Salaipo Kupopwela Lesa

1, 2. Ñanyi bwipuzho bo mwafwainwa kwiipuzha anweba bene, kabiji mambo ka?

KUFUNDA Baibolo kwimulengela kuyuka kuba’mba bantu bamo bamba’mba bapopwela Lesa bafunjisha ne kuba bintu byashikwa Lesa. (2 Kolinda 6:17) O ene mambo, Yehoba o etukambizhizha kufumamo mu bupopweshi bwa bubela, mu “Babilona Mukatampe.” (Lumwekesho 18:2, 4) Musakuba byepi? Atweba bonse twafwainwa kusalapo. Ishikishai’mba, ‘Nanchi nkeba kupopwela Lesa byonka byo akeba nyi, inyi nafwainwa kutwajijilatu byonka byo napopwelanga?’

² Inge kya kuba mwafumamo kala mu bupopweshi bwa bubela, mwauba bulongo. Pano bino mu muchima wenu kampe kujipo miteeto ne bisho bimo bya mu bupopweshi bwa bubela byo mwakitemwa. Pano twayai twisambe pa ene mambo o twafwainwa kuchinuzhukila miteeto ne bisho bimo bifichisha Yehoba ku muchima.

KUPOPWELA BANKISHI NE BASHAKULU

3. (a) Mambo ka bamo o kibakatezha kuleka kwingijisha bankishi pa kupopwela Lesa? (b) Baibolo waambapo’mba ka pa kupopwela Lesa kwingijisha bankishi?

³ Bantu bamo bapopwela Lesa pa myaka yavula kwingijisha bankishi. Inge ne anweba byobyo muba, kampe kyakonsha kwimukatazha kuleka kwingijisha bino bintu pa kupopwela Lesa. Pano bino yukai kuba’mba Yehoba witufunjisha byo twafwainwa kumupopwela. Baibolo witubula’mba Yehoba kechi ukeba kumupopwela kwingijisha bankishi ne.—Tangai Kulupuka 20:4, 5; Salamo 115:4-8; Isaya 42:8; 1 Yoano 5:21.

4. (a) Mambo ka kupopwela bashakulu o kwatamina? (b) Mambo ka Yehoba o akainye bantu banji kukeba kwisamba na bafwa?

⁴ Bantu bamo bebikako bingi kukeba kutokesha ku muchima bashakulu babo bafwile kala. Bamo bebapopwela ne kwibapopwela. Pano bino twafunda kuba’mba bafwa kafwako kyo bakonsha kuba ne. Kechi bakonsha kwitukwasha nangwa kwituba kyatama ne. Kafwako ku mpunzha ko baji na bumi ne. Kyatama bingi kukeba kwisamba na bantu bafwa mambo bandemona bo baamba na jiwi jumvwanyika nobe ja mulongo wetu wafwa. O ene mambo Yehoba o akainye bena Isalela kukeba kwisamba na bafwa nangwa kuba bintu byavwangamo bandemona.—Mpitulukilo ya mu Mizhilo 18:10-12; monai Byambo byo Balumbulula, 26 ne 31.

5. Ki ka kyakonsha kwimukwasha kuleka kupopwela Lesa kwingijisha bankishi nangwa kuleka kupopwela bashakulu?

⁵ Ki ka kyakonsha kwimukwasha kuleka kupopwela Lesa kwingijisha bankishi nangwa kuleka kupopwela bashakulu? Mwafwainwa kutanganga Baibolo ne kulangulukapo Yehoba byo amona bino bintu. Nkishi ke kintu “kya bunya” kwi Yehoba. (Mpitulukilo ya mu Mizhilo 27:15) Lombainga kwi Yehoba kimye kyonse kuba’mba emukwashe mumwenenga bintu monka mo ebimwena pa kuba’mba mumupopwelenga byonka byo akeba. (Isaya 55:9) Mwafwainwa kushiinwa kuba’mba Yehoba ukemupa bulume bukemukwasha kuleka bintu byakunza bupopweshi bwa bubela.

NANCHI MWAFWAINWA KUSEKELELA KIMINSHIMINSHI NYI?

6. Juba ja 25 Kuvumbi bejisajile byepi kwikala juba ja kuvulukilapo kusemwa kwa Yesu?

⁶ Kiminshiminshi kyayukanyikwa bingi mwaya ntanda yonse. Kabiji bantu bavula balanguluka’mba jo juba ja kuvulukilapo kusemwa kwa Yesu. Kiminshiminshi kyafuma ku bupopweshi bwa bubela. Buku umo waamba’mba bena Loma babulanga kupopwela Lesa bo basekelelanga kusemwa kwa juba, pa 25 Kuvumbi. Bantangi ba mu machechi bakebelenga bantu babulanga kupopwela Lesa kwikala bena Kilishitu. Onkao mambo, basajile juba ja 25 Kuvumbi kuba’mba jo ja kuvulukilapo kusemwa kwa Yesu nangwa kya kuba kechi jo juba jasemenwe Yesu ne. (Luka 2:8-12) Baana ba bwanga ba kwa Yesu kechi basekelelanga Kiminshiminshi ne. Buku umo waamba’mba, byo papichile myaka 200 kufuma pasemekejilwe Yesu, “kafwako bayukile juba jo asemenwe ne, kabiji bantu bachechetu bo bakebanga kuyuka juba jo asemenwe.” (Buku wa Sacred Origins of Profound Things) Kusekelela Kiminshiminshi kwatendekele saka papita myaka yavula bingi kufuma pabwelejile Yesu mwiulu.

7. Mambo ka bena Kilishitu bakine o babujila kusekelela Kiminshiminshi?

⁷ Bantu bavula bayuka byatendekele bintu byubiwa pa Kiminshiminshi, nabiji kusangalela pamo ne kwipa bya bupe. Kwajingapo kimye kimo kyo bakainye kusekelela Kiminshiminshi mu kyalo kya England ne mu byalo bimo bya mu America mambo bantu batendekele kuba bino kechi bapopwelanga Lesa ne. Bamanyikanga bonse basekelelanga Kiminshiminshi. Bino mu kuya kwa moba bantu batendekele kusekelela Kiminshiminshi jikwabo. Pano mambo ka bena Kilishitu bakine o bakaina kusekelela Kiminshiminshi? Mambo mu bintu byonse byo boba kechi bakeba kufichisha Lesa ku muchima ne.

NANCHI TWAFWAINWA KUSEKELELANGA MOBA A KUSEMWA NYI?

8, 9. Mambo ka bena Kilishitu batanshi o babujilanga kusekelela moba a kusemwa?

⁸ Kusekelela moba a kusemwa nako kwayukanyikwa bingi. Nanchi bena Kilishitu bafwainwa kusekelelanga moba a kusemwa nyi? Kusekelela moba a kusemwa kwatongolwatu mu Baibolo kwa bantu babulanga kupopwela Yehoba. (Ntendekelo 40:20; Mako 6:21) Kusekelela moba a kusemwa kyajinga kisho kya kunemeka balesa ba bubela. O ene mambo bena Kilishitu batanshi o “bamwenanga kusekelela kusemwa kwa muntu uji yense kwikala kisho kya bantunshi.”—The World Book Encyclopedia.

⁹ Bena Loma ne Bangiliki baitabijile’mba kuji mupashi ushinkwako kimye kibena kusemwa muntu kabiji uno mupashi ye ukamuzhikijilanga mu bwikalo bwanji bonse. Buku wa kuba’mba The Lore of Birthdays waamba’mba: “Uno mupashi umvwañana na lesa mwina jojo juba jasemekejilwepo yewo muntu.”

10. Mambo ka bena Kilishitu o babujila kusekelela moba a kusemwa?

¹⁰ Nanchi bisho bya kusekelela moba amo byafuma ku bupopweshi bwa bubela bitokesha Yehoba ku muchima nyi? (Isaya 65:11, 12) Ine, Lesa washikwa bisho bya uno mutundu. O ene mambo o tubujila kusekelela moba a kusemwa nangwa moba a kukokoloka afuma ku bupopweshi bwa bubela.

NANCHI KUBA BINO KWATAMA NYI?

11. Mambo ka bantu bamo o basekelela moba a kukokoloka? Ñanyi kintu kyo mwafwainwa kutapo muchima mu bwikalo bwenu?

¹¹ Bantu bamo batwajijila kusekelela Kiminshiminshi ne mobatu akwabo a kukokoloka nangwa kya kuba bayuka kuba’mba afuma ku bupopweshi bwa bubela. Balanguluka kuba’mba moba a kukokoloka ke kimye kyawama kya kwikala pamo na kisemi na kusangalala. Nanchi ne anweba byobyo mulanguluka nyi? Kechi kyatama kwikalapo na kimye kya kusangalela pamo na kisemi ne. Yehoba ye walengele kisemi kabiji ukeba’mba twikalenga bulongo. (Efisesa 3: 14, 15) Nangwa byonkabyo, kintu kyanema kyo twafwainwa kutapo muchima ke kwikala na bulunda bwawama ne Yehoba. Kechi twafwainwa kusekelelanga moba a kukokoloka afuma ku bupopweshi bwa bubela na mambotu a kukeba kutokesha balongo betu ku muchima ne. O ene mambo mutumwa Paulo o ambijile’mba: “Yukainga kintu kimutokesha Nkambo ku muchima.”—Efisesa 5:10.

12. Ki ka kyakonsha kulengela kusekelela juba ja kukokoloka kufichisha Yehoba ku muchima?

¹² Bantu bamo kechi batako muchima ku byatendekele jojo juba ja kukokoloka ne. Pano bino Yehoba kechi byobyo amona bintu ne. Washikwa kusekelela moba a kukokoloka atendekejile mu bupopweshi bwa bubela nangwa moba a kutumbijika bantu nangwa mbandela ya kyalo. Bena Ijipita bapopwelanga balesa babubela bavula bingi. Bena Isalela byo bafumine mu Ijipita batendekele kuba kisho kimo kya bena Ijipita ne kwikitela’mba “kijiilo kya Yehoba.” Yehoba wibakambwile pa kino kyo baubile. (Kulupuka 32:2-10) Byonka byaambile Isaya, kechi twafwainwa ‘kukwata ku kintu nangwa kimo kyatama ne!’—Tangai Isaya 52:11.

BYA KUBA NA BAKWENU

13. Ñanyi mepuzho amo o mwakonsha kwiipuzha inge mwafuukulapo kubula kusekelelako moba a kukokoloka?

¹³ Inge mwafuukulapo kubula kusekelelako moba a kukokoloka, mwakonsha kutendeka kulanguluka pa bintu byavula bingi. Mwakonsha kwiipuzha mepuzho nabiji a kuba’mba: Nakonsha kukumbula byepi bo ñingila nabo inge bangipuzha pa ene mambo o mbujila kusekelela Kiminshiminshi? Nakonsha kuba byepi inge bampa bupe pa juba ja Kiminshiminshi? Nakonsha kuba byepi inge mwinakwami ke akebe kusekelela moba a kukokoloka? Nakonsha kuba byepi pa kuba’mba baana bami babulenga kukumbwa kusekelela moba a kukokoloka nangwa a kusemwa?

14, 15. Mwakonsha kuba byepi inge muntu wimwimuna kwesakana na jojo juba nangwa inge wimupa bupe?

¹⁴ Kyawama kulangulukapo bulongo pa kuba’mba muyuke bya kwamba ne kuba mu bintu bya uno mutundu. Inge bemwimuna kwesakana na jojo juba, kechi mwafwainwa kubula kwibakumbula ne. Mwakonsha kwibakumbulatu’mba, “Nasanta.” Pano inge bakeba kuyukilapo byavula, mwafwainwa kwibalumbulwila bulongo ene mambo o mubujila kusekelela moba a kukokoloka. Onkao mambo, kyawama kuyuka bya kukumbula bulongo na mushingi. Baibolo waamba kuba’mba: “Byambo byenu kimye kyonse bikale na bibusa kabiji byalungwamo mukele, kuba’mba muyuke byo mwafwainwa kukumbula muntu yense.” (Kolose 4:6) Kampe mwakonsha kwamba’mba mwatemwa kusangalela pamo na bakwenu ne kupana bupe, bino mwafuukulapo kubula kuba bino pa moba a kukokoloka.

¹⁵ Mwakonsha kuba byepi inge bemupa bupe? Mu Baibolo kechi muji mizhilo ya kulondela mu bya uno mutundu ne, pano bino Baibolo waamba’mba twafwainwa kwikala na jiwi ja mu muchima jawama. (1 Timoti 1:18, 19) Muntu wakonsha kwimupa bupe na mambo a kubula kuyuka’mba kechi musekelela moba a kukokoloka ne. Nangwa wakonsha kwamba’mba, “Nayuka namba anweba kechi musekelela moba a kukokoloka ne, pano bino, nakeba namba nemupepo buno bupe.” Monse mo kyakonsha kwikela, mwakonsha kutambula bupe nangwa ne. Pa kufuukula mwafwainwa kumona kuba’mba mwatwajijila kwikala na jiwi ja mu muchima jawama. Kechi twafwainwa kuba kintu kyakonsha kutamisha bulunda bwetu ne Yehoba ne.

ANWEBA NE KISEMI KYENU

16. Mwakonsha kuba byepi inge bamo ba mu kisemi bakeba kusekelela moba a kukokoloka?

¹⁶ Mwakonsha kuba byepi inge bamo ba mu kisemi bakeba kusekelela moba a kukokoloka? Kechi mwafwainwa kwipachikanga nabo ne. Vulukai kuba’mba baji na luusa lwa kwifuukwila bene bya kuba. Ikalai na kifyele ne kunemeka byo bafuukula byonkatu byo mukeba bantu kunemeka byo mufuukula. (Tangai Mateo 7:12.) Pano mwakonsha kuba byepi, inge ba mu kisemi bakeba kuba’mba mwikalengapo kimye kyo babena kusekelela moba a kukokoloka? Mwafwainwa kulomba Yehoba kwimukwasha kufuukula bulongo saka mukyangye kufuukula bya kuba. Langulukai pa byo kiji, ne kukeba bulongo bishinka byaamba pa kyokyo kintu. Vulukainga kuba’mba mwafwainwa kutwajijila kuba bintu bitokesha Yehoba ku muchima.

17. Mwakonsha kuba byepi pa kuba’mba baana benu babulenga kukumbwa bakwabo basekelela moba a kukokoloka?

¹⁷ Mwakonsha kuba byepi inge baana benu ke bakumbwe bakwabo babena kusekelela moba a kukokoloka? Kyawama kwibanengezhezhangapo tubintu tumo twawama pa kimye pa kimye. Kabiji mwafwainwa kwibapangapo ne bya bupe. Bupe bwanema bo mwafwainwa kupa baana benu ke kimye ne butemwe.

IKALAI MU BUPOPWESHI BWA KINE

18. Mambo ka o twafwainwa kuyilanga ku kupwila kwa bwina Kilishitu?

¹⁸ Pa kuba’mba tutokeshe Yehoba ku muchima twafwainwa kukana mpopwelo ya bubela kubikapotu ne bisho ne moba a kukokoloka. Twafwainwa kwikala mu bupopweshi bwa kine. Twafwainwa kuba byepi bino? Tuba bino inge ke tuye jonse ku kupwila kwa bwina Kilishitu. (Tangai Bahebelu 10:24, 25.) Kupwila kwa bwina Kilishitu kwanema bingi mambo koko tupopwela Lesa byonka byo akeba. (Salamo 22:22; 122:1) Pa kuno kupwila popo twitundaika atweba bene na bene.—Loma 1:12.

19. Mambo ka kubulako bantu bukine bwa mu Baibolo o kwanemena?

¹⁹ Kintu kikwabo kimwesha kuba’mba mwasalapo kwikala mu bupopweshi bwa kine ke kubulako bantu bintu byo mwafunda mu Baibolo. Bantu bavula kibakola bingi ku muchima pa kumona bintu byatama bibena kumweka mu ntanda. (Ezikyo 9:4) Kampe mwayukapo bantu bamo bomvwa bino. Babulai luketekelo lo tuji nalo lwa bintu byawama bya kulutwe. Kupwila ne kusapwila bantu byaamba Baibolo kukemulengela kuleka kukomoka bisho ne bupopweshi bwa bubela. Mwafwainwa kushiinwa kuba’mba Yehoba ukapesha kwibikako kwenu byo mwasalapo kumwingijila mu jishinda jafwainwa.—Malakai 3:10.