Bubela Bulengela Bantu Kulanguluka Amba Lesa Wakanama — BUTALA BWA MABUKU BWA PA INTANETI

MUTWE WA PA NKUPIKO | BUBELA BULENGELA BANTU KULANGULUKA AMBA LESA KECHI WITUTEMWA NE

Bubela Bulengela Bantu Kulanguluka Amba Lesa Wakanama

BYAITABILA BAVULA “Panyuma ya kufwa myeo ya boba bafwa na mambo a bundengamambo baya mu helo, mu lukabisho ‘lwa mujilo wa myaka.’” (Catechism of the Catholic Church) Bantangi ba bupopweshi bamo bamba’mba bantu baji mu helo kechi bakonsha kuvulukwa kwi Lesa jibiji ne.

BUKINE BWA MU BAIBOLO “Awa muntu ulenga mambo ye ukafwa.” (Ezikyo 18:4) Bafu “kafwako kyo bayuka ne.” (Musapwishi 9:5) Umvwe kya kuba’mba mweo ufwa kabiji kafwako kyo ayuka ne, wakonsha kuyanda byepi mu “mujilo wa myaka” nangwa lukabisho lwa kupatulwa kwi Lesa myaka ne myaka?

Mu Baibolo, byambo bya Kihebelu ne Kingiliki byatuntulula kyambo kya “helo” bilumbulula bilende ko bazhika bantu. Kyakumwenako, Yoba byo ajinga na misongo ikatampe, walombele amba: “Mama! inge mwaji mwaswa kumfya mu kalunga ka bafu [“mu helo”]. (Yoba 14:13) Yoba wakebelenga kukokoloka kechi kuya ku mpunzha ya lukabisho nangwa kupatulwa kwi Lesa ne, bino mu kilende.

ENE MAMBO O KYANEMENA Umvwe kya kuba’mba Lesa wajinga washinta, kechi twakonsha ku mutemwa ne. Rocío wikala ku Mexico waambile’mba “Kufumatu ku bwanyike bafunjishanga pa mujilo wa helo.” Najinga bingi na moyo ne kulanguluka kuba’mba Lesa kechi wajingapo na byubilo byawama ne. Nalangulukanga amba washinta.”

Byamba Baibolo pa bunchibamambo bwa Lesa ne bikala muntu umvwe wafwa, byalengejile Rocío kupimpula milanguluko yanji. Waambile’mba “Nakasulukile ne kumvwa nobe kisendwa kikatampe kyo nasendele bekifumyapo. Nayukile kuba’mba Lesa ukeba kwitubila byawama, witutemwa ne kuba’mba nafwainwa kumutemwa. Ujitu nobe shetu ukwata mwananji kukuboko pa kuba’mba amubile byawama.”—Isaya 41:13.

Bavula batendeka kupopwela Lesa na mambo a kuchina mujilo wa helo. Pano bino, Lesa kechi ukeba’mba mu mwingijilenga na mambo a ino ndangulukilo ne. Yesu waambile’mba: “Wafwainwa kutemwa Yehoba Lesa wobe.” (Mako 12:29, 30) Kabiji umvwe twavuluka kuba’mba Lesa kechi uba bubi lelo jino ne, twakonsha ne kuketekela bunchibamambo bwanji bwa kulutwe. Byonka byaambiletu mulunda nanji Yoba aye Elihu, twakonsha kwamba na luketekelo amba: “Lesa kechi uba bubi nangwa pachechetu ne, aye Wa bulume bonse kechi uba byatama nangwa pachechetu ne.”—Yoba 34:10.

[Kipikichala pa peja 6]

[Byambo bya Muntu Ungi]