“Mwingilo Wabaya”

KWAJINGA misambo yanema bingi mu Yelusalema. Mfumu Davida waichile babinemanga, babitumbafumu ne babilobo. Baumvwine bingi bulongo pa kumvwa byambo byaambile Davida. Yehoba wakambizhe mwana wa kwa Davida aye Solomone kushimika kishimikwa kikatampe kya kupopwelamo Lesa wa kine. Uno mfumu wa bena Isalela bamumwesheshe ku mupashi wa Lesa mutanchi wa bikekala kino kishimikwa kabiji naye wapaine uno mutanchi kwi Solomone. Davida waambile’mba: “Mwingilo wabaya, mambo kechi nzubo ya muntu ne, bino ke ya Yehoba Lesa.”—1 Moba 28:1, 2, 6, 11, 12; 29:1.

Kabiji Davida waipwizhe’mba: “Ñanyi wipana lelo jino kupa Yehoba bupe?” (1 Moba 29:5) Inge mwajingako, inge mwaubile byepi? Nanchi inge mwapaineko bupe ku uno mwingilo wabayile nyi? Bena Isalela bapaine. “Basangalele bingi pa kupana ino milambo ya kwifuukwila, mambo bapainenga milambo ya kwifuukwila kwi Yehoba na muchima yense.”—1 Moba 29:9.

Byo papichile myaka, Yehoba wabikileko lunengezho lwanema kukila nzubo ya Lesa. Wabikileko nzubo ya Lesa ya ku mupashi, ko kuba’mba lunengezho lulengela bantu kumupopwela kupichila mu kitapisho kya kwa Yesu. (Hebe. 9:11, 12) Yehoba ubena kukwasha byepi bantu kupwana ne aye lelo jino? Ke kupichila mu mwingilo wa kufunjisha bantu kwikala ke baana ba bwanga. (Mat. 28:19, 20) Kyafumamo, bantu bavula bingi babena kufunda Baibolo, kabiji baana ba bwanga bavula babena kubatizhiwa ne bipwilo byavula bibena kulengwa.

Na mambo a kuvujilako kwa bipwilo, kubena kukebewa kupulinta mabuku avula alumbulula Baibolo, kushimika ne kuwamisha Mazubo a Bufumu ne kukeba mapunzha pa kubuñena ne kushonkena. Nanchi mwaswa kuba’mba mwingilo wetu wa kusampanya mambo awama wabaya bingi kabiji mufuma byawama nyi?—Mat. 24:14.

Kutemwa Lesa ne bakwetu ne kukeba kwingila na mukoyo mwingilo wa kusapwila Bufumu, ko kulengela bantu ‘kwipana kupa Yehoba bupe.’ Kitusangajika bingi ‘kunemeka Yehoba na bintu byawamisha byo tuji nabyo’ ne kumona byo babena kwingijisha buno bupe bulongo mu mwingilo mukatampe.—Maana 3:9.

Bamo Byo Bafuukulapo Kupana Bupe Ku Mwingilo Wa Ntanda Yonse

Lelo jino bavula ‘batulapo bya bupe,’ ko kuba’mba mali amo ne kuya na kwiabika mu tubokoshi twa bupe panembwa’mba, “Mwingilo wa Ntanda Yonse.” (1 Ko. 16:2) Pa ñondo pa ñondo, bipwilo bituma buno bupe ku ofweshi wa Bakamonyi ba kwa Yehoba uji mu kyalo kyabo. Kabiji mwakonsha kutuma bupe ku kije kyaswishiwa na mizhilo kingijisha Bakamonyi ba kwa Yehoba mu kyalo kyenu. Pa kuba’mba muyuke jizhina ja kije kyaswishiwa na muzhilo kingijisha Bakamonyi ba kwa Yehoba mu kyalo kyenu, nembelai ku ofweshi wa musampi wa mu kyalo kyenu. Mwakonsha kutaana keyala wa ofweshi wa musampi pa intaneti kwingijisha keyala wa www.jw.org/kqn. Bupe bo mwakonsha kutuma ke buno:

KUPANA BUPE KWA KUBULA KUBULAÑANA BYO BUKENGILA

Kutuma mali kwingijisha biñambañamba, ne tubikachi twa ku banki. Ku misampi imo mwakonsha kuba bino kwingijisha keyala wa jw.org nangwa keyalatu mukwabo.
Buno bwakonsha kwikala bupe bwa mali, bipe nangwa bintu bikwabo byanema. Mwafwainwa kutumina pamo na nkalata ibena kulumbulula kuba’mba ao mali nangwa bipe byo mwatuma bakebingijishe mo bakebela.

KUPANA BUPE NE KUBULAÑANA BYO BUKENGILA

Ke mali apanwa kuba’mba beengijishe, pano bino, bakonsha kumubwezhezha mwine mwinao inge wiakeba.
Mwafwainwa kutumina pamo na nkalata ya kulumbulula bikengila bobo bupe.

KUNENGEZHEZHA JIMO BYA KUPANA BUPE

Kununga pa bupe bwa mali ne bipe, kuji mashinda akwabo a kupainamo mali a kukwasha mwingilo wa Bufumu wa ntanda yonse. Ano mashinda atanchikwa panshipo. Saka mukyangye kutuma bupe kwingijisha jishinda jo mukeba, patanshi buulai ofweshi wa musampi wa mu kyalo kyenu kuba’mba muyuke mashinda o bengijisha mu kyokyo kyalo. Byo kiji kuba’mba mizhilo ya kafulumende ne mpaino ya misonko yapusana pusana, kyanema bingi kwipuzha dipatimenti utala pa bya mizhilo ne misonko uji pa musampi saka mukyangye kusalapo jishinda jawama ja kupainamo bupe.

Kwivimbila: Ke bupe bupanwa kupichila mu kutongola kije kingijisha Bakamonyi ba kwa Yehoba kuba’mba kikatambula mali amo a kwivimbila nangwa a penshonyi.

Mali aji ku Kipao: Mali aji ku kipao, bipepala bya kufishishapo mali ku kipao, nangwa mali a muntu watambula penshonyi akonsha kunengezhiwa nangwa kupanwa ku kije kingijisha Bakamonyi ba kwa Yehoba inge wafwa, kwesakana na mizhilo ya ku kyokyo kipao.

Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Bino bintu byakonsha kupanwa ku kije kingijisha Bakamonyi ba kwa Yehoba kuba’mba ke bupe bwapanwa bwa kubula kubwezha nangwa kutambula buno bupe inge mwine wafwa.

Bishimikwa ne Mpunzha: Bishimikwa nangwa mpunzha byakonsha kupanwa ku kije kingijisha Bakamonyi ba kwa Yehoba kupichila mu kupana bupe bwa kuba’mba bakebwingijishe mo bakebela, nangwa inge kya kuba muntu wapana nzubo, awa wapana nzubo wakonsha kukitwajijila kwikalamo saka akiji mumi.

Bupe bwa pa Mwaka: Bupe bwa pa mwaka ke lunengezho lulengela muntu kupana mali a penshonyi pa mwaka pa mwaka ku kije kingijisha Bakamonyi ba kwa Yehoba, ko kuba’mba mali o afwainwe aye mwine kutambulanga nangwa ye atongwele kuba’mba akatambulenga oo mali. Awa wapana buno bupe bakamukepesheshako misonko mu yewo mwaka ye atendekelamo kupana bobo bupe.

Buswe ne Mali Afiwa ku Kipamo: Bipe nangwa mali akonsha kupanwa ku kije kingijisha Bakamonyi ba kwa Yehoba kupichila mu kunemba buswe kwesakana na mwayila mizhilo, nangwa kutongola kije kikatambulanga bobo bupe. Luno lunengezho lwakonsha kulengela wapana buno bupe kumukepesheshako misonko.

Inge mukeba kuyukilapo bikwabo pa mashinda a kupainamo bupe bwa kukwasha mwingilo wa ntanda yonse wa Bakamonyi ba kwa Yehoba, monai buloshuwa wa kuba’mba Charitable Planning to Benefit Kingdom Service Worldwide uji mu Kizungu ne mu Kisipanishi. Uno buloshuwa walumbulula mashinda apusana pusana muntu mo akonsha kupaina bupe. Mashinda amo anembwa mu uno buloshuwa kechi akonsha kwingila mu kyalo kyenu ne, na mambo a misonko ne mizhilo ikwabo. Bantu bavula bakwasha mwingilo wetu wa ntanda yonse kabiji bamwenamo bingi mambo bebakepesheshako misonko inge bapana mu ano mashinda. Umvwe uno buloshuwa mo aji mu kyalo kyenu, mwakonsha kutambulako umo ku munembeshi mu kipwilo kyenu.

Pa kuba’mba muyukilepo byavula, mwakonsha kuchinta panembwa’mba “Make a Donation to Our Worldwide Work” kaikela panshi pa keyala wa jw.org, nangwa kwipuzha ku ofweshi wa musampi.