MEPUZHO A MU BAIBOLO A KUMBULWA

Nanchi kyakonsheka kwikala myaka ne myaka nyi?

Muntu mutanshi Adama waikele myaka yavula bingi. Bino pakupitapo kimye, wakotele ne kufwa. Kufumatu kyokya kimye, bantu baeseka mashinda avula pa kuba’mba babulenga kukota ne kufwa. Bino kafwako muntu nangwa umo waikalapo kala myaka ne myaka ne. Mambo ka? Adama wakotele ne kufwa mambo walengele mambo kupichila mu kubula kukokela Lesa. Tukota ne kufwa mambo twaswana bundengamambo bwa kwa Adama.—Tangai Ntendekelo 5:5; Loma 5:12.

Pa kuba’mba tukekale myaka ne myaka, tukebewa bukuzhi. (Yoba 33:24, 25) Bukuzhi ke kintu kipanwa kukuula muntu, kabiji atweba tukebewa wa kwitukuula ku lufu. (Kulupuka 21:29, 30) Yesu witukujile pa kwitufwila.—Tangai Yoano 3:16.

Twakonsha kwikala byepi myaka ne myaka?

Kechi bantu bonse bakakuulwa ku kubela ne kufwa ne. Bantu babula kukokela Lesa byonka byaubile Adama kechi bakekala na bumi bwa myaka ne myaka ne. Kanatu bantu bonka bo balekelako mambo bo bakekala myaka ne myaka.—Tangai Isaya 33:24; 35:3-6.

Pa kuba’mba tulekelwe mambo, twafwainwa kubapo kintu kimo. Twafwainwa kuyuka Lesa kupichila mu kufunda Mambo anji aji mu Baibolo. Itufunjisha bya kwikala mutende, kwikala na mapesho a Lesa ne bya kukekala na bumi bwa myaka ne myaka.—Tangai Yoano 17:3; Byubilo 3:19.

Umvwe mukeba kuyukilapo byavula, monai kitango 3 mu uno buku, Nanchi Baibolo Kine Ufunjisha’mba Ka?, wanembwa na Bakamonyi ba kwa Yehoba

[Kipikichala pa peja 16]

Ñanyi lunengezho lwakonsha kwitukasulula ku lufu?