Mwanamukazhi Wafwilwa wa ku Zalefwata Wafwetelwe na Mambo a Lwitabilo Lwanji

MWANAMUKAZHI wafwilwa wakumbata mwananji kalombwana, umotu ye ajinga nanji. Uno mwanamukazhi ubena kumona nobe ubena kulota. Mambo papichiletu kakimye kacheche kufuma po alamijile uno kalombwana mu maboko anji saka afwa. Uno mwanamukazhi pano uji bingi na lusekelo byo abena kutala mwananji wasangulwa. Mwenyi waikelenga mu nzubo yanji wamwambijile’mba: “Talai, mwanenu’we, ke mumi.”

Papita ne myaka 3,000 kufuma pa ubijilwe luno lusanguko. Mwakonsha kutanga pa luno lusanguko mu 1 Bamfumu kitango 17. Mwenyi ye baikajilenga nanji wajinga Elaija ngauzhi wa Lesa. Nga inanji uno kalombwana wajinga ñanyi? Uno mwanamukazhi wafwilwa waikalanga mu muzhi wa Zalefwata kechi bamutongolapo jizhina ne. Lusanguko lwa mwananji lwakoseshe bingi lwitabilo lwanji. Byo musakutanganga, musakufunjilako bintu byanema bingi kwi aye.

ELAIJA WATANA MWANAMUKAZHI WAFWILWA WAJINGA NA LWITABILO

Yehoba wafuukwile kuba’mba kwikale kyashi kikatampe mu moba a bukalama bwa kwa Ahaba, Mfumu mubi wa bena Isalela. Elaija byo aawile kuba’mba kubena kwiya kyashi, Lesa wamufile na mambo a kwa Ahaba ne kumujisha mu jishinda ja kukumya. Bikwangala byo byamuletelanga shinkwa ne nyama. Yehoba waambijile Elaija amba: “Imana, uyenga ku Zalefwata, wa ku Shidona, ukekaleko mambo nakambizha kala mwanamukazhi wafwilwa wa konkakwa namba akakujishenga.”—1 Mfu. 17:1-9.

Elaija byo afikile mu muzhi wa Zalefwata, wamwene mwanamukazhi wafwilwa wayanda saka abena kutolaula nsala. Nanchi ye wajinga mwanamukazhi ukajishanga ngauzhi nyi? Pano wakonsheshe byepi kuba bino byo ajinga muyanji? Nangwa kya kuba Elaija kampe wazhinaukilenga, watendekele kwisamba na uno mwanamukazhi. Wamwambijile’mba: “Ndetelaipo mema pa nsanyi ntome.” Byo akiyilenga’mba, nkalete mema, Elaija wamubijikile’mba: “Munsendelepo ne kashinkwa mu kuboko.” (1 Mfu. 17:10, 11) Kupa uno mwenyi mema a kutoma kechi kwakatezhe uno mwanamukazhi ne, pakuba kumupa shinkwa kechi kwapelele ne.

Uno mwanamukazhi wamukumbwile’mba: “Monka mwaikajila na bumi Yehoba Lesa wenu, kafwapo nangwa kamo ko nasoka ne, kanatu mukono umo wa bunga buji mu kalondo, ne tumanyi tucheche tuji mu musashi; ne pano mbenakutola nsala ibiji namba ngye na kwituteka twami ami mwine ne mwanami wamulume, tuje ne kufwa tufwe.” (1 Mfu. 17:12) Akitwayai tumone bishinka byajinga mu uno mwisambo.

Uno mwanamukazhi wafwilwa wayukile kuba’mba Elaija wajinga mwina Isalela wakamwa Lesa. Kino kyamwekela mu byambo byanji bya kuba’mba, “monka mwaikajila na bumi Yehoba Lesa wenu.” Nangwa kya kuba uno mwanamukazhi wayukileko bicheche pe Lesa wa bena Isalela, pano bino kechi wamuyukile kya kuba waamba byambo nabiji bya kuba’mba, “Lesa wami” pa kwamba pe Yehoba ne. Muzhi wa Zalefwata mo aikalanga wajinga muzhi mukatampe wa bena Fenesya mu kyalo kya Shidona. Kyamweka mu muzhi wa Zalefwata mwaikalanga bantu bavula bingi bapopwelanga Baela. Nangwa byonkabyo, Yehoba wamwenemo kintu kyawama mu muchima wa uno mwanamukazhi wafwilwa.

Uno mwanamukazhi wafwilwa wa ku Zalefwata wajinga na lwitabilo nangwa kya kuba waikalanga mu bantu bapopwelanga bankishi. Yehoba watumine Elaija ku uno mwanamukazhi wafwilwa kuba’mba ebalamine pamo. Twakonsha tufunjilako kintu kyanema bingi ku kino.

Kechi bonse baikalanga mu Zalefwata mo bapopwelanga Baela bajinga na bubipisho ne. Yehoba pa kutuma Elaija ku uno mwanamukazhi wafwilwa wamwesheshe kuba’mba umona bantu bakishinka bakyangye kutendeka kumupopwela. Kya kine “mu bisaka byonse muntu wakamwa Lesa ne kuba byaoloka ye witabilwa kwi aye.”—Byu. 10:35.

Bantu banga bekala mu nyaunda yenu baji nobe uno mwanamukazhi wa ku Zalefwata? Nangwa kya kuba bekala mu bantu baji mu bupopweshi bwa bubela, bamo bakebesha bingi kuba byawama. Bakonsha kuyukako Yehoba pacheche nangwa ne, onkao mambo, bakeba kwibakwasha pa kuba’mba bayuke bupopweshi bwa kine. Nanchi mukebakeba ne kukwasha bantu ba uno mutundu nyi?

“PATANSHI MUKINGUBILEKO AMIWA KASHINKWA”

Akilangulukaipo bulongo pa kintu Elaija kyo aambijile uno mwanamukazhi wafwilwa kuba’mba amubile. Uno mwanamukazhi wamubujile’mba inge alenge kashinkwa kanji aye ne mwananji, byo basa kuja ne kufwa bafwe. Bino Elaija wamwambijile’mba ka? Wamwambijile’mba: “Kuchina ne; yainga mukobe monka mo mwaambila; patanshi mukingubileko amiwa kashinkwa mundetele, apa bino mutekenga kenu anwe bene ne mwanenu. Mambo Yehoba Lesa wa Isalela waamba bino amba: ‘Mu aka kalondo ka bunga, bunga kechi bukapwamo ne, ne mu awa musashi wa manyi, manyi kechi akapwamo ne, kufika ne ku juba jo akatuma mvula Yehoba pano panshi.’”—1 Mfu. 17:11-14.

Bamo inge baambile’mba, ‘Kechi nakonsha kwimupa kajo kami kapelako ne.’ Pano bino, uno mwanamukazhi wafwilwa kechi wakaine ne. Nangwa kya kuba kechi wayukile Yehoba bulongo ne, waketekejile Elaija, ne kuba byo amubujile. Kino kintu kyaesekele lwitabilo lwanji. Uno mwanamukazhi waubile kintu kya maana.

Lesa kechi wamulekelejile uno mwanamukazhi wafwilwa wayanda ne. Kwesakana na bya mwambijile Elaija, Yehoba wibapelenga kajo ka kuja Elaija, mwanamukazhi wafwilwa ne mwananji kufikatu ne kyanshi byo kyapwile. “Bunga kechi bwapwile mu kalondo ne, ne manyi nao kechi apwile mu musashi ne, monka mwayijile jiwi ja Yehoba jo aambile mwi Elaija.” (1 Mfu. 17:16; 18:1) Inge kya kuba uno mwanamukazhi wakaine, awa shinkwa ye alengele ku abwa bunga ne manyi inge ye wapeleleko. Pa kuba aye waswile na mambo a lwitabilo, waketekejile Yehoba kyo kyamulengejile kupa Elaija patanshi.

Ku kino tubena kufunjilako kuba’mba Yehoba upesha bonse boba bintu na lwitabilo. Yehoba ukemukwasha inge mwamwesha lwitabilo kimye bukishinka bwenu kyo bwaesekwa. Ukemumwena bya mu bwikalo, ukemuzhikijila, kabiji ukekala Mulunda nenu wa kwimukwasha kuchinchika meseko.—Lupu. 3:13-15.

Mu 1898, Kyamba kya Usopa kya Zion’s Watch Tower kyalumbulwile kishinka kyo tufunjilako ku uno mwanamukazhi amba: “Uno mwanamukazhi bamukwashishe kwi Nkambo mambo wajinga na lwitabilo lwamulengejile kukokela. Inge waji wakaine kumwesha lwitabilo, inge kwamwekele mukwabo mwanamukazhi wafwilwa wa kuba bino. Kyo kimotu ne atweba pa bimye bimo mu lwendo lwetu lwa kuya ku bumi, Nkambo uswisha bintu byeseka lwitabilo lwetu. Inge twauba bintu mu lwitabilo uketupesha, inge twabula kuba bino, tukapusumuna jishuko.”

Inge ketupite mu meseko, twafwainwa kukeba lutangijilo lwa Lesa kufuma mu Binembelo ne mu mabuku alumbulula Baibolo. Ne kubila bintu monka mwayila lutangijilo lwa kwa Yehoba nangwa kya kuba kyamweka kukatazha kuba bino. Kya kine, uketupesha inge ketube bintu mwayila bino byambo bya maana bya kuba’mba: “Ketekela mwi Yehoba na muchima wobe yense, ne kuta muchima ku milangwe yobe obe mwine ne. Umuvulukenga konse konse ko uya ne aye ukakolwela mashinda obe.”—Mana 3:5, 6

‘MWAIYA KUNO NA KULETA LUFU KU MWANAMI NYI?’

Lwitabilo lwa uno mwanamukazhi wafwilwa lwaesekelwe mu jishinda jikwabo. Jishimikila ja mu Baibolo jaamba’mba: “Pa kupitapo moba mwana wa mulume wa yewa mwanamukazhi mwina nzubo wakolelwe; kabiji kikola kyanji kyakoleshe, kya kuba ne kufwa wafwile.” Pa kukeba kuyuka kyalengela mwananji kufwa, uno mwanamukazhi waambijile Elaija amba: “I kika kyo natamisha kwi anweba muntu wa Lesa? Mwaiya kuno na kumvulula bubi bwami ne kuleta lufu ku mwanaminyi?” (1 Mfu. 17:17, 18) Bino byambo byo aambile ku muchima saka kwakola byatala mwepi?

Nanchi uno mwanamukazhi wavulukile mambo o alengele ayajishenga jiwi janji ja mu muchima nyi? Nanchi walangulukile kuba’mba lufu lwa mwananji lwafuma kwi Lesa kabiji Elaija yeye baingijishe kwi Lesa kuleta lufu ku mwananji nyi? Baibolo kechi waambapo ne, bino kishinka kimo kyalalatu patoka: Uno mwanamukazhi kechi wapelengamo Lesa mambo ne.

Kyafwainwa kyamukolele bingi ku muchima Elaija pa lufu lwa uno kalombwana wa mwanamukazhi wafwilwa ne byo amujijile’mba kwiya kwa uno ngauzhi ko kwalengela mwananji kufwa. Wasendele uno kalombwana wafwa ne kumutwala pa nzubo ya peulu, kabiji Elaija wajijile’mba: “Anweba Yehoba Lesa wami, mwaleta kala bya malwa ne pa uno mwanamukazhi ye naikalako bya kumwipayila mwananji wa mulumenyi?” Uno ngauzhi kyamukolele bingi mu muchima pa kulanguluka pa mwenga ukeya pa jizhina ja Lesa inge waswisha kino kintu kyatama kumwekela uno mwanamukazhi wawama uji na muchima wa kutambwila benyi. Elaija wamusashijile’mba: “Anweba Yehoba Lesa wami, lekai mupashi wa ye uno mwana abwele mwi aye jibiji.”—1 Mfu. 17:20, 21.

“TALAI, MWANENU’WE, KE MUMI”

Yehoba waumvwine. Mwanamukazhi wafwilwa walamine ngauzhi kabiji wajinga na lwitabilo. Kyamweka Lesa waswishe kikola kwipaya uno kalombwana mambo wayukile’mba usakumusangula. Kabiji wayukile ne kuba’mba luno lusanguko lutanshi luji mu Binembelo lukalengela bantu bavula kulutwe kwikala na luketekelo. Elaija byo amusashijile, Yehoba wasangwile uno kalombwana. Akifwanyikizhai lusekelo lwajinga na mwanamukazhi wafwilwa, Elaija byo amwambijile’mba: “Talai, mwanenu’we, ke mumi.” Mwanamukazhi wafwilwa waambijile Elaija amba: “Pano po po nayuka namba anweba mwi muntu wa Lesa, kabiji ne jiwi ja Yehoba jilupuka ku kanwa kenu jo ja kine.”—1 Mfu. 17:22-24.

Jishimikila jiji mu 1 Bamfumu kitango 17 kechi jaambapo bikwabo pa uno mwanamukazhi ne. Uno mwanamukazhi kyamweka watwajijile kwingijila Yehoba mu bukishinka mambo ne Yesu waambile byambo byawama pe aye. Jino jishimikila jitufunjisha kuba’mba Lesa upesha bonse bobila byawama bakalume banji. (Mat. 25:34-40) Jimwesha ne kuba’mba Yehoba umwena bintu bantu banji bakishinka nangwa bwikalo bwakatazhapotu byepi. (Mat. 6:25-34) Jino jishimikila jitulengela ne kushiinwa kuba’mba Yehoba uji na bulume kabiji ukebesha bingi kusangula bafwa. (Byu. 24:15) Kwambatu kine, bino ke bishinka byanema bingi bitulengela kuvuluka mwanamukazhi wafwilwa wa ku Zalefwata.