MEPUZHO A MU BAIBOLO A KUMBULWA

Nanchi mwaketekela amba bafu bakasangulwa nyi?

Lufu lujitu nobe muntu walala mambo bafu kafwako kyo bayuka ne, kabiji kechi bakonsha kuba kintu kiji kyonse ne. Nangwa byonkabyo, Mulenga walengele bumi wakosha kubusha bafu kupichila mu lusanguko. Pa kuba’mba amweshe kino, Lesa wapeele Yesu bulume bwa kusangula bantu bamo bafwile.—Tangai Musapwishi 9:5; Yoano 11:11, 43, 44.

Lesa walaya kuba’mba bantu bafwa baji mu kivuluko kyanji ukebasangula kwikala mu ntanda ipya mukekala bololoke. Bafu bakatwajijila kwikala mu bilende kufikila kimye Lesa kyo a kebapa bumi jibiji. Lesa wa Bulume bonse ukebesha kwingijisha bulume bwanji kusangula bafu.—Tangai Yoba 14:14, 15.

Kikekala byepi ku bantu bakasangulwa?

Kimye Lesa kyo akasangula bantu, bakeyuka abo bene, balunda nabo ne bisemi byabo. Nangwa kya kuba’mba mubiji wa muntu ubola, Lesa wakonsha kusangula muntutu umo na mubiji byonka byo ajinga kala.—Tangai 1 Kolinda 15:35, 38.

Bantu bachechetu bo basangulwa ne kuya na kwikala mwiulu. (Lumwekesho 20:6) Bavula bakasangulwa ne kwikala mu Paladisa wakatataka pano pa ntanda. Bano bakatendeka kwikala bwikalo bwakatataka ne kwikala myaka ne myaka.—Tangai Salamo 37:29; Byubilo 24:15.

Umvwe mukeba kuyukilapo byavula monai bitango 6 ne 7 bya uno buku, Nanchi Baibolo Kine Ufunjisha’mba Ka?, wanembwa na Bakamonyi ba kwa Yehoba

Mwakonsha ne kukopolola pa www.jw.org

[Kipikichala pa peja 16]

Mu ñanyi jishinda lufu mo lwaikela nobe kulala tulo?