Jizhina ja Lesa jo banemba mu bisopelo bya Kihebelu jitanwa mu manyusikilipiti a Baibolo a kala
BYAMBAPO BAIBOLO
Jizhina Ja Lesa
Bantu bavula beta Lesa kwingijisha mazhina avula a mushingi, nabiji Nkambo, Wa myaka ne myaka, Allah nangwa’mba Lesa. Pano bino Lesa uji na jizhina. Nanchi mwafwainwa kwijingijisha nyi?
Lesa jizhina janji ñanyi?
BYAMBA BANTU
Bantu bebepekezha kwikala bena Kilishitu baitabila’mba jizhina ja Lesa Yesu. Bakwabo bamba’mba na mambo a kuba’mba kujitu Lesa wa Bulume bonse umo, kechi kyayilamo kwingijisha jizhina janji ne. Kabiji bakwabo nabo bamba’mba twafwainwa kwingijishanga jizhina janji.
BYAMBA BAIBOLO
Lesa wa Bulume bonse jizhina janji kechi Yesu ne. Onkao mambo, Yesu kechi Lesa wa Bulume bonse ne. Yesu wafunjishe baana banji ba bwanga kuba’mba bafwainwa kulombanga kwi Lesa amba: “Tata, jizhina jenu jizhile.” (Luka 11:2) Yesu naye walombele kwi Lesa amba: “Tata tumbijikai jizhina jenu.”—Yoano 12:28.
Lesa waamba mu Baibolo amba: “Amiwa yami Yehoba. Jino jo jizhina jami. Kechi mpana lukumo lwami ku muntu nangwa umo ne.” (Isaya 42:8) Jizhina ja kuba’mba “Yehoba” ke jizhina ja kizungu jafuma ku bisopelo bina bya mu Kihebelu bya kuba’mba YHWH bimenako jizhina jazhila. Mu Binembeloa bya Kihebelu, jino jizhina jitanwamo bimye 7,000. Jino jizhina mu Baibolo jitanwamo bimye byavula kukila mazhina a mushingi a kuba’mba “Lesa” ne “Wabulume bonse,” nangwa amba “Nkambo.” Bantu bengijisha bingi ano mazhina kukila byo bengijisha mazhina a kuba’mba Abalahama, Mosesa nangwa jizhina ja kuba’mba Davida.
Baibolo kechi waambapo amba Yehoba ukanya bantu kwingijisha jizhina janji ne. Binembelo bimwesha kuba’mba jizhina ja Lesa jazhila bejingijishanga ku bakalume ba Lesa ba kala. Kabiji mazhina o batumbanga baana babo, nabiji jizhina ja kuba’mba Elaija, jilumbulula’mba “Lesa Wami Yehoba.” Jizhina ja kuba’mba Zekaliya jilumbulula’mba “Yehoba Wavuluka.” Kabiji bantu kechi bakankazhamanga kwingijisha jizhina ja Lesa ne.—Luta 2:4.
Lesa ukeba’mba twingijishenga jizhina janji. Twafwainwa ‘kumusanchila Yehoba, ne kwita pa jizhina janji.’ (Salamo 105:1) Kabiji Yehoba umona bonse ‘balanguluka pa jizhina janji.’—Malakai 3:16.
“Bantu bayuke’mba anweba, yenka wa jizhina ja Yehoba, yenu bunketu Mwine Wakila pano pa ntanda ponse.”—Salamo 83:18.
Jizhina ja Lesa jilumbulula ka?
Bashayuka bamo bamba’mba mu Kihebelu jizhina ja Lesa ja kuba’mba Yehoba jilumbulula’mba, “Wikela Monse mo Akebela.” Bino byambo bilumbulula’mba Lesa wakonsha kwingijisha bilengwa byanji kuba kyaswa muchi wanji. Mulenga wa bintu byonse aye Lesa ye yenkatu wafwainwa jino jizhina.
BYO MWAKONSHA KUMWENAMO
Kuyuka jizhina ja Lesa kwakonsha kwimulengela kupimpula byo mulanguluka pe aye. Kabiji kikemupelela kufwenya kwipi ne aye. Pano mwakonsha kufwenya byepi kwipi na muntu ye mwabula kuyuka jizhina? Lesa byo asolola jizhina janji kimwesha kuba’mba ukeba anweba kufwenya kwipi ne aye.—Yakoba 4:8.
Mwafwainwa kushiinwa kuba’mba Yehoba ukatwajijila kwikela monka mwayila jizhina janji ne kuba byonse byo akeba. O ene mambo Baibolo o yaambila’mba: “Aba bayuka jizhina jenu bakemuketekela.” (Salamo 9:10) Mwakonsha kwikala na luno luketekelo inge mwayuka jizhina ja Lesa ja kuba’mba Yehoba ne byubilo byanji, nabiji butemwe bubula kwaluka, lusa, kifyele ne bololoke. (Kulupuka 34:5-7) Kyanema bingi kuyuka’mba Yehoba ufikizha byo alaya kimye kyonse kabiji kechi ukankalwa kuba bino ne.
Kyanema bingi kuyuka jizhina ja Lesa wa Bulume bonse. Kuba bino kukemuletela mapesho kino kimye ne kimye kya kulutwe. Lesa walaya amba: “Nkamuzhikijila mambo wayuka jizhina jami.”—Salamo 91:14.
“Yense wita pa jizhina ja Yehoba ukapuluka.”—Yoela 2:32.
Jizhina ja Lesa jo banemba mu milaka yavula
a Bantuntuluzhi bavula bafumyamo jizhina ja Lesa mu Baibolo ne kupingizhamo jizhina ja mushingi ja kuba’mba “NKAMBO” mu bisopelo bikatampe. Bakwabo nabo babiika jizhina ja Lesa mu byepelo bimo bya mu Baibolo nangwa mu byambo bya panshi. Baibolo wa Binembelo bya Ntanda Ipya waingijisha bingi jizhina ja Lesa.