MUTWE WA PA NKUPIKO | BUBELA BULENGELA BANTU KULANGULUKA AMBA LESA KECHI WITUTEMWA NE

Bubela bwa Kuba’mba Lesa Kechi uji na Jizhina ne

BYAITABILA BAVULA Shayuka wa bya bupopweshi aye David Cunningham waambile’mba, “Kechi twayuka umvwe Lesa uji na jizhina ne, kabiji umvwe uji najo kechi jayukanyikwa ne.” Theological Studies.

BUKINE BWA MU BAIBOLO Lesa waambile’mba: “Amiwa ne Yehoba, ajo jo jizhina jami.” (Isaya 42:8) Yehoba ke jizhina ja Kihebelu jilumbulula amba “Wikela Monse mo Asakila.”—Ntendekelo 2:4.

Yehoba ukeba’mba twingijishenga jizhina janji. Baibolo wamba’mba, “Itainga pa jizhina janji. Babulai ba mu mikoka ya bantu byo auba. Sapwilai amba: Jizhina janji jatumbalala.”—Isaya 12:4.

Yesu waingijishanga jizhina ja Lesa. Mu lulombelo, Yesu wabuujile Yehoba amba: “Nejiyukanyikisha jizhina jenu kwi abo [baana ba bwanga ba kwa Yesu] kabiji nkejiyukanyikisha.” Mambo ka Yesu o ayukanyikishe jizhina ja Lesa ku bana banji ba bwanga? Watwajijile kwamba’mba: “Kuba amba butemwe pe amiwa bwikale mwi abo, ne amiwa ngikale ne abo.”—Yoano 17:26.

ENE MAMBO O KYANEMENA Wafunda pa bya bupopweshi aye Walter Lowrie wanembele amba: “Muntu wabula kuyuka jizhina ja Lesa, kechi wamuyuka bulongo byo aji ne. Kabiji umvwe kya kuba’mba muntu wayuka amba Lesa ufwako, kechi wakonsha kumutemwa ne.”

Mwanamulume wa jizhina ja Victor wayanga ku chechi jonse, bino wiumvwanga amba kechi wamuyukile bulongo Lesa ne. Waambile’mba “Nafunjile kuba’mba jizhina ja Lesa ke Yehoba kabiji kyajinga nobe Lesa mwine wambujilenga. Neumvwinenga nobe nataine Muntu ye naumvwinengatu nkuwa. Natendekele kumumona nobe Muntu wa kine kine ne kulenga bulunda nanji.”

Yehoba naye ufwenya kwipi ku bantu bengijisha jizhina janji. Ku boba ‘balanguluka jizhina janji’ Lesa walaya kuba’mba: “Nkebobilako lusa byonka byuba muntu ku mwananji umwingijila.” (Malakai 3:16, 17) Kabiji Lesa upesha boba beta pa jizhina janji. Baibolo waamba’mba: “Mambo yense wita pa jizhina ja Yehoba ukapuluka.”—Loma 10:13.

[Kipikichala pa peja 4]

Kufya nangwa kupingizhapo jizhina jikwabo pa ja Lesa kiji nobe kwijifumya mu Baibolo