BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • wp19 Na. 1 pp. 4-5
  • Lesa Jizhina Janji Ñanyi?

Vidyo ufwamo.

Yakana kushinkuka.

  • Lesa Jizhina Janji Ñanyi?
  • Kyamba kya Usopa Kibena Kubijika Bufumu Bwa Yehoba (Kya bena kengi)—2019
  • Tumitwe tucheche
  • Byambo Bipashako
  • ENE MAMBO O KYANEMENA KUYUKA JIZHINA JA LESA
  • JINO JIZHINA JITUFUNJISHAPO KA PE LESA?
  • Jizhina ja Lesa
    Labainga!—2017
  • Nemekainga Jizhina Jikatampe Ja Yehoba
    Kyamba kya Usopa—2013
  • Jizhina ja Lesa —byo Jingijishiwa ne byo Jilumbulula
    Nanchi Baibolo Kine Ufunjishaˈmba Ka?
  • Nanchi Mwayuka Jizhina ja Lesa Kabiji Mwijingijisha Nyi?
    Kyamba kya Usopa—2014
Monai Bikwabo
Kyamba kya Usopa Kibena Kubijika Bufumu Bwa Yehoba (Kya bena kengi)—2019
wp19 Na. 1 pp. 4-5

Lesa Jizhina Janji Ñanyi?

Bwipuzho butanshi bo twipuzha muntu inge tukeba kumuyuka ke bwa kuba’mba, “Yenu bañanyi jizhina?” Inge mwaipuzha Lesa buno bwipuzho, wakonsha kukumbula’mba ka?

“Amiwa yami Yehoba. Jino jo jizhina jami.”—Isaya 42:8.

Nanchi kyo kimye kitanshi kumvwapo jino jizhina nyi? Kyakonsha kwikala bino, mambo mu Mabaibolo avula kechi baingijisha jizhina ja Lesa ne. Pafwainwa kwikala jizhina ja Lesa, bapingizhapo kyambo kya kuba’mba “NKAMBO.” Mu Mabaibolo atanshi a mu Kihebelu, jizhina ja Lesa jitanwamo bimye 7,000. Jino jizhina bejinemba na bisopelo bina bya Kihebelu bya kuba’mba YHWH, byatuntululwa kuba’mba “Yehoba” mu Kikaonde.

Jizhina ja Lesa mu Kihebelu mu muvungilo wa Dead Sea Scrolls

Muvungilo wa Masalamo wa pa Kalunga Kafwa (Dead Sea Psalms Scroll) Myaka ya 30 C.E-50 C.E., KIHEBELU

Jizhina ja Lesa mu Kizungu mu Baibolo wa ntuntulwile Tyndale

Baibolo watuntulwile Tyndale Mwaka wa 1530, KIZUNGU

Jizhina ja Lesa mu Kisipanishi mu Baibolo wa the Reina-Valera

Baibolo wa Reina-Valera Mwaka wa 1602, KISIPANISHI

 Jizhina ja Lesa mu Kichainizi mu Baibolo wa the Union Version

Baibolo wa Union Version Mwaka wa 1919, KICHAINIZI

Jizhina ja Lesa jitanwa bimye byavula mu Mabaibolo atanshi a Kihebelu ne mu Mabaibolo akwabo o batuntulula

ENE MAMBO O KYANEMENA KUYUKA JIZHINA JA LESA

Lesa wanemeka bingi jizhina janji. Kafwako wapeele Lesa jizhina ne, aye mwine ye witumbile jino jizhina. Yehoba waambile’mba: “Jino jo jizhina jami ja myaka ne myaka kabiji bino byo byo mukamvulukanga mu bisemi byonse bikalondelapo.” (Kulupuka 3:15) Mu Baibolo, jizhina ja Lesa ja kuba’mba Yehoba jitanwamo bimye byavula kukila byambo bya mushingi bya kuba’mba Lesa, Nkambo, Tata ne wa Bulume Bonse. Kabiji jitanwamo bimye byavula kukila mazhina akwabo nabiji Abalahama, Mosesa, Davida ne Yesu. Yehoba ukeba’mba bantu bonse bayuke jizhina janji. Baibolo waamba’mba: “Bantu bayuke’mba anweba, yenka wa jizhina ja Yehoba, yenu bunketu Mwine Wakila pano pa ntanda ponse.”—Salamo 83:18.

Yesu wanemekele bingi jizhina ja Lesa. Mu Lulombelo lwa Nkambo lutelwa ne kuba’mba Tata Wetu wa Mwiulu, Yesu wafunjishe baana banji ba bwanga kulomba kwi Lesa amba: “Tata wetu wa mwiulu, jizhina jenu jizhile.” (Mateo 6:9) Pa kimye kikwabo, Yesu walombele kwi Lesa amba: “Tata tumbijikai jizhina jenu.” (Yoano 12:28) Mwingilo mukatampe ye aingijile Yesu pano pa ntanda wajinga wa kutumbijika jizhina ja Lesa, o ene mambo o aambijile mu lulombelo amba: “Nejisolola jizhina jenu kwi abo kabiji nkejisolola.”—Yoano 17:26.

Bantu bayuka Lesa banemeka jizhina janji. Bantu ba Lesa bajingako kala bayukile kuba’mba jizhina ja Lesa jajinga nobe kyamba kyabo kya kupulukilamo. Baibolo waamba’mba: “Jizhina ja Yehoba kyo kyamba kyakosa. Mo munyemena muntu waoloka kabiji uzhikijilwa.” (Byambo bya Maana 18:10) “Yense wita pa jizhina ja Yehoba ukapuluka.” (Yoela 2:32) Baibolo waamba’mba, aba bengijila Lesa bakatelwanga pa jizhina janji. Waamba’mba: “Mitundu ya bantu yonse ikendanga mu mazhina a balesa babo, pakuba atweba tukendanga mu jizhina ja Yehoba Lesa wetu myaka ne myaka.”—Mika 4:5; Byubilo 15:14.

JINO JIZHINA JITUFUNJISHAPO KA PE LESA?

Jino jizhina jitufunjisha byavula pe Lesa. Bashayuka bavula bamba’mba jizhina ja Yehoba jilumbulula’mba “Ulengela Bintu Kwikalako.” Yehoba wabuujile Mosesa byambo bitukwasha kumvwisha mwatala jizhina janji. Waambile’mba: “Nkekala Monka mo Nkafuukwila Kwikala.” (Kulupuka 3:14) Abino byambo bimwesha’mba jizhina ja Lesa kechi jilumbululatu amba Lesa ye Mulenga wa bintu byonse ne. Jizhina janji jilumbulula ne kuba’mba Lesa wakonsha kwikela monse mo akebela nangwa kwingijisha bilengwa byanji pa kuba’mba afikizhe kyaswa muchima wanji. Byambo bya mushingi bitufunjisha kuba’mba Lesa uji bingi na bulume ne luusa, kabiji wakila bilengwa byonse. Pano bino, jizhina janji ja kuba’mba Yehoba jitukwasha kumuyuka bulongo byo aji ne byo akonsha kuba.

Jino jizhina jimwesha’mba Lesa wituta muchima. Bilumbulula jizhina ja Lesa bitufunjisha kuba’mba Lesa wata bingi muchima bantu ne bilengwa byonse. Kabiji twayuka kuba’mba Lesa ukeba’mba tumuyuke, mambo witubuula jizhina janji. Aye mwine ye witubuula jizhina janji, kafwako wamulombele kuba bino ne. Kino kimwesha kuba’mba Lesa ukeba’mba tumuyuke bulongo ne kufwenya kwipi ne aye. Kechi ukeba’mba tulangulukenga’mba uji kwalepa ne atweba ne.—Salamo 73:28.

Tumwesha’mba twatemwa bingi Lesa inge ketwingijishe jizhina janji. Fwanyikizhai’mba kuji muntu ye mukeba kwisampa nanji bulunda, kabiji mwamubuula ne jizhina jenu. Mwakonsha kumvwa byepi inge wakana kwingijisha jizhina jenu? Pa kupitapo moba, mwakonsha kutendeka kulanguluka’mba uno muntu kechi ukeba kwikala mulunda nenu ne. Kyo kimotu ne kwi Lesa. Yehoba wabuula bantu bonse jizhina janji, kabiji ukeba’mba bejingijishenga. Inge ketwingijishe jizhina janji, tumwesha’mba tukeba kwikala balunda nanji. Kabiji Yehoba wata muchima aba ‘banemeka jizhina janji.’—Malakai 3:16, tubyambo twa munshi.

Pa kuba’mba tuyuke Lesa bulongo, patanshi twafwainwa kuyuka jizhina janji. Bino kechi twafwainwa kupelelatu pa kuyuka jizhina ne. Twafwainwa ne kuyuka byo aji ne byubilo byo aji nabyo.

LESA JIZHINA JANJI ÑANYI? Lesa jizhina janji Yehoba. Jino jizhina jitufunjisha Lesa byo aji ne kuba’mba ufikizha byonse byo akeba

ÑANYI WALENGELE LESA?

Bantu bavula beipuzha buno bwipuzho. Kampe ne anweba mwiipuzha buno bwipuzho. Mwakonsha kwipuzha’mba: Inge jiulu ne ntanda ne byonse bijimo kuji wibilengele, nga walengele Lesa ñanyi?

Bashayuka ba sayansi bamba kuba’mba ntanda ne jiulu byajinga na ntendekelo. Kabiji Baibolo naye mu buku mutanshi waamba’mba: “Mu ntendekelo Lesa walengele jiulu ne ntanda.”—Ntendekelo 1:1.

Jiulu kechi jilengeletu jine ne, kabiji kechi jakonsheshe kwikalako bunke bwajo ne. Kafwako kintu kyakonsha kwilenga kine kwa kubula wa kwikilenga ne. Umvwe kya kuba kechi kwajinga kintu nangwa kimo jiulu saka jikyangye kulengwa ne, ko kuba’mba ne jiulu inge kechi jalengelwe ne. Kino kimweshatu patoka kuba’mba kuji walengele jiulu. Aye wajingako kala jiulu saka jikyangye kulengwa kabiji kechi wajinga na ntendekelo ne. Kechi kyapela atweba bantu kumvwisha kino kishinka ne. Yehoba Lesa ye mupashi wa maana ne bulume bonse, kabiji ye walengele jiulu.—Yoano 4:24.

Baibolo waamba pe Lesa amba: “Mitumba saka ikyangye kulengwa nangwa saka mukyangye kulenga ntanda ne mushiji, kufumatu kala kene kufika ne myaka ne myaka, anweba yenu Lesa.” (Salamo 90:2) Bino byambo bimwesha’mba Lesa kechi uji na ntendekelo ne. Aye ye walengele jiulu ne ntanda “mu ntendekelo.”—Lumwekesho 4:11.

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu