Pano Namuyuka Lesa Ye Mpopwela

BYASHIMIKIZHA BA MARIETA MANUEL BACUDIO

Musapwishi wa mu chechi wa mu Pentecost wayishile ye baambanga’mba uji na bulume bwa kubuka. Byo ankwachile naponene panshi kilafungo amba “mupashi wangikijila.” Byo nabukilepo naumvwine kuba’mba njina bulume bwakubuka bonakebelenga. Ki ka kyandengejile kutanwa mu bino, kabiji byakunzhile byepi bwikalo bwami? Nsakyangye kwimubula byo kyajinga, nkilumbulule byo nakomene.

NASEMENWE mu muzhi wa Ilocos Norte, mu Philippines, pa December 10, mu 1968, ne mwana wa butanu na bubiji pa baana jikumi. Byonka biji bena Philippines bavula, twakomejile mu chechi ya Bakatolika. Napwishishe sukulu mu 1986 kabiji nakebeshanga bingi kwikala manase. Nangwa byonkabyo, kechi naikajile manase ne, mambo naishile kukolwa kikola kikatampe. Nalangulukilenga’mba nsa kufwa. Na mambo a kwakamwa nalombele bukwasho kwi Lesa ne kumubula’mba inge nakosa, nkamwingijilanga mu bumi bwami bonse.

Byo nakosele navulukile byo nalayile Lesa. Mu June mu 1991 nayile ku sukulu wa kufunda Baibolo wa ba Pentecost. Uno sukulu watundaikanga “kwikala na mupashi wazhila.” Nakebeshanga kwikala na bulume bwa kubuka. Ku sukulu betubulanga’mba kuzhikilwa na nzala ne kulomba ko kulengela kwikala na buno bulume. Juba jimo na mambo a kukeba kuba’mba bantu bayuke’mba nji na mupashi, nayile na kuteleka ku byalombelenga mukwetu. Byo ajinga pepi kupwisha kulomba nabwelele po nafukamine na kulomba. Panyuma ya kulomba namubujile byonse byo alombelenga, washiinwe kuba’mba nji na “mupashi.”

Kimye kyo najinga pa sukulu, najinga na mepuzho avula bingi. Nabiji pa Mateo 6:9 paji byambo bya kuba’mba “Tata” ne “jizhina.” Pa bino byambo naipuzhanga mepuzho nabiji akuba’mba: “Ñanyi shanji Yesu ye atongwele?” kabiji “Jizhina ja kwa ñanyi jafwainwa kuzhila.” Byakumbulanga bafunjishi betu kechi byaumvwanyikanga ne. Baambanga’mba Lesa uji mu Balesa Basatu botwakonsha kubula kuyukisha bulongo. Kechi natondwanga na byo baambanga ne. Nangwa byonkabyo, natwajijile kufunda bupashita.

Kwisamba na Bakamonyi ba kwa Yehoba

Mu uno sukulu wa Baibolo betufunjishanga’mba Bakamonyi ba kwa Yehoba ke bupopweshi bwa bubela bwatama bingi. Bebatongolanga’mba bo bakana’mba Kilishitu ufwako. Bino byandengejile kwibashikwa bingi.

Mu mwaka wa bubiji pa uno sukulu, nayile na kupempula bansemi. Bakolojami babakazhi ba Carmen byo baumvwine’mba naiya ku nzubo nabo baishile. Bajinga Bakamonyi ba kwa Yehoba babatizhiwa bajinga mu mwingilo wa kimye kyonse. Byo baesekele’mba besambe ne amiwa pe Lesa nakumbwile na bukaji amba: “Nayuka Lesa ye mpopwela.” Panyuma ya kwibatuka, ne bashinjikile kabiji kechi babwezhezhepo jibiji kwamba pe Lesa ne amiwa ne.

Byo nabwelele ku sukulu ba Carmen bantumijile buloshuwa wa kuba’mba; Should You Believe in the Trinity?a Namuvungakenye ne kumutaya mu mujilo. Nazhingijile bingi.

Naikele Pashita

Byo natwajijile kufunda pa uno sukulu wa Baibolo, naikele na baana ba bwanga. Natemenwe bingi mambo ne bamama ne nkasami baishile mu Pentecost.

Mu March mu 1994, napwishishe uno Sukulu wa Baibolo wa ba Pentecost. Byonka byonaji kwamba kuntendekelo, kwaishile musapwishi wa ba Pentecost. Bonse bapwishishe sukulu bakebelenga kumonañana nanji mambo twaitabijile’mba ye upana bulume bwa kubuka. Bonse twayile pa mutuntamo, saka tubena kukilauka na kuzha ne kupopwela bijimba saka bibena kujila. Bonse bo akwachile baponenenga panshi amba “mupashi wibekijila.”b Byo ankwachile, ne amiwa naponene ne kupungila. Byo napapukile, naumvwine bingi moyo, bino naumvwine kuba’mba nji na mupashi wa kubuka, pa kuyuka bino natemenwe bingi.

Byo papichile moba, ne amiwa nabukile mwanyike wakolelwe kikola kya mashika. Byo nalombele, ponkapotu uno mwana mashika apwile. Namwene kuba’mba nafikizha kyo nalayile Lesa. Nangwa byonkabyo, kechi najinga na lusekelo ne. Mu muchima naitabijile kuba’mba kujitu Lesa umo, bino kechi namuyukile ne. Nazhinaukanga mafunjisho avula a mu chechi.

Bintu Byapimpwile Ndangulukilo Yami

Panyuma ya bino byonse, nakijilemo ne kushikwa Bakamonyi ba kwa Yehoba. Inge natana buku wa Bakamonyi namusokanga. Juba jimo kwamwekele kintu kimo kyo nabujile kuketekela. Nakuminye bingi pa kumvwa’mba Bamama baleka kuya ku chechi yetu. Ba Carmen bo bafunjishenga bamama Baibolo. Ne bazhingijile bingi bayaya.

Mu kuya kwa moba nataine magazini wa Awake! mu nzubo mwa Bamama. Javula neasokanga. Pano na mambo a kukeba kuyuka byo batanganga, nazhikwilenga mapa kya bukiji bukiji. Meso ayile pa mutwe wa jishimikila ja muntu wajinga na lwitabilo lwakosa mu mafunjisho a mu chechi. Bino byo atendekele kutanga mabuku a Bakamonyi ba kwa Yehoba ne Baibolo, washiinwe kuba’mba lufunjisho lwa Balesa Basatu, mujilo wa helo, ne lwa kuba’mba mweo kechi ufwa ne, kechi lwa mu binembelo ne. Ne amiwa bino byamfikile pa muchima. Bino byo bintu byo nakebelenga kumvwisha. Kufumatu popo, nakebeshanga bingi kufunda bukine bwa mu Baibolo.

Panyuma ya kutanga jishimikila jikwabo mu magazini wa Awake! ja watomanga bingi maalwa ye batekele buzha ku bizhima wayishile kwikala na byubilo byawama byo atendekele kufunda Baibolo na Bakamonyi ba kwa Yehoba, ne amiwa natendekele kutanga mabuku a Bakamonyi. Nataine buloshuwa wa kuba’mba: The Divine Name That Will Endure Forever.c Byo namutangile, naishile kuyuka kuba’mba Lesa jizhina janji Yehoba. Naumvwine bingi bulongo pa kuyuka bukine pe Lesa yenka wa kine!—Mpitulukilo ya mu mizhilo 4:39; Yelemiya 10:10.

Natanganga mu bufyamfya kabiji nafunjile bukine bwa mu Baibolo bwavula bingi. Nabiji pe Yesu, ku sukulu wa ba Pentecost twafunjile kuba’mba Yesu Lesa, pano naishile kuyuka kuba’mba Baibolo wamba’mba,“Mwana Lesa mumi.”—Mateo 16:15, 16.

Muchima wa Alukile

Byo namonañene ne ba Carmen, bakuminye bingi byo ne balombele buku wa The Divine Name That Will Endure Forever ne mabuku akwabo. Nafunjile mu sukulu wa Baibolo pa myaka yavula, bino kechi bamfunjishe bukine ne, banduwikilengatu. Byo nayukile bukine bwa mu Baibolo popo naikele na lusekelo. Naishile kumvwisha mwatala byambo byaambile Yesu bya kuba’mba, “mukayuka bukine, ne bukine bukemukasulula.” (Yoano 8:32) Bukine bwatendekele kupimpula bwikalo bwami.

Nalangulukilenga’mba nakonsha kupopwelanga Yehoba Lesa mu bufyamfya saka natwajijila na mwingilo wa bupashita. Kyapeleleko namwene kuba’mba kechi nakonsheshenga kufunjisha mafunjisho a mu chechi ne. Nangwa byonkabyo, najinga bingi na moyo. Nalangulukanga’mba, nkamwenanga mu ka inge naleka mwingilo wa bupashita? Ba mu chechi bakomvwa bingi bumvu inge pashita wabo waikala Kamonyi wa kwa Yehoba. Kyo kyo natwajijile kwikala pashita, pano bino pa kufunjisha kechi nafunjishanga mwayila mafunjisho a mu chechi ne.

Byo twamonañene jibiji ne bayaya ba Carmen, bañambijile kuba’mba nkatanwe ku kupwila kwa Bakamonyi ba kwa Yehoba. Na mambo a kuba’mba natwalanga masawakya a chechi mu Muzhi wa Laoag, konkakwa nayile na kupwila na Bakamonyi ba kwa Yehoba mu bufyamfya pa Nzubo ya Bufumu. Naishile kwiyuka ne Alma Preciosa Villarin ye baitanga’mba “Precious” wa mwingilo wa kimye kyonse mu kyokya kipwilo. Nangwa kya kuba kechi natemenwe Bakamonyi ne, naswile kumfunjisha Baibolo.

Bayaya bantekenyanga bingi pa kumfunjisha Baibolo. Byonka byantekenyanga bayaya byo byaubanga ne ba Precious. Bankwashishe kumvwisha Baibolo nangwa kya kuba kimye kimo kyankolanga ku muchima ne kwipachika nabo, kabiji kimye kimo nazazukanga pa kwamba pa bintu byonafunjile ku chechi kwetu. Kunta muchima, kwipelula kwabo ne kukoka muchima kwa ba Precious ne bakwabo Bakamonyi kwamfikile bingi pa muchima. Bino byo byandengejile kukebesha kwingijila Yehoba.

Mu July mu 1995, namwene’mba pa kuba’mba ntokeshe Lesa ku muchima nafwainwa kuleka bupashita. Mambo ka? Kinembelo kya Lumwekesho 18:4 kyaamba pa bupopweshi bwa bubela mu bukifwanyikizho amba: “Anweba bantu bami, lupukaimo mwi aye, umvwe kechi mukeba kwivwangamo mu bundengamambo bwanji nangwa umvwe kechi mukeba kupitamo mu binkunka byanji ne.” Pano ibyepi pa mwakumwena mali mu bwikalo? Kinembelo kya Bahebelu 13:5 kyamfunjishe kuba’mba inge ketube kyaswa muchima wa Lesa aye walaya amba: “Kechi nkakusha nangwa kukulekelela ne.”

Nangwa kya kuba batata ne bakolojami babalume bankainyenga, byokwashajile milungu ibiji kubatizhiwa ne kwikala Kamonyi wa kwa Yehoba, pa kubwela ku nzubo nasokele byonse byo naingijishanga mu bupashita. Panyuma ya kuba bino, bulume bwa kubuka bwapwile. Kala inge nalaala naumvwanga nobe paji kyangikala. Kumvwa bino nako kwapwile. Milevulevu yo namonanga pa kipenze nayo yalekele kumweka. Kufunda Baibolo kwandengejile kuyuka’mba bulume bwa kubuka kechi bufuma kwi Lesa ne, bufuma ku bandemona. Nji bingi na lusekelo mambo nakasuluka ku buzha bwa bandemona, byonkatu byo kyajinga ku kamwale ‘wajinga na ndemona waambilanga jimo bikamweka kulutwe’ ye bapangilemo kwi Paulo ne Banabasa.—Byubilo 16:16-18.

Kyandetejile bingi lusekelo byo twabatizhiwe juba jimo ne Bamama ne kwikala Bakamonyi ba kwa Yehoba mu September 1996. Byo nabatizhiwe, natwelele mu mwingilo wa kimye kyonse wa Bakamonyi ba kwa Yehoba, naingila myaka yavula, kufika ne buji lelo.

Nasongolwa, bamwatawami ba Silver. Tubena kwibikako bingi kufunjisha mwanetu wamukazhi bukine bwa mu Baibolo. Bakolojami ne nkasami wamukazhi nabo twingijila pamo Yehoba. Nangwa nelangulusha pa myaka yavula yo naikele kwakubula kuyuka Lesa wa kine, luno nji bingi na lusekelo mambo namuyuka Lesa ye mpopwela.

[Tubyambo twa mushi]

[Mabulañano pa peja 27]

Nabukile mwanyike wakolelwe kikola kya mashika na buno bulume

[Mabulañano pa peja 28]

Bukine bwatendekele kupimpula bwikalo bwami

[Mabulañano pa peja 29]

Naumvwine bingi bulongo pa kuyuka bukine pe Lesa yenka wa kine

[Kipikichala pa peja 27]

Kimye kyo napwishishenga sukulu wa bupashita

[Kipikichala pa peja 28]

Ba Precious bamfunjishanga Baibolo

[Kipikichala pa peja 29]

Kimye amiwa ne bamama kyo twabatizhiwe

[Kipikichala pa peja 29]

Nji mu mwingilo wa kimye kyonse wa Bakamonyi ba kwa Yehoba

[Kipikichala pa peja 29]

Na bamwatawami, mwanetu wamukazhi ne balongo bami baishile mu bupopweshi bwa kine