MUTWE WA PA NKUPIKO | BUBELA BULENGELA BANTU KULANGULUKA AMBA LESA KECHI WITUTEMWA NE

Bukine Bwakonsha Kwimukasulula

Juba jimo, byo ajinga mu Yelusalema, Yesu waambilenga pe Shanji aye Yehoba ne kusolola bubela bwa bantangi ba bupopweshi bajingako mu oa moba anji. (Yoano 8:12-30) Byo aambile pa joja juba, bitulengela kukeba kuyuka byaitabilamo bantu pe Lesa lelo jino. Yesu waambile’mba: “Umvwe saka mulama byambo byami, mukekala baana bami ba bwanga, kabiji mukayuka bukine, ne bukine bukemukasulula.”—Yoano 8:31, 32.

“Umvwe saka mulama byambo byami.” Na bino byambo, Yesu witupa bishinka byakonsha kwitukwasha umvwe mafunjisho a bupopweshi a “bukine.” Umvwe mwaumvwa byambo bimo byamba bantu pe Lesa, Ishikishai amba, ‘Nanchi bino byambo byakwatankana na byambo byaambile Yesu ne byambo biji mu Binembelo Byazhila nyi?’ Londelainga byaubile bantu baambilengako mutumwa Paulo bakebelenga “kubalaula bulongo binembelo moba onse kuba amba bayuke kana bino bintu bya kine nangwa ne.”—Byubilo 17:11.

Ba Marco, Rosa ne Raymonde batongolwa mu kibaaba kitanshi kya ino mitwe, bapeselepeselenga bulongo  yo baitabilamo kupichila mu kufunda Baibolo na Bakamonyi ba kwa Yehoba. Ñanyi bintu byo bafunjile?

Marco: “Betufunjishanga Baibolo baingijishanga binembelo pa kukumbula mepuzho onse o twaipwizhenga na mukazhami. Twatendekele kutemwa Yehoba kabiji twakwatankene bingi mu masongola etu!”

Rosa: “Patanshitu, nalangulukanga amba Baibolo kechi buku mwanembwa bilanguluka bantu pe Lesa ne. Mu kuya kwa moba, nataine mikumbu ya mu Baibolo ku mepuzho ami. Pano luno mmona kuba’mba Yehoba kya kine ko aji kabiji nafwainwa ne kumuketekela.”

Raymonde: “Nalombele kwi Lesa pa kuba’mba ankwashe kumuyuka. Panyuma ya bino, amiwa ne benakwami twatendekele kufunda Baibolo. Twayukile bukine pe Yehoba. Twajinga bingi na lusekelo pa kuyuka byajinga Lesa.”

Kabiji Baibolo kechi usololatu bubela bo bamba pe Lesa ne, bino wamba ne bukine pa byubilo byanji byawama. Ke Byambo byanembelwe na lutangijilo lwa mupashi wanji kabiji bitukwasha ‘kuyuka bintu Lesa byo etusolwela kyatutu.’ (1 Kolinda 2:12) Mwakonsha kwimwena anweba bene Baibolo byo akumbula mepuzho aamba pe Lesa, pa kyaswa muchima wanji ne pa byo akoba kulutwe. Tangai pa mikumbu imo ya ano mepuzho pa keyala wa www.jw.org panembwa amba “Mafunjisho a mu Baibolo > Mepuzho a mu Baibolo Akumbulwa.” Mwakonsha ne kulomba lufunjisho lwa Baibolo pa keyala wetu nangwa ku umo wa Bakamonyi ba kwa Yehoba. Twaketekela kuba’mba umvwe mwauba bino, kikemulengela kutemwa Lesa.

[Kipikichala pa peja 7]