MEPUZHO A MU BAIBOLO AKUMBULWA

Nanchi twakonsha kuyuka bukine bwaamba pe Lesa nyi?

Lesa wisambanga na bantu. Waingijishe mupashi wanji wazhila nangwa’mba ngovu ingila ne kubika milanguluko yanji mu bantu banembele Baibolo. (2 Petelo 1:20, 21) Twakonsha kuyuka bukine bwaamba pe Lesa inge ke tutange Baibolo.—Tangai Yoano 17:17; 2 Timoti 3:16.

Lesa wasolola bintu byavula byaamba pe aye mu Baibolo. Walumbulula ene mambo o alengejile bantu, bintu byo akoobila bantu ne byo akeba’mba twikalenga. (Byubilo 17:24-27) Yehoba Lesa ubena kukeba’mba tuyuke bukine pe aye.—Tangai 1 Timoti 2:3, 4.

Mambo ka Lesa o abena kwichila bantu bakeba kuyuka bukine?

Yehoba ye Lesa wa bukine kabiji watumine Mwananji, Yesu kwiya na kufunjisha bantu bukine. Onkao mambo, bantu batemwa bukine beya kwi Yesu. (Yoano 18:37) Lesa ubena kukeba bantu baji na uno muchima kwikala bapopweshi banji.—Tangai Yoano 4:23, 24.

Satana Diabola walengela bantu bavula kubula kuyuka Lesa byo akumbanya mafunjisho a bubela pe Lesa. (2 Kolinda 4:3, 4) Bantu babula kutemwa byawama bo balondela mafunjisho a bubela. (Loma 1:25) Pano bino, bantu bavula ba kishinka babena kufunda bukine bwaamba pe Lesa pa kufunda Baibolo.—Tangai Byubilo 17:11.