MUTWE WA PA NKUPIKO | BUBELA BULENGELA BANTU KULANGULUKA AMBA LESA KECHI WITUTEMWA NE
Ene Mambo Bavula o Kibakatezha Kutemwa Lesa
“‘Wafwainwa kutemwa Yehoba Lesa wobe na muchima wobe yense, na mweo wobe yense, ne na maana obe onse.’ Uno ye mukambizho mukatampe kabiji ye mutanshi.”—Yesu Kilishitu, 33 C.E.a
Bantu bavula kibakatazha bingi kutemwa Lesa. Balanguluka amba Lesa wakanama kabiji amba kechi wibata muchima ne. Monai bino byambapo bantu:
Ba Marco ba ku Italy baambile’mba, “Nalombele kwi Lesa pa kuba’mba ankwashe nangwa kya kuba nalangulukilenga kuba’mba uji kwalepa. Namonanga amba Lesa kechi waumvwanga byonka byo twiumvwa ne.”
Ba Rosa ba ku Guatemala baambile’mba, “Nangwa kya kuba nakebelenga kwingijila Lesa, pano bino namonanga amba uji kwalepa bingi. Nalangulukanga amba ke Lesa wakanama kabiji ukambula bantu. Kechi nayukile amba uji na lusa ne.”
Ba Raymonde ba ku Canada baambile’mba, “Byo najinga mwanyike, nalangulukanga amba Lesa ukebatu byatama mwi atweba ne kwitukambula. Mu kuya kwa kimye, namumonanga kuba’mba kechi mulunda wa kine ne. Lesa wajinga nobe kilolo mukatampe utangijila bantu pano bino saka abula kwibatemwa.”
Nanchi anweba mwalangulukapo amba ka? Nanchi Lesa kechi witutemwa ne nyi? Bena Kilishitu bavula beipuzha buno bwipuzho pa myaka yavula. Mu myaka ya mu ma 1300-1800 bantu bavula ba mu Kilishitendomu kechi balombanga kwi Lesa wa Bulume bonse ne. Mambo ka? Bantu bamuchinanga bingi. Shayuka wa bya mpito aye Will Durant waambile’mba: “Nga muntu ndengamambo wakonsha kulomba byepi ku muntu ulenga moyo?”
Ki ka kyalengejile bantu kutendeka kumona Lesa amba uji “kwalepa ne kumuchiina”? Nanchi Baibolo ufunjishapo amba ka pe Lesa? Nanchi kufunda bukine pe Lesa kwakonsha kwimulengela kumutemwa nyi?
[Tubyambo twa mushi]
[Kipikichala pa peja 3]
[Byambo bya Muntu Ungi]
Peulu, balesa basatu: Museo Bardini, Florence; pakachi, helo: © Photononstop/Superstock