MEPUZHO A MU BAIBOLO AKUMBULWA
Baana bakonsha kufunda byepi kutemwa Lesa?
Ingijishai mafunjisho aamba pa bilengwa kukwasha mwanenu kuyuka ne kutemwa Lesa
Baana benu bakonsha kufunda kutemwa Lesa inge bashiinwa kuba’mba koaji kabiji wibatemwa. Pa kuba’mba batemwe Lesa, bafwainwa kumuyuka. (1 Yoano 4:8) Kya kumwenako, bafwainwa kuyuka bino: Ki ka Lesa kyo alengejile bantu? Mambo ka Lesa o aswishisha buyanji? Ñanyi bintu Lesa byo akobila bantu kulutwe?—Tangai Filipai 1:9.
Pa kuba’mba mukwashe baana benu kutemwa Lesa, mwafwainwa kumwesha amba mwamutemwa. Inge bamona bino, nabo bakalondela kya kumwenako kyenu.—Tangai Mpitulukilo ya mu Mizhilo 6:5-7; Byambo bya Maana 22:6.
Mwakonsha kufika byepi baana benu pa muchima pa kwibafunjisha?
Mambo a Lesa aji na bulume. (Bahebelu 4:12) Onkao mambo, kwashai baana benu kufunda mafunjisho atanshi. Pa kuba’mba Yesu afike bantu pa michima, washikishanga mepuzho, kuteleka ne kulumbulula Binembelo. Ne anweba mwafwainwa kulondela byafunjishanga Yesu pa kuba’mba mufike baana benu pa muchima.—Tangai Luka 24:15-19, 27, 32.
Mashimikila a mu Baibolo aamba pe Lesa byo aubanga na bantu akonsha kukwasha baana benu kuyuka ne kutemwa Lesa. Mabuku akonsha kwimukwasha kufunjisha baana benu mwakonsha kwiatana ne pa www.jw.org.—Tangai 2 Timoti 3:16.