Bataaine Bintu Byawama
BENA KILISHITU bavula kechi basekelela kiminshiminshi ne. Kino kibalengela kumvwa byepi ku muchima? Nanchi balanguluka’mba babena kushalapo bintu bimo nyi? Nanchi baana babo bamona kuba’mba bashalapo pa bintu byawama nyi? Monai Bakamonyi ba kwa Yehoba mwaya ntanda byo baambapo pa kino.
● Kuvuluka Yesu Kilishitu: “Saka nkyangye kwikala Kamonyi wa kwa Yehoba, kechi nayanga ku chechi javula ne. Nayangakotu pa kiminshiminshi nangwa kimye kya Ishita. Nangwatu pa bino bimye, kechi nalangulukangapo pe Yesu Kilishitu ne. Luno kechi nsekelela kiminshiminshi ne. Bino ntaanwa ku kupwila kwa bena Kilishitu jibiji mu mulungu kabiji mfunjishako ne bantu bakwabo byaamba Baibolo pe Yesu!”—EVE, AUSTRALIA.
● Lusekelo luji mu kupana: “Ngikala na lusekelo inge bantu bampa kintu kyo nabujilenga kuketekela. Kabiji natemwa kulengela bantu bikachi ne bipikichala mambo bibaletela lusekelo ne amiwa bindetela lusekelo.”—REUBEN, NORTHERN IRELAND.
● Kukwasha bakajilwa: “Twatemwa kuteekela kajo bantu bakolwa. Bimye bimo twibatwajila maluba, keke nangwa bupetu bukwabo pa kuba’mba bekalepo na lusekelo. Twiyowa kuba bino bintu mambo twakonsha kufwakesha bano bantu kimye kyonse kyo tukeba mu mwaka.”—EMILY, AUSTRALIA.
● Kukwatankana mu kisemi: “Inge kisemi kyaiya pamo kikwasha baana betu kuyuka bamwisho yabo, bashabo ba bakulumpe, bashabo ba banyike, bashabo nkazhi, bainabo ba banyike ne bainabo ba bakulumpe, bankambo yabo ne bavyala babo. Na mambo a kuba’mba kechi tuji na moba atongolwa kuba’mba o twafwainwa kubilamo bino ne, kechi tuba bino kya kwikanjikizha ne. Kabiji ba kisemi kyetu bayuka kuba’mba twibafwakesha mambo twibatemwa.”—WENDY, CAYMAN ISLANDS.
● Mutende: “Pa kimye kya kiminshiminshi bantu bapayankana bingi kya kuba kechi balangulukapo ne pa kwikala mu mutende na bakwabo ne. Nafunda pa milaye ya mu Baibolo yaamba pa bantu. Kabiji ino milaye indengela kwikala na mutende wa mu milanguluko. Nayuka kuba’mba baana bami bakekala bwikalo bwawama kulutwe.”—SANDRA, SPAIN.
[Kipikichila]
Eve
[Kipikichila]
Reuben
[Kipikichila]
Emily
[Kipikichila]
Wendy
[Kipikichila]
Sandra