Twafwainwa Kutwajijila Byepi Kwikala na Muchima wa ‘Kupembelela’?

“Nkamupembelela.”—MIKA 7:7.

MUSAKUKUMBULA’MBA KA?

Ñanyi bintu byo twakonsha kufunjilako kwi Mika?

Ñanyi bintu byo tubena kupembelela?

Mu ñanyi mashinda mo twakonsha kumweshesha kusanta pa butekanye bwa Yehoba?

1. Ki ka kyakonsha kwitulengela kumona nobe mpelo yabanda kufika?

BUFUMU bwa Bumesiasa byo bwaikajikilwe mu 1914, moba apelako a bwikalo bwatama bwa kwa Satana atendekele. Na mambo a nkondo yajinga mwiulu, Yesu waelele Diabola ne bandemona banji pano pa ntanda. (Tangai Lumwekesho 12:7-9.) Satana wayuka amba “ujitu na kakimye kacheche.” (Lum. 12:12) Nangwa byonkabyo, kano “kakimye” katwajijila pa myaka yavula, kabiji bamo bakonsha kulanguluka’mba mpelo yabanda kufika. Byo tubena kupembela Yehoba kuleta mpelo ya buno bwikalo, nanchi ne atweba tumona nobe mpelo yabanda nyi?

2. Ñanyi mepuzho o tusakwisambapo mu uno mutwe?

² Kubula kutekanya kwatama bingi, mambo kwakonsha kwitulengela kuba bintu kwa kubula kulangulukapo bulongo. Pano twakonsha kwikala byepi na muchima wa kupembelela? Uno mutwe usakwitukwasha kwikala na muchima wa kupembela kupichila mu kukumbula ano mepuzho. (1) Twakonsha kufunjilako ka kwi ngauzhi Mika wajinga na muchima wa kupembelela? (2) Ñanyi bintu bikamwesha kuba’mba mpelo yafwenya pepi? (3) Twakonsha kumwesha byepi kusanta pa butekanye bwa Yehoba?

TWAKONSHA KUFUNJILAKO KA KWI MIKA?

3. Mu moba a kwa Mika, bintu byajinga byepi mu Isalela?

³ Tangai Mika 7:2-6. Ngauzhi wa Yehoba Mika wamwene bukishinka bwa bena Isalela kwi Yehoba byo bwailenga na kupwa kimye kyalaminenga Mfumu watama Ahaza. Mika waesakenye bena Isalela babujile bukishinka ku “tunkona” ne “luvimba wa miba.” Byonkatu mwiba wa kankona nangwa luvimba wa miba byo asa muntu wapitamo, ne bena Isalela basatukile byo byo bajinga, mambo bayanjishanga bakwabo ne kwibamanyika. Bwikalo bwabo bwatamine kya kuba bisemi kechi byakwatankene ne. Byo ayukile kuba’mba kechi wakonsha kupimpula bintu ne, Mika walombele kwi Yehoba na muchima yense. Kepo apembelejilenga mwine Lesa kubapo kimo. Mika waketekejile kuba’mba Yehoba ukolola bintu pa kimye kyanji kyafwainwa.

4. Ñanyi makatazho o tupitamo?

⁴ Byonka byo kyajinga kwi Mika, ne atweba tubena kwikala mu bantu betemwatu bene. ‘Babula kusanta, babula bukishinka, kabiji babula butemwe.’ (2 Timo. 3:2, 3) Kifita bingi ku muchima inge bo twingila nabo, bo tufunda nabo, ne ba mu kinkalankulo bamwesha muchima wa kwitemwatu abo bene. Nangwa byonkabyo, bakalume ba Lesa bamo babena kupita mu makatazho akilamo kubaya. Yesu waambile’mba baana banji ba bwanga bakebamanyikanga ne ku balongo babo. Pa kulumbulula byambo byanji byo bikaleta mabano, Yesu waambile byambo bipasha na biji mu Mika 7:6. Waambile’mba: “Naishile kwabanya muntu na shanji kabiji mwana wamukazhi na inanji, mulokazhi naye na inanjivyala. Kine, balwanyi ba muntu bakekala bonka ba mu nzubo yanji.” (Mat. 10:35, 36) Kyakatazha bingi kuchinchika inge balongo betu babula kwitabila ke betumanyike nangwa kwitwendeleka. Inge tubena kupita mu makatazho a uno mutundu, kechi twafwainwa kuleka ba mu kisemi kwitutwala mungi ne. Twayai tutwajijile kutekanya ne kwikala bakishinka byo tubena kupembelela Yehoba mwine kolola bintu. Inge twatwajijila kulomba bukwasho kwi aye, uketupa maana ne bulume bwa kwitukwasha pa kuba’mba tuchinchike.

5, 6. Yehoba wapesheshe byepi Mika, bino ñanyi bintu Mika byo abujile kumona?

⁵ Yehoba wapesheshe Mika pa butekanye bwanji. Mika wamwene mpelo ya bukalama bwa Mfumu Ahaza ne lufu lwanji. Kabiji wamwene mwana wa kwa Ahaza, Hezekiya, wajinga Mfumu wawama byo aswaine pa bufumu ne kubwezha mpopwelo ya kine. Byambo bya luzhachisho byaambile Yehoba pa bena Samaliya kupichila mwi Mika byafikile kimye bena Asilya kyo balukukile bufumu bwa ku kabeta ka ku buyeke bwa bena Isalela.—Mika 1:6.

⁶ Pano bino, Mika kechi wamweneko byafikile bungauzhi bonse bwaawile Yehoba kupichila mwi aye ne. Kya kumwenako, Mika wanembele’mba: “Mu moba akapelako mutumba paji nzubo ya Yehoba bakamwikazha ke mwine walepesha kukila mitumba ikwabo, kabiji bakamusuntwila peulu ya tutumbatumba. Kabiji mitundu ya bantu ikakungulukila konka, ne bantu ba mu mikoka yavula bakeya ne kwamba’mba: Twayai, tuye ku mutumba wa Yehoba.” (Mika 4:1, 2) Mika wafwile buno bungauzhi saka bukyangye kufika. Nangwa kya kuba waikalanga na bantu baubanga bintu byatama, aye watwajijile kwikala wakishinka kwi Yehoba kufikatu ne ku lufu. Pa mambo a kino, Mika wanembele’mba: “Ba mu mitundu yonse ya bantu benda mu mazhina a balesa babo pa mutundu, pa mutundu, bino atweba tukendanga mu jizhina ja Yehoba Lesa wetu myaka yonsetu.” (Mika 4:5) Nangwa kya kuba bwikalo bwakatezhe, Mika wapembelejilenga saka atekanya mambo waketekejile mwi Yehoba kuba’mba ukafikizha milaye yanji yonse. Uno ngauzhi wakishinka waketekejile mwi Yehoba kya kine.

7, 8. (a) Ñanyi kishinka kitulengela kwikala na luketekelo? (b) Ki ka kyakonsha kulengela kimye kwenda bukiji?

⁷ Nanchi ne atweba twaketekela mwi Yehoba nyi? Kuji kishinka kyakonsha kwitulengela kuba bino. Twimwena bibena kufika bungauzhi bwa kwa Mika. Mu ano ‘moba apelako,’ biumbi na biumbi bya bantu bafuma mu bisaka byonse, mu mikoka yonse, ne mu mitundu yonse baiya ku “mutumba paji nzubo ya Yehoba.” Nangwa kya kuba bafuma mu bisaka byapusana pusana, bano bapopweshi babunda “mapoko abo ne kwialula ke bya kujimako,” kabiji kechi bafunda “bya kulwa nkondo jibiji ne.” (Mika 4:3) Ke kintu kyanema bingi kwikala pa bantu ba mutende ba kwa Yehoba.

⁸ Kwambatu kine, tukebesha bingi Yehoba kufumyapo buno bwikalo bwatama. Pano bino, pa kuba’mba tupembelelenga saka twatekanya, twafwainwa kumonanga bintu byonka Yehoba byo ebimona. Wasala juba jo akachibilamo mambo a bantu kupichila mu “muntu ye atongola,” aye Yesu Kilishitu. (Byu. 17:31) Bino saka akyangye kuba bino, Lesa wapa bantu kimye kya “kuyukisha bulongo bukine” ne kwikela mwayila bukine pa kuba’mba bakapuluke. Bumi bwa bantu buji mu kizumba. (Tangai 1 Timoti 2:3, 4.) Inge twapayankana mu mwingilo wa kukwasha bantu kuyukisha bulongo bukine pe Lesa, juba ja bunchibamambo bwa kwa Yehoba kechi tukamona kuba’mba jabanda ne. Katatakatu jikafike. Byo jikafika, tukekala bingi na lusekelo pa kuvuluka kuba’mba twapayankene mu mwingilo wa kusapwila Bufumu.

ÑANYI BINTU BIKAMWESHA KUBA’MBA MPELO YAFWENYA PEPI?

9-11. Nanchi byambo biji mu 1 Tesalonika 5:3 byafika nyi? Lumbululai.

⁹ Tangai 1 Tesalonika 5:1-3. Katatakatu mikoka ya bantu ikambe’mba, “Mutende ne luzhikijilo.” Pa kuba’mba tukabule kujimbaikwa na bino byambo byo bakambanga, twafwainwa kutwajijila ‘kulaba ne kutekanya.’ (1 Tesa. 5:6) Pa kuba’mba tutwajijile kulaba ne kutekanya, twayai twisambe pa bintu bimwesha kuba’mba katatakatu babijike kuba’mba mutende ne luzhikijilo.

¹⁰ Nkondo itanshi ne ya bubiji byo yapwile, byalo byakebelenga bingi mutende. Nkondo itanshi ya ntanda yonse byo yapwile, balengele kipamo kya League of Nations na mulanguluko wa kuleta mutende. Kabiji nkondo ya kibiji ya ntanda yonse nayo byo yapwile, balengele kipamo kya United Nations kyayukanyikilwe kuba’mba kyo kikaleta mutende pa ntanda. Makafulumende ne bantangi ba bupopweshi balangulukilenga amba bino bipamo byo bikaletela bantu mutende. Kya kumwenako, kipamo kya United Nations kyabijikile kuba’mba mwaka wa 1986 ye Mwaka wa Mutende wa Ntanda Yonse. Mu yenka uno mwaka, bantangi ba bumulwila ntanda ne ba bupopweshi bapwijile pamo na Kipwilo kya Bakatolika na kulomba mutende.

¹¹ Kuno kubijika ko babijikile pa mutende nangwa kukwabotu kechi kwafikizhe byambo biji mu 1 Tesalonika 5:3 ne. Mambo ka o twaambila bino? Mambo ‘lonaiko lwa ponkapotu’ lukyangye kufika.

12. Twayukapo ka pa byo bakamba’mba “Mutende ne luzhikijilo”?

¹² Bañanyi bakabijika’mba, “Mutende ne luzhikijilo”? Bantangi ba mu Kilishitendomu ne ba mu bupopweshi bukwabo bakoba byepi? Nga bantangi ba makafulumende bakevwangamo byepi mu kuno kubijika? Binembelo kechi byaambapo pa byo kikekala ne. Kyo twayukakotu ke kya kuba’mba nangwa bakambe mu jishinda ja mutundu ka, bikekalatu bya bubela. Pa kyokya kimye, ino ntanda ikikekala mu maboko a kwa Satana. Kabiji ino ntanda ikatwajijilatu kutama. Kyakonsha kutama bingi inge twaketekela bino byambo bya bujimbijimbi bya kwa Satana ne kulala muzhilo wa kubula kwivwanga mu bya bumulwila ntanda.

13. Mambo ka bamalaika o bakwachila luvula lwa lonaiko?

¹³ Tangai Lumwekesho 7:1-4. Byo tubena kupembelela kufika kwa byambo biji mu 1 Tesalonika 5:3, bamalaika ba bulume bakwata luvula lwa lonaiko lukaleta malwa akatampe. Babena kupembelela ka? Mutumwa Yoano walumbulwile kuba’mba babena kupembelela kubika tutetesho pa bashingwa, “bakalume ba Lesa wetu.”a Inge bakapwishe kubika tutetesho twapelako, popo bakalekako luno luvula lwa lonaiko. Ñanyi kintu kikalondelapo?

14. Ñanyi bintu bimwesha kuba’mba, Babilona Mukatampe katatakatu bamonaune?

¹⁴ Babilona Mukatampe, ko kuba’mba bupopweshi bwa bubela bwa ntanda yonse katatakatu bukazhiye. “Mitundu ya bantu, mabumba, bisaka ne njimi ya bantu” kechi bakamukwasha ne. Luno twamona kala ne bintu bibena kumwesha kuba’mba katatakatu bamonaune. (Lum. 16:12; 17:15-18; 18:7, 8, 21) Mu ano moba tumvwa pa mwela ne mu mapepala a byambo byo babena kulengulula bupopweshi ne bantangi ba bupopweshi. Nangwa byonkabyo, bantangi ba mu Babilona Mukatampe bamona’mba bintu byonse bijitu bulongo. Bakakumya bingi. Panyuma ya kubijika kuba’mba “Mutende ne luzhikijilo,” makafulumende a mu ino ntanda ya kwa Satana akalukilamo bupopweshi bwa bubela ne kwibuzhiya. Babilona Mukatampe bakamuzhiya kikupu! Onkao mambo, kyanema bingi kupembelela bino bintu byanema saka twatekanya.—Lum. 18:8, 10.

TWAKONSHA KUMWESHA BYEPI KUSANTA PA BUTEKANYE BWA LESA?

15. Mambo ka Yehoba o atekenya?

¹⁵ Nangwa kya kuba bantu boba mwenga jizhina janji, Yehoba wibatekenya kufikatu ne kimye kyanji kya kubapo kimo byo kikafika. Yehoba kechi ukeba bantu banji bakishinka konaika ne. (2 Pe. 3:9, 10) Nanchi ne anweba byobyo mwiumvwa nyi? Juba ja Yehoba saka jikyangye kufika, twakonsha kumwesha byo tumusanchila pa butekanye bwanji mu mashinda alondelapo.

16, 17. (a) Mambo ka o twafwainwa kutelapo muchima kukwasha bakoka? (b) Mambo ka o kibena kukebewa kuba’mba bakoka babwele bukiji kwi Yehoba?

¹⁶ Kwashai bakoka. Yesu waambile’mba mwiulu mwikala lusekelo inge mukooko umo waeleka bamutana. (Mat. 18:14; Luka 15:3-7) Kyamwekeshatu patoka kuba’mba Yehoba wata bingi muchima bonse bamwesha byo batemwa jizhina janji, nangwatu inge bakoka pa kino kimye. Inge twakwasha bantu ba uno mutundu kubwela mu kipwilo, tulengela Yehoba ne bamalaika kusangalala bingi.

¹⁷ Nanchi ne anweba muji pa boba baleka kwingijila Lesa nyi? Kampe mu kipwilo muji wimubile kyatama kimulengejile kuleka kupwañana na jibumba ja Yehoba. Byo kiji kuba’mba papita kimye kyabaya, iipuzhai anwe bene amba: ‘Nanchi luno bwikalo bwami bwawama kukila kala nyi? Nanchi Yehoba ye wamfichishe ku muchima nyi, inyi muntu mbulwa kulumbuluka? Nanchi Yehoba Lesa wangubapo kala kyatama nyi?’ Kwambatu kine, Lesa witubila byawama kimye konse. Nangwa kya kuba kechi tubena kwikela mwayila kwipana kwetu ne, aye utwajijilatu kwitubila bintu byawama. (Yako. 1:16, 17) Katatakatu juba ja Yehoba jikafike. Kino kyo kimye kyo twafwainwa kubwela mu kyenyi kya Shetu wa mwiulu ne mu kipwilo muji luzhikijilo lwa kine.—Mpitu. 33:27; Hebe. 10:24, 25.

18. Mambo ka o twafwainwa kukokelanga babena kwitutangijila?

¹⁸ Kokelainga babena kwimutangijila. Byo aji Kafunga witutemwa, Yehoba witutangijila ne kwituzhikijila. Watongola Mwananji kwikala Kafunga Mwine Mukatampe wa jitanga. (1 Pe. 5:4) Bakulumpe babena kulama mikooko ya Lesa mu bipwilo kukila pa 100,000. (Byu. 20:28) Inge ketukokele batongolwa kutangijila, ko kuba’mba tubena kumusanchila Yehoba ne Yesu pa bintu byonse byo betubila.

19. Twakonsha kuba byepi pa kuba’mba tubule kushila mpunzha Satana?

¹⁹ Ikalai bakwatankana. Nga kino kilumbulula ka? Bashilikale bo bafunjisha bulongo kulwa nkondo inge bebalukuka ku balwanyi, mushilikale umo umo ukwatankana na bakwabo kya kuba kechi basha mpunzha pa kupichila balwanyi ne. Satana ubena kubaisha mashinda a kulukukilamo bantu ba kwa Lesa. Onkao mambo, kino kechi kyo kimye kya kwilwisha atwe bene na bene ne. Ke kimye kya kukwatankana ne kubula kuta muchima ku bilubo bya balongo betu ne kuketekela mwi Yehoba.

20. Ñanyi bintu byo twafwainwa kuba pa kino kimye?

²⁰ Twayai atweba bonse tutwajijile kulaba ku mupashi ne kwikala na muchima wa kupembelela. Twayai tupembelelenga saka twatekanya byo bakamba’mba, “Mutende ne luzhikijilo,” ne byo bakapwisha kubika tutetesho pa bilungi bya basalululwa. Panyuma ya kino, bamalaika bana popo bakalekako luvula lwa lonaiko, kabiji Babilona Mukatampe bakamonauna. Byo tubena kupembelela kubiwa kwa bino bintu byanema, twayai tutambwilenga lutangijilo lwa babena kutangijila mu jibumba ja Yehoba. Kange tushiile mpunzha Diabola ne bandemona ne. Kino kyo kimye kyo twafwainwa kumvwina lutundaiko lwa nyimbi wa masalamo lwa kuba’mba: “Kosai, michima yenu ichinchike, anweba bonse mwamutengela Yehoba.”—Sala. 31:24.

[Tubyambo twa mushi]

[Kipikichala pa peja 10]

[Bipikichala pa peja 12]

Bantu ba Yehoba bebikako kukwasha bakoka kubwela kwi Yehoba (Monai mafuka 16, 17)

[Kipikichala pa peja 14]

Kino kyo kimye kya kwibikako kubula kushila mpunzha Satana ne bandemona (Monai jifuka 19)