Jishimikila Janema Bingi

Baibolo wapusanako bingi na mabuku akwabo a bupopweshi. Kafwako buku mukwabo wapimpula byaitabilamo bantu pa myaka yavula ne. Kabiji ye bukutu bantu ye bakebesha kuyuka byo aambapo ne kumulengulula.

Bashayuka bamo bazhinauka amba Mabaibolo ajiko ano moba kechi aesakana na binembelo bitanshi ne. Shayuka wafunda pa bya bupopweshi waambile’mba: “Kechi twakonsha kwamba’mba Mabaibolo atuntululwa luno aesakana na binembelo biine bitanshi ne. Mabaibolo ajiko lelo jino muji byambo byavula byapusana na byambo biine bitanshi.”

Bamo bazhinauka inge byambo biji mu Baibolo bya kine na mambo a bupopweshi mo bakomena. Faizal bamufunjishe ku bansemi banji babula bena Kilishitu kuba’mba Baibolo ke buku wazhila, bino bapimpula byambo bijimo. Waambile’mba: “Na mambo a bino, nazhinaukanga inge bantu babena kukeba kumfunjisha bya mu Baibolo. Mambo kechi bajinga na Baibolo mwine mutanshi ne. Wapimpulwa.”

Nanchi kyanema kuyuka inge Baibolo wapimpulwa nangwa nenyi? Langulukai pa ano mepuzho: Nanchi mwakonsha kuketekela milaye ya mu Baibolo yawama ya kulutwe inge kya kuba kechi mwayuka inge ino milaye yajinga mu binembelo biine bitanshi nenyi? (Loma 15:4) Nanchi mwakonsha kwingijisha mafunde a mu Baibolo pa kusala nkito, bya kwikala na kisemi nangwa kusala bupopweshi inge kya kuba Mabaibolo ajiko luno mwayulatu milanguluko ya bantu nyi?

Nangwa kya kuba Mabaibolo atanshi aleka kumweka, twakonsha kutaana mabuku a kala kubikako ne mamanyusikilipiti a Baibolo avula. Pano nga ano mamanyusikilipiti bealamine byepi pa kuba’mba abule kubola, kwionauna ku bantu ne kubula kipimpula byambo bijiimo? Kuyuka bino bizumba kulengela byepi kushiinwa’mba Mabaibolo ajiko luno a kine? Twayai tutaane mikumbu ya ano mepuzho mu jishimikila janema jalondelapo.