenamo?

⁴ ‘Muzhilo walumbuluka wa bwana bwa bene’ kechi yo Mizhilo ya Mosesa ne, mambo aya mizhilo yalengejile mizhilulwila kusoloka kabiji yafikile kupichila mwi Kilishitu. (Mat. 5:17; Nga. 3:19) Pano ñanyi muzhilo waambilengapo Yakoba? Muzhilo wajinga ne Yakoba mu milanguluko ke “muzhilo wa Kilishitu,” kabiji utelwa’mba “muzhilo wa lwitabilo,” ne “muzhilo wa baana ba bene.” (Nga. 6:2; Loma 3:27; Yako. 2:12) Onkao mambo, “muzhilo walumbuluka,” wavwangamo byonse bitukebela Yehoba kuba. Bonsetu pamo, bena Kilishitu bashingwa ne “mikooko ikwabo” bamwenamo mu uno muzhilo.—Yoa. 10:16.

5. Mambo ka muzhilo wa bwana bwa bene o abujila kukatazha?

⁵ Kupusanako na mizhilo ya byalo byavula, ‘muzhilo walumbuluka’ kechi wakobankana nangwa kukatazha ne, aye ujitu na mikambizho yapela ne mafunde awama. (1 Yoa. 5:3) Yesu waambile’mba: “Kikonkoji kyami kyapela ne byo nemwambila kusenda kechi byakatazha ne.” (Mat. 11:29, 30) Kunungapo, “muzhilo walumbuluka” kechi uji na mizhilo yavula ne. Mambo aye waimena pa butemwe kabiji wanembwa mu michima ya bantu kechi pa mabwe apapakana ne.—Tangai Bahebelu 8:6, 10.

‘MUZHILO WALUMBULUKA’ BYO ETUKASULULA

6, 7. Twakonsha kwamba’mba ka pa mambo a mizhilo ya Yehoba, kabiji mambo ka muzhilo wa bwana bwa bene o etukasulwila?

⁶ Mizhilo Yehoba yo apana ku bilengwa byanji bya maana ikwashañana ne kuzhikijila. Kyakumwenako, akilangulukai pa mizhilo ilengela bilengwa na Lesa kwingila monka mo ebilengejile. Bantu kechi bejizhanya amba ino mizhilo ibamanyika ne. Mu kifulo kya kuba bino, basanta ne kuyuka amba ino mizhilo ibakwasha. Kyo kimotu, mizhilo ya Yehoba ya ku mupashi ne ya byubilo byawama bimwekela mu ‘muzhilo walumbuluka’ wa Kilishitu, byaikelako kukwasha bantu.

⁷ Kununga pa kwituzhikijila, muzhilo wa bwana bwa bene witulengela kwikusha michima yetu na byonse byo tukeba kwa kubula kwitwezha mu malwa nangwa kulengulula lūsa lwa bakwetu lwa bwana bwa bene ne. Onkao mambo, twakasuluka kuba byo tukeba, kikulutu byawama kabiji byayilamo na bikeba Yehoba ne mizhilo yanji. Mu jishinda jikwabo, twakonsha kwamba’mba twafwainwa kufunda kutemwa bintu byatemwa Yehoba ne kushikwa bintu byo ashikwa, muzhilo wa bwana bwa bene ye witukwasha kuba bino.—Amo. 5:15.

8, 9. Aba balondela muzhilo wa bwana bwa bene bamwenamo ka? Ambai kyakumwenako.

⁸ Byo tuji bambulwakulumbuluka, kikatazha bingi kufumya milanguluko yatama mukachi ketu. Nangwa byonkabyo, byo tukokela muzhilo wa bwana bwa bene, twimwena atweba bene uno muzhilo byo etukasulula. Kyakumwenako: Mwanamulume wafunjilenga Baibolo wa jizhina ja Jay, wafulululanga bingi fwanka. Byo afunjile kuba’mba kino kyubilo kifichisha Lesa ku muchima, wafwainwe kufuukulapo bya kuba. Abya wafwainwe kutwajijila kunonkwa buzha ku fwanka nyi, inyi kukokela Yehoba? Wasajilepo kwingijila Lesa nangwa kya kuba bwando bwa fwanka bwamukatezhenga mu mubiji. Pano washinjile byepi kino kyubilo? Waambile’mba, “nakasulukile ne kwikala na lusekelo.”

⁹ Jay wafunjijile ku byo apichilemo kuba’mba bwana bwa bene bwa mu ntanda bulengela bantu “kuta muchima ku bintu bya buntunshi” bwibanonka buzha, pakuba bwana bwa bene bwitupa Yehoba bulumbulula “kuta muchima ku bintu bya mupashi,” bukasulula ne kuleta “bumi ne mutende.” (Loma 8:5, 6) Nga Jay wataine kwepi bulume bwa kushinda uno muteeto wanji wamunonkele buzha? Bwafumine kwi Lesa. Aye waambile’mba: “Nafundanga Baibolo kimye kyonse ne kulomba mupashi wazhila kabiji natambwilanga bukwasho bwafumanga ku balongo ne banyenga mu kipwilo kya bwina Kilishitu.” Bino bintu byo byakonsha kwitukwasha ne atweba bonse kwikala na bwana bwa bene bwa kine. Twayai tumone byo twafwainwa kuba bino.

TAJIJISHAINGA MU MAMBO A LESA

10. ‘Kutajijisha’ mu mizhilo ya Lesa kulumbulula ka?

¹⁰ Mu Yakoba 1:25 tutangamo’mba: “Awa utajijisha mu mizhilo yalumbuluka ya bwana bwa bene ne kutwajijila kwiilondela . . . ukekala na lusekelo pa kwiyuba.” Kyambo kya Kingiliki kyatuntululwa’mba “tajijisha” kilumbulula “kubandama pa kuba’mba umweshe kintu pa bwipi,” kabiji kuba bino kukebewa kutapo muchima. Inge tukeba muzhilo wa bwana bwa bene kwikala mu muchima ne mu milanguluko yetu, twafwainwa kufundanga Baibolo kimye kyonse ne kulanguluka pa byo tufunda.—1 Timo. 4:15.

11, 12. (a) Yesu waambile pa ñanyi kintu kimwesha’mba twalenga bukine kwikala ke bwetu? (b) Byonka byo baambapo peulu po, ñanyi kizumba kikatakata bakyanyike kyo bafwainwa kuchinuzhuka?

¹¹ Kabiji twafwainwa ne “kutwajijila” kwingijisha Mambo a Lesa, ko kuba’mba kulenga bukine kwikala ke bwetu. Yesu waambile byambo bipashako kimye kyo aambijile boba bamwitabijile kuba’mba: “Umvwe saka mulama byambo byami, mukekala baana bami ba bwanga, kabiji mukayuka bukine, ne bukine bukemukasulula.” (Yoa. 8:31, 32) Twakonsha kwamba’mba twayuka bulongo bukine inge twalenga bukine kwikala ke bwetu. Kepo “mambo a Lesa” ‘akengilanga’ mwi atweba. Aketukwasha kutwajijila kupimpulako byubilo byetu kuba’mba tulondelenga bulongo Shetu wa mwiulu.—1 Tesa. 2:13.

¹² Iipuzhai kuba’mba: ‘Nanchi kya kine nayuka bukine nyi? Abya naalula bukine kwikala ke bwami nyi? Inyi nkikeba kwiyowa “bwana bwa bene” bwa mu ino ntanda?’ Nyenga umo wakomejile mu kisemi kya bena Kilishitu uvuluka byo akijinga mwanyike, wanembele’mba: “Inge wakomena mu bukine uyukatu kuba’mba Yehoba koaji. Pano bino, amiwa kechi namuyukile bulongo ne. Kechi nafunjile kushikwa byo ashikwa ne. Kabiji kechi nayukile’mba byo naubanga byamufichishanga ku muchima ne. Kechi nalombanga kwi aye inge nji na lukatazho ne. Kabiji natele muchima ku milangwe yami amiwa mwine, yo natana kuba’mba bwajinga bumbulwa maana mambo kafwako kyo nayukile ne.” Kyawamakotu ke kya kuba’mba uno nyenga waishile kuyuka amba milanguluko yanji yatamine kabiji wapimpwile bwikalo bwanji. Kabiji watendekele ne kwingila bupainiya bwa kimye kyonse.

MUPASHI WAZHILA WAKONSHA KWIMUKASULULA

13. Mu ñanyi jishinda mupashi wazhila wa Lesa mo etukasulwila?

¹³ Mu 2 Kolinda 3:17 tutangamo amba: “Paji mupashi wa Yehoba po paji ne bwana bwa bene.” Nga mupashi wazhila witukwasha byepi kwikala na bwana bwa bene? Uno mupashi witulengela kwikala na byubilo bitulengela kwikala bakasuluka, nabiji—“butemwe, lusekelo, mutende, kubula kuzhingila bukiji, lusa, buwame, lwitabilo, kukoka muchima ne kwikanya.” (Nga. 5:22, 23) Kwa kubula bino byubilo, kikatakata butemwe, kafwako bantu bakonsha kukasuluka mu ino ntanda ne. Panyuma ya kuba watongaula bipangwa bya mupashi, mutumwa Paulo wanungilepo amba: “Ku bintu bya yenka uno mutundu kechi kuji muzhilo ne.” Watazhizhe mwepi? Bipangwa bya mupashi wa Lesa kechi bebinyanchijila ku mizhilo ikwabo yakonsha kwibilengela kubula kukoma ne. (Nga. 5:18) Yehoba ukeba amba tutwajijile kumwesha bino byubilo byajingapo ne Kilishitu myaka ne myaka.

14. Mu ñanyi jishinda mupashi wa ino ntanda moanonkela buzha boba bamukokela?

¹⁴ Aba bakokela mupashi wa ino ntanda ne kuba bisaka mibiji yabo bakonsha kulanguluka’mba bakasuluka. (Tangai 2 Petelo 2:18, 19.) Pano bino, kechi bayuka’mba banonkwa buzha ne. Makafulumende afwainwa kulenga mizhilo yavula pa kuba’mba ilengele bantu kwikala na byubilo byawama. Paulo waambile’mba: “Mizhilo kechi yaikelako muntu waoloka ne, bino yaikelako na mambo a bampupabizhila, bansatuki.” (1 Timo. 1:9, 10) Kabiji bazha ba bundengamambo, mambo boba “bintu bikeba mubiji,” ao waikala nkambo yabo wakanama. (Efi. 2:1-3) Mu jino jishinda, bauba nobe mpemvu yaponena pa maalwa na mambo a kukeba kuja. Na mambo a bya kusaka saka betaya bene mu makatazho.—Yako. 1:14, 15.

BWANA BWA BENE MU KIPWILO KYA BENA KILISHITU

15, 16. Mu ñanyi jishinda kupwanañena pamo na kipwilo mo kwanemena, kabiji twiyowa ñanyi bwana bwa bene?

¹⁵ Kimye kyo mwatendekele kupwanañana na kipwilo kya bena Kilishitu, kechi mwanembele nkalata ya kwipuzha’mba mwikale wa mu kipwilo ne. Pakuba mwaishile mu kipwilo mambo Yehoba ye wimwichile. (Yoa. 6:44) Ki ka kyalengejile kuba’mba emwite? Nanchi Lesa wamwene’mba mwaoloka kabiji mumwakamwa nyi? Mwakonsha kwamba’mba: “Ine!” Pano nanchi Lesa wamwenemo ka mwi anweba? Wamwene muchima wa lukokelo ku muzhilo wanji wa bwana bwa bene, muchima unekenena byo akeba. Byo mwaiya mu kipwilo, Yehoba wakomesha muchima wenu kupichila mu kwimujisha kajo ka ku mupashi, kwimufumya mu mafunjisho a bubela a bupopweshi ne kupopwela bankishi, ne kwimufunjisha kwikala na byubilo byawama bya Kilishitu. (Tangai Efisesa 4:22-24.) Na mambo a kino, muji na jishuko ja kwikala pa bantu baji mu ntanda batelwatu bunke’mba “baana ba bene.”—Yako. 2:12.

¹⁶ Akilangulukai pa kino: Abya mumvwa moyo umvwe muji pa bantu batemwa Yehoba na muchima wabo yense nyi? Nanchi muba saka mwikembawilatu nyi? Inge mubena kwisamba na bakwenu pa Nzubo ya Bufumu, nanchi mwakamwa’mba basa kwimwibila bintu byenu nyi? Ine! Mwikala bakasuluka. Abya byo byo mwakonsha kukasuluka umvwe muji na bantu babula bena Kilishitu nyi? Ine! Bwana bwa bene bo mwiyowa mu bantu ba Lesa ano moba bubena kumweshatu bwana bwa bene bo mukeyowa kulutwe na lwendo.

“BWANA BWA BENE BWA LUKUMO LWA BAANA BA LESA”

17. Mu ñanyi jishinda bwana bwa bene mo bwakwatankena na “kusololwa kwa baana ba Lesa”?

¹⁷ Pa kwamba pa bwana bwa bene Yehoba bo alamina bakalume banji bekala pano pa ntanda, Paulo wanembele’mba: “Bilengwa bibena kutengela na muchima yense kusololwa kwa baana ba Lesa.” Kepo anungilepo amba: “Bilengwa bikapokololwe ku buzha bwa bubole ne kwikala na bwana bwa bene bwa lukumo lwa baana ba Lesa.” (Loma 8:19-21) “Bilengwa” bilumbulula bantu baji na luketekelo lwa kwikala pano pa ntanda, abo bakamwenamo mu “kusololwa” kwa baana ba Lesa bashingwa na mupashi. Kuno kusololwa kukatendeka kimye bano “baana,” kyo bakasangulwa ne kwikala bilengwa bya mupashi, ne kwingijila pamo ne Kilishitu kufumyapo bintu byatama pano pa ntanda, kabiji ne kulama “jibumba jikatampe” mu ntanda ipya.—Lum. 7:9, 14.

18. Nga bwana bwa bene bukayanga byepi na kubaya ku bantu ba lukokelo, kabiji bakeyowa ñanyi bwana bwa bene kulutwe na lwendo?

¹⁸ Bantu bakakuulwa bakekala na bwana bwa bene bwa kine bwa kukasuluka kwi Satana ne bandemona banji. (Lum. 20:1-3) Kuno kukekala kukasuluka kwa kine. Panyuma ya bino, ba 144,000, bañanga ne bamfumu bakalama pamo ne Kilishitu bakatwajijila kwingijisha kitapisho kya bukuzhi kukuula bantu kufika kimye bundengamambo ne bumbulwakulumbuluka bwa kwa Adama kyo bukapwa. (Lum. 5:9, 10) Byo bajinga bakishinka mu kimye kya meseko, bantu bakekala na bwana bwa bene bwalumbuluka Yehoba bo akebelenga pa kutendeka, ko kuba’mba, “bwana bwa bene bwa lukumo lwa baana ba Lesa.” Akilangulukaipotu! Kechi kikemukatazhanga kuba bikeba Lesa ne, mambo mukekala balumbuluka kabiji mukalondelangatu suka byubilo bya Lesa.

19. Pa kuba’mba tutwajijile kwikala mu jishinda ja bwana bwa bene bwa kine, ki ka kyo twafwainwa kuba lelo jino?

¹⁹ Abya mubena kutengela “bwana bwa bene bwa lukumo lwa baana ba Lesa” nyi? Umvwe ibyo, twajijilai kulondela ‘muzhilo walumbuluka wa bwana bwa bene.’ Mwafwainwa kuba bino kupichila mu kufunda Binembelo na mukoyo. Ikelainga mwayila bukine bo mwafunda. Lombainga mupashi wazhila. Tanwainga ku kupwila kwa bwina Kilishitu ne kumwenamo mu kajo ka ku mupashi kanengezha Yehoba. Kange muleke Satana kwimujimbaika byonka byo ajimbaikile Evwa kupichila mu kulanguluka’mba mizhilo ya Lesa yakatazha kulondela ne. Pano bino, Diabola wajimuka bingi. Nangwa byonkabyo, kwesakana na byo tukafunda mu mutwe walondelapo, kechi uketushinda ne, “mambo kechi twaluba bya bujimuku byanji ne.”—2 Ko. 2:11.

[Bipikichala pa peja 9]

Nanchi nkikeba kwiyowa “bwana bwa bene” bwa mu ino ntanda nyi?

[Bipikichala pa peja 9]

Abya naalula bukine kwikala ke bwami nyi?