MUTWE WA PA NKUPIKO | BUBELA BULENGELA BANTU KULANGULUKA AMBA LESA KECHI WITUTEMWA NE
Bubela Bwalengela Lesa Kubula Kuyukanyikwa
BYAITABILA BAVULA Bupopweshi bukatampe “busatu bwa bena Kilishitu bwa Loma Katolika, Orthodoxy ne Polotesitanti bayuka amba kuji balesa basatu: Lesa Tata, Lesa Mwana ne Lesa Mupashi Wazhila. Kwesakana na bifunda bena Kilishitu pa bya bupopweshi, baitabila kuba’mba bano balesa kechi basatu ne, bino ke Lesa umotu.”—The New Encyclopædia Britannica.
BUKINE BWA MU BAIBOLO Yesu, Mwana Lesa kechi wiesakenyepo kwi Shanji amba bajitu pamo ne. Waambile’mba: “Mbena kuya kabiji nkabwela ko muji. Umvwe mwantemwa, inge mwasekela kuba amba mbena kuya kwi Batata, mambo abo bo bankila.” (Yoano 14:28) Waambijilepo mwana wa bwanga umo amba: “Amiwa mbena kuya kwi Batata, ne anweba bo Bashenu, ne kwi Lesa wami, ne anweba ye Lesa wenu.”—Yoano 20:17.
Mupashi wazhila kechi muntu ne. Bena Kilishitu batanshi “bonse bayujile na mupashi wazhila,” kabiji Yehoba waambile’mba: “Nketulwila mupashi wami pa bantu bonse.” (Byubilo 2:1-4, 17) Mupashi wazhila kechi lubaji lwa Balesa Basatu ne. Ke bulume bwa Lesa.
ENE MAMBO O KYANEMENA Bashayuka Bakikatolika abo ba Karl Rahner ne Herbert Vorgrimler baambile’mba “Balesa basatu kechi twakonsha kwibayuka kwakubula kimwesho ne, nangwatu panyuma ya kwibamona mu kimwesho kechi twakonsha kwibayuka bulongo ne.” Nanchi mwakonsha kutemwa muntu ye mwabula kuyuka nangwa wakatazha kuyuka byo aji nyi? Lufunjisho lwa Balesa Basatu lwakonsha kwitulengela kubula kuyuka Lesa wa butemwe.
Marco, watongolwa mu kibaaba kyafumako wamonanga lufunjisho lwa balesa basatu amba lo lwamulengejile kubula kuyuka Lesa. Waambile’mba, “Nalangulukanga kuba’mba Lesa wifyanga kwi amiwa ne kumona kuba’mba kechi nakonsha kufwenya kwipi ne aye ne.” Baibolo waamba’mba “Mambo Lesa kechi wa bimvulañanya ne.” (1 Kolinda 14:33) Kechi wifya kwi atweba ne. Ukeba amba tumuyuke. Yesu waambile’mba: “Atweba tupopwela kyo twayuka.”—Yoano 4:22.
Ba Marco baamba’mba, “Nalengele bulunda ne aye.” Umvwe twayuka amba Yehoba wa kine kabiji ne kuba’mba kechi wifya ne, tukamutemwa. Baibolo wamba’mba “Pakuba yense ubula kutemwañana kechi wamuyuka Lesa ne, mambo Lesa butemwe.”—1 Yoano 4:8.
[Kipikichala pa peja 5]
[Byambo bya Muntu Ungi]
Museo Bardini, Florence