Nataana Mutende na Lesa ne na Bamama

BAMAMA banshikishe’mba: “Mambo ka o ubujila kukeba kupopwela bashakulu bobe? Nanchi kechi wayuka’mba bo balengejile’mba wikaleko nenyi? Nanchi kechi ukeba kwibasanchila nenyi? Wakonsha kulengulula byepi bisho byo twalama kufuma ku bisemi bya kala? Kukana kunemeka bashakulu betu kyo kimotu ne kwamba’mba mpopwelo yetu yatama.” Panyuma ya kwamba bino, Bamama batendekele kujila.

Papichiletu bañondo bacheche kufuma juba jaishile Bakamonyi ba kwa Yehoba na kukeba amba bafunjishenga bamama Baibolo. Bamama kechi bakebelenga kufunda nabo ne, bino pa kwibamwesha mushingi, bebabuujile’mba bafundenga ne amiwa. Pano bino, banzhingijile, kintu kyo babulanga kuba, mambo kimye kyonse nebakookelanga. Bino na mambo a kuba nakebelenga kusangajika Yehoba, pa kikye kimye kechi nebakookejle ne. Kechi kyapelele ne, bino Yehoba wankoseshe.

UFUNDA PE YEHOBA

Bonse mu kisemi kyetu bajinga ba Buddha, byonkatu biji bantu bavula mu Japan. Bino panyuma ya kufunda na Bakamonyi bwa kwa Yehoba pa bañondo babiji, nashiinwe kuba’mba Baibolo waamba bya kine. Kimye kyo nafunjile’mba nji na Tata wa mwiulu, nakebeshenga kumuyuka bulongo. Patanshi, amiwa ne Bamama twatemenwe bingi kwisamba pa bintu byo nafunjilenga. Natendekele kutanwa ku kupwila pa Mulungu pa Nzubo ya Bufumu. Byo nafunjilenga bintu byavula, nabuujile Bamama amba nsakuleka kulondela bisho bya ba Buddha. Ponkapotu bazhingijile. Baambile’mba: “Kwikala na muntu mu kisemi kyetu wabula kutemwa bashakulu betu kulengesha bumvu.” Bañambijile’mba ndeke kufunda Baibolo ne kutanwa ku kupwila. Kechi naketekejile’mba bamama bakonsha kwamba bino ne. Baikeletu nobe muntu mukwabo ye nabujile kuyuka.

Batata nabo baitabizhe byaambile Bamama. Nafunjile mu Efisesa kitango 6 amba Yehoba ukeba’mba nkookelenga bansemi. Nakebelenga’mba mu kisemi kyetu mwikale mutende jibiji, kabiji nalangulukile’mba inge mbena kwibomvwina, ne abo bakatendeka kuñumvwina. Pa kyokya kimye, nanengezhezhenga kunemba mpeso ku sukulu, onkao mambo, nakookejile byaambilenga bansemi pa bañondo basatu. Bino namulayile Yehoba namba nkatendeka kupwila jikwabo inge bano bañondo bapwa.

Byo nafuukwilepo byatamine mu mashinda abiji. Kitanshi, nalangulukilenga’mba nangwatu pakapite bañondo basatu, nkatwajijila kwikala na kizaku kya kwingijila Yehoba. Pano bino, bulunda bwami ne aye bwakookele bingi. Kya bubiji, Batata ne Bamama po po bakijilemo kunkanya kwingijila Yehoba.

BUKWASHO NE KUNKANYA

Ku Nzubo ya Bufumu, nasambakene Bakamonyi bavula bo bakainyenga ku bisemi byabo. Bambuujile kuba’mba Yehoba ukankosesha. (Mateo 10:34-37) Bandumbulwijile’mba inge natwajijila kwikala wa kishinka kwi Yehoba, ba mu kisemi kyetu nabo bakonsha kufunda pe aye. Nakebelenga kukinka manungo mwi Yehoba, onkao mambo, natendekele kulomba na mukoyo.

Ba mu kisemi kyetu bankainyenga mu mashinda apusana pusana. Bamama bansashijilanga amba ndeke kufunda, kabiji baesekanga kwisamba bulongo ne amiwa. Bimye byavula, naikalangatu nzoo. Inge nakumbula, javula twipachikanga mambo bonse twakebanga kumwesha’mba byo tubena kwamba byo bishinka. Bino luno nayuka’mba inge nanemekele byaumvwanga Bamama ne byo baitabijilemo, kampe inge kechi twatobokanga ne. Bansemi bampanga mingilo yavula pa kuba’mba mbulenga kufuma pa nzubo. Bimye bimo banshinkilanga pangye nangwa kubula kunshilapo kajo.

Bamama baambilanga ne bantu bakwabo amba bebakwasheko kwisamba ne amiwa. Baambijile bafunjishi bami, bino nabo bakankelwe. Bamama bantwajile ku bakulumpe babo ba pa nkito kuba’mba bangitabishe’mba bupopweshi bonse bwatutu. Kabiji batumijile foni bakilongo betu saka bajila pa kwibalomba’mba bebakwasheko. Kino kyanzhingijishe bingi. Bino bakulumpe mu kipwilo bambuujile’mba inge Bamama babena kubuulako bakwabo pa byo tubena kupitamo, ko kuba’mba babena kwibasapwila.

Bansemi bakebelenga’mba nkaye ku yunivesiti pa kuba’mba nkatwele nkito yawama. Bonse twazhingijile bingi kya kuba twakankelwe ne kwisamba pa jino jashi saka twatekanya, onkao mambo, nebanembejile makalata avula a kwibalumbulwila byo nakebelenga kuba mu bwikalo bwami. Batata bazhingijile bingi ne kuñambila’mba: “Inge ubena kulanguluka’mba wakonsha kutaana nkito, ukeitaane kesha, inge ne, ukafumepo pano pa nzubo.” Nalombele kwi Yehoba amba ankwashe. Juba jalondejilepo byo najinga mu mwingilo, banyenga babiji bañambijile’mba bakeba kuntwezha nkito ya kufunjisha baana babo. Batata kechi watemenwe ne, onkao mambo balekele kwamba ne amiwa ne kuba bintu nobe amiwa mfwapo. Bamama baambile’mba kyakonsha ne kuwamapo inge naikala mbanzhi kukila kwikala Kamonyi wa kwa Yehoba.

Bimye bimo kechi nayukanga inge kya kuba Yehoba wakebanga amba nkainenga bansemi mu jino jishinda ne. Onkao mambo, nalombanga kwi Yehoba ne kulanguluka languluka pa byaamba Baibolo pa butemwe bwanji. Kino kyankwashishe kukasuluka mu milanguluko ne kuyuka’mba kilengela bansemi kunkanya ke na mambo a kuba baakamwa pe amiwa. Yehoba wankwashishe kutendeka kulanguluka bulongo ne kuyuka bya kuba. Kabiji kimye kyonse kyo nayanga mu mwingilo kyandengelanga kutemwa bingi mwingilo. Nakebeshe kwikala painiya.

BYO NATENDEKELE BUPAINIYA

Banyenga bamo byo baumvwine’mba nkeba kwikala painiya, bañambijile’mba nkipembelele bansemi batontoloke. Nalombele maana kwi Yehoba, kukebakeba mu mabuku, kulanguluka pa ene mambo o nakebejilenga kwikala painiya, ne kwisamba na balongo ne banyenga baingila pa myaka yavula. Kepo nafuukwilepo amba nkeba kutokesha Yehoba ku muchima. Kabiji nayukile ne kuba’mba nangwatu inge nkabande kutendeka bupainiya, napotu bansemi bakatwajijila kunkanya.

Natendekele kwingila bupainiya mu mwaka wami wapeleleko ku sekondale. Panyuma ya kwingilako bupainiya pa kimye kicheche, nakebelenga kuya ku mpunzha kwakepele basapwishi. Bino Batata ne Bamama kechi bakebelenga amba mfume pa nzubo ne. Onkao mambo, napembejileko amba mfikizhe myaka 20. Kepo naipwizhe ofweshi wa musampi kuntuma kuya na kwingijila ku kabeta ka ku bulenge bwa Japan kwipi na bakilongo bami pa kuba’mba Bamama bakabulenga kwakamwa bingi.

Byo naingijilenga uno mwingilo, kyandetejile bingi lusekelo pa kumona bavula bo nafunjishenga Baibolo ke babatizhiwe. Natendekele kufunda Kizungu mambo nakebelenga kwingilako pakatampe. Pa kumona kubambakana kwa bapainiya beikajila babiji bajinga mu kipwilo kyetu ne byo bakwashishenga bantu, ne amiwa nafuukwilepo kukeba kwikala painiya wiikajila. Mu kyonkakye kimye, Bamama bakolelwe bingi bimye bibiji, kabiji pa bino bimye byonse nabwelanga ku nzubo na kwibakwasha. Kino kibakumishe bingi, kabiji bakepesheko kunzhingijila.

MAPESHO AVULA KUFUMA KWI YEHOBA

Byo papichile myaka itanu na ibiji, mulongo umo pa bano bapainiya beikajila bo naji kwambapo patanshi, aye Atsushi, wantumijile nkalata. Wakebelenga kunsongola, onkao mambo, wakebelenga kuyuka inge namutemwa. Kechi namutemenwe kya kuba nakeba kusongolwa kwi aye ne, kabiji kechi nalangulukangapo amba ne aye wantemenwe mu jino jishinda ne. Panyuma ya ñondo umo, namukumbwile’mba nakonsha kutemwa kumuyuka bulongo. Twaishile kutaana kuba’mba twajinga na bikonkwanyi bimotu. Twakebelenga kutwajijila mu mwingilo wa kimye kyonse ne kwipana kwingila mwingilo yense ye bakonsha kwitupa. Mu kuya kwa moba, twisongwele. Natemenwe bingi pa kumona Batata, Bamama ne bakilongo bakwabo baiya ku masongola etu.

Palutwe kacheche, byo twaingijilenga bupainiya bwa kimye kyonse, ba Atsushi bebatongwele kwikala kalama wa mwanzo wa kukwasha. Mu kuya kwa kimye, betutongwele kwikala bapainiya beikajila, kabiji palutwe kacheche, ba Atsushi bebatongwele kwikala kalama wa mwanzo. Kimye kitanshi kyo twapwishishe kufwakesha bipwilo byonse mu mwanzo wetu, twatambwijile foni kufuma ku ofweshi wa musampi. Betwipwizhe inge twakonsha kutemwa kuvilukila ku kyalo kya Nepal ne kuya na kutwajijila kwingijila mu mwanzo.

Naakaminwe byakonsheshe kumvwa bansemi bami inge navilukila kwalepa bingi. Byo nebatumijile foni, Batata bakumbwile’mba, “Mpunzha yo mubena kuyako yawama bingi.” Mulungu umo saka nkyangye kwibabuula bino, balunda nabo bebapele buku waambilenga pa kyalo kya Nepal, kabiji Batata balangulukilenga’mba kyakonsha kuwama kuya na kufwakasha ku kino kyalo.

Twatemenwe bingi kwikala na bantu ba mu kyalo kya Nepal mambo ke bantu bakasuluka bingi. Mu kuya kwa moba, kyalo kya Bangladesh bekinungile ku mwanzo wetu. Nangwa kya kuba kino kyalo kiji kwipi na kyalo kya Nepal, bino byalo byapusana bingi. Twaingijishanga mashinda a kusapwilamo apusana pusana. Panyuma ya myaka itanu, betutumine jikwabo ku Japan, ko tubena kwiyowa kwingijila mu mwanzo.

Nafunjile byavula pe Yehoba kimye kyo twaingijilenga mu Japan, mu Nepal, ne mu Bangladesh. Bantu mu bino byalo baji na bisho ne byubilo byapusana pusana. Kabiji muntu yense wapusanako na bakwabo. Nemwena Yehoba byo ata muchima muntu yense, kumutambwila, kumukwasha ne kumupesha.

Nji na bintu byavula bindengela kusanchila Yehoba. Wanswisha kumuyuka ne kumwingijila, kabiji wampa mwanamulume wawama mwina Kilishitu kwikala mwatawami. Lesa wankwasha kufuukula bintu bulongo, kabiji luno nji na bulunda bwawama ne aye ne na kisemi kyami. Namusanchila bingi Yehoba mambo amiwa ne Bamama twaikala balunda bawama jibiji. Nji bingi na lusekelo mambo nataana mutende na Lesa ne na bamama.