Byo Twakonsha Kukwasha Bakajilwa

BA FRANCOIS bakulumpe mu kipwilo bashimikizhe’mba: “Kwabukile malwañano panyuma ya bunsaji, mambo bo bashinjile bakaine’mba bebajila makusu pa mutwe kabiji kino kyalengejile biumbi bya Bakamonyi ba kwa Yehoba kunyema mu mazubo abo. Kajo ne muchi byakepele bingi , kabiji bintu byajinga bingi na mutengo. Bipao bya mali bebishinkile ne minkinyi yo bengijisha mu bino bipao nayo yalekele kwingila.”

Balongo ba ku ofweshi wa musampi batwajilenga mali ne byonse bikebewa pa kuba’mba bakwashe Bakamonyi banyemene mu mazubo abo ne kuya na kwikala pa Mazubo a Bufumu a mu kino kyalo. Mabumba a bantu ashinkile mikwakwa, bino na mambo a kuba bayukile kuba’mba Bakamonyi kechi bevwanga mu bya bumulwila ntanda ne, myotoka yafuminenga ku musampi beiswishishenga kupita.

Ba François baambile’mba: “Byo twayilenga ku Nzubo ya Bufumu, bambanzhi batendekele kuloza mata ku motoka. Nangwa kya kuba nsase yapichilenga pakachi ketu, pano bino kafwako nangwa umo mwi atweba ye balozele ne. Byo twamwene mushilikale saka anyemena ko twajinga na buta, ponkapotu twatendekele kubwela lumfutwanyuma na motoka, byo twaalulukile twanyemeshe motoka kanzhinzhi kubwela ku musampi. Twamusanchijile bingi Yehoba pa kwitupulusha. Juba jalondejilepo, balongo 130 bajinga pa Nzubo ya Bufumu banyeme ne kuya na kufyama ku mapunzha apusana pusana. Bamo baishile ku ofweshi wa musampi, ko twibalaminenga, kwibapa kajo ka mupashi ne bintu bikwabo bikebewa kufikatu ne kimye kyapwile milukuchi.”

Ba François baambile’mba: “Ofweshi wa musampi watambwijile nkalata ya kusanta kufuma ku balongo ba mu kino kyalo. Kumona balongo baishile kwibakwasha bafumine ku mapunzha apusana pusana kwibalengejile kuketekela bingi mwi Yehoba.”

Mu kimye kya bya malwa biponakotu bine ne makatazhotu akwabo, kechi twambila balongo ne banyenga amba ‘yainga mu mutende’ ne. (Yako. 2:15, 16) Bino tukwasha bakwetu bakajilwa. Byo byo kyajinga ne mu myaka kitota kitanshi, byo baumvwine kuba’mba kukekala kipowe kya nzala “baana ba bwanga pa muntu pa muntu bafuukwilepo kupana bintu byo bakonsheshe kupana ne kutuma kajo ka kutuuka ku balongo baikelenga mu Yudea.”—Byu. 11:28-30.

Byo tuji bakalume ba Yehoba, ne atweba tukwasha bantu na bintu byo tuji nabyo. Nangwa byonkabyo, bantu babena kukebewa ne kwibakwasha kwikala na bulunda bwawama ne Lesa. (Mat. 5:3) O ene mambo, Yesu o apelejile baana banji ba bwanga mwingilo wa kulenga baana ba bwanga, wa kwibakwasha kuyuka Lesa ne bintu byo bafwainwa kuba. (Mat. 28:19, 20) Twingijisha kimye kyetu, bulume bwetu ne bintu byetu bya ku mubiji pa kwingila uno mwingilo. Jibumba jetu jingijisha mali o tupana kukwashishamo bantu, pano bino, ano mali beingijisha kikatakata kutundaikilamo mwingilo wa kutwala bya Bufumu palutwe ne kusapwila mambo awama. Kuba bino kumwesha kuba’mba twatemwa Lesa ne bakwetu.—Mat. 22:37-39.

Aba bonse bapanako mali a kukwasha mwingilo wa Bakamonyi ba kwa Yehoba wa kusapwila mwaya ntanda yonse bafwainwa kushiinwa kuba’mba ano mali beengijisha bulongo. Nanchi mwafwainwa kukwasha balongo ne banyenga babena kuyanda nyi? Nanchi mukebesha kutundaika uno mwingilo wa kulenga baana ba bwanga nyi? Inge ibyo, ‘abya bintu byawama byo mwakonsha kuba kechi muleke kwibobilabyo bantu bebifwainwa ne.’—Mana 3:27.

[Kipikichala pa peja 8]

[Kitenguluzha pa peja 9]

BAMO BYO BAFUUKULAPO KUPANA MIBINGU IBINGULWA KU MWINGILO WA NTANDA YONSE

Byonka byo kyajinga mu moba a mutumwa Paulo, ne lelo jino bavula ‘batulapo bya milambo,’ ko kuba’mba mali amo ne kuya na kwiabika mu tubokoshi twa mibingu panembwa’mba “Mwingilo wa Ntanda Yonse.” (1 Ko. 16:2) Pa ñondo pa ñondo, bipwilo bituma ino mibingu ku ofweshi wa Bakamonyi ba kwa Yehoba uji mu kyalo kyabo. Kabiji mwakonsha kutuma mibingu ku kije kyaswishiwa na muzhilo kingijisha Bakamonyi ba kwa Yehoba mu kyalo kyenu. Pa kuba’mba muyuke jizhina ja kije kyaswishiwa na muzhilo kingijisha Bakamonyi ba kwa Yehoba mu kyalo kyenu, nembelai ku ofweshi wa musampi wa mu kyalo kyenu. Mwakonsha kutana keyala wa ofweshi wa musampi pa intaneti kwingijisha keyala wa www.jw.org. Bupe bo mwakonsha kutuma ke buno:

KUPANA BUPE KWA KUBULA KWAMBA BYO BUKENGILA

• Ke bupe bwa mali, bipe nangwa bintu bikwabo byanema.

• Mwafwainwa kutumina pamo na nkalata ibena kulumbulula kuba’mba ao mali nangwa bipe byo mwatuma bakebingijishe mo bakebela.

KUPANA BUPE NE KUBULAÑANA BYO BUKENGILA

• Ke mali apanwa kuba’mba beengijishe, pano bino, bakonsha kumubwezhezha mwine mwinao inge wiakeba.

• Saka mukyangye kupana bupe, ipuzhai Ofweshi wa Musampi uji mu kyalo kyenu.

KUNENGEZHEZHA JIMO BYA KUPANA BUPE

Kununga pa bupe bwa mali ne bipe, kuji mashinda akwabo a kupainamo mibingu mu kukwasha mwingilo wa Bufumu wa ntanda yonse. Ano mashinda atanchikwa panshipo. Saka mukyangye kutuma mibingu kwingijisha jishinda jo mukeba, patanshi bulai ofweshi wa musampi wa mu kyalo kyenu kuba’mba bamonepo mashinda o bengijisha mu kyokyo kyalo. Byo kiji kuba’mba mizhilo ya kafulumende ne mpaino ya misonko yapusana pusana, kyanema bingi kwipuzha dipatimenti utala pa bya mizhilo ne misonko pa musampi saka mukyangye kusalapo jishinda jawama ja kupainamo bupe.

Kwivimbila: Ke mibingu ipanwa kupichila mu kutongola kije kingijisha Bakamonyi ba kwa Yehoba kuba’mba kyo kikatambula mali a kwivimbila nangwa a penshonyi.

Mali aji ku Kipao: Mali aji ku kipao, bipepala bya kufishishapo mali ku kipao, nangwa mali a muntu watambula penshonyi akonsha kunengezhiwa nangwa kupanwa kimye kya lufu lwanji ku kije kingijisha Bakamonyi ba kwa Yehoba, kwesakana na mizhilo ya ku kyokyo kipao.

Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Bino bintu byakonsha kupanwa ku kije kingijisha Bakamonyi ba kwa Yehoba kuba’mba ke bupe bwapanwa bwa kubula kubwezha nangwa amba bakatambule buno bupe inge mwine wafwa.

Bishimikwa ne Mpunzha: Bishimikwa nangwa mpunzha byakonsha kupanwa ku kije kingijisha Bakamonyi ba kwa Yehoba kupichila mu kupana bupe bwa kuba’mba bakebwingijishe mo bakebela, nangwa inge kya kuba muntu wapana nzubo, awa wapana nzubo wakonsha kukitwajijila kwikalamo saka akiji mumi.

Bupe bwa pa Mwaka: Bupe bwa pa mwaka ke lunengezho lulengela muntu kupana mali a penshonyi pa mwaka pa mwaka ku kije kingijisha Bakamonyi ba kwa Yehoba, ko kuba’mba mali o afwainwe aye mwine kutambulanga nangwa yewa ye atongwele kuba’mba akatambulenga oo mali. Awa wapana buno bupe bakamukepesheshako misonko mu yewo mwaka ye atendekelamo kupana bobo bupe.

Buswe ne Mali Afiwa ku Kipamo: Bipe nangwa mali akonsha kupanwa ku kije kingijisha Bakamonyi ba kwa Yehoba kupichila mu kunemba buswe kwesakana na mwayila mizhilo, nangwa kutongola kije kikatambulanga bobo bupe. Luno lunengezho lwakonsha kulengela wapana buno bupe kumukepesheshako misonko.

Monkatu mwatala byambo bya kuba’mba “kunengezhezha jimo bya kupana bupe,” ano mashinda a kupainamo bupe akebewa muntu ukeba kupana buno bupe kwinengezhezha jimo. Onkao mambo, mwafwainwa kwipuzha dipatimenti utala pa bya mizhilo ne misonko pa musampi. Kupichila mu kwingijisha ano mashinda a kupainamo bupe, bavula bakwasha bupopweshi bwetu ne bantu mwaya ntanda kabiji bebabwezhezha mali a misonko o bapainenga pa kupana bobo bupe.

Pa kuba’mba muyukilepo byavula, mwakonsha kunemba nangwa kutuma foni ku Treasury (ofweshi utala pa mali) kwingijisha keyala uji panshipo nangwa mwakonsha kutumina ku ofweshi wa musampi uji mu kyalo kyenu.

TREASURY

Watch Tower Bible and Tract Society of Pennsylvania

P.O. Box 33459

Lusaka 10101

Foni: 260 211 272062