MEPUZHO A MU BAIBOLO AKUMBULWA

Nanchi bantu bafwa bakekala na bumi jibiji nyi?

Yehoba Lesa ye Nsulo ya bumi. (Salamo 36:9) Nanchi kechi kyayilamo kuba’mba uno yenka Lesa ukasangula bantu bafwa nenyi? Baibolo witulaya’mba ukooba byonka bino kulutwe na lwendo. (Tangai Byubilo 24:15) Ukebasangwila ka?

Mulenga wetu walengele bantu amba bakekalenga myaka ne myaka pano pa ntanda. (Ntendekelo 1:31; 2:15-17) Abino byo byo abena kukeba kubila bantu. Kimukola bingi ku muchima kumona makatazho avula o tubena kupitamo lelo jino, kabiji abena kulengela bantu kufwa bukiji.—Tangai Yoba 14:1, 14, 15.

Bantu bo bakasangula bakekalanga kwepi?

Nanchi Lesa walengele bantu amba bakekalenga mwiulu nyi? Ine. Lesa walengele ba malaika kuba’mba bakekalenga mwiulu. Pakuba bantu wibalengele’mba bakekalenga pano pa ntanda. (Ntendekelo 1:28; Yoba 38:4, 7) Kwesakana na bino bishinka, monai bantu Yesu bo asangwile. Wasangwile bantu pano ponka pa ntanda. Kyo kimotu, ne bantu bavula bo bakasangula kulutwe na lwendo, bakekala ponka pano pa ntanda.—Tangai Yoano 5:28, 29; 11:44.

Pano bino, Lesa wasala bantu bamo bacheche kuba’mba akebasangule kuya mwiulu, mo bakekala na mibiji ya mupashi. (Luka 12:32; 1 Kolinda 15:49, 50) Aba bo bakasangula kuya mwiulu bakekala bamfumu pamo ne Kilishitu ne kulama ino ntanda.—Tangai Lumwekesho 5:9, 10.