MEPUZHO A MU BAIBOLO A KUMBULWA
Nanchi bupopweshi bonse bunemeka Lesa nyi?
Kampe mwakyumvwapo kala masawakya a bibena kumweka mwaya ntanda pa waileshi nangwa pa TV, javula bantu ba mu bupopweshi bo boba bintu byatama. Kechi bupopweshi bonse butangijilwa na Lesa ne. (Mateo 7:15) Kwa kubula nangwa kuzhinaukatu ne, bantu bavula bebatwala mungi.—Tangai 1 Yoano 5:19.
Nangwa byonkabyo, Lesa umona bantu batemwa byawama ne bakeba kuyuka bukine pe aye. (Yoano 4:23) Lesa ubena kwita bano bantu ne kwibafunjisha bukine buji mu Baibolo.—Tangai 1 Timoti 2:3-5.
Mwakonsha kuyuka byepi bupopweshi bwa kine?
Yehoba Lesa ubena kukwatankanya bantu bafuma mu bupopweshi bwapusana pusana kupichila mu kwibafunjisha bukine ne kwibafunjisha kwitemwa abo bene na bene. (Mika 4:2, 3) Onkao mambo, bupopweshi bwa kine buyukanyikilwa ku byo beta muchima abo bene na bene.—Tangai Yoano 13:35.
Yehoba Lesa ubena kukwatankanya bantu bonse kupichila mu mpopwelo yanji ya kine.—Salamo 133:1
Bapopweshi ba kine, lwitabilo lwabo ne bwikalo bwabo bwaimena pa bifunjisha Baibolo. (2 Timoti 3:16) Banemeka bingi jizhina ja Lesa. (Salamo 83:18) Kabiji basapwila kuba’mba Bufumu bwa Lesa bo bonkatu bantu bonse bo bafwainwa kuketekela. (Danyela 2:44) Boba byonka byaubanga Yesu kupichila mu ‘kumwesha kyeya’ ne kubila bantu bo bekala nabo byawama. (Mateo 5:16) Onkao mambo, bena Kilishitu ba kine bayukanyikwa byo baya ku mazubo a bantu bo bekala nabo kinkalankulo na kwisamba nabo mambo awama a Bufumu bwa Lesa.—Tangai Mateo 24:14; Byubilo 5:42; 20:20.