Nanchi Busapwishi Bwenu Buji Nobe Kime Nyi?

MWINGILO wetu wa kusapwila wanema bingi. Bino kechi bonse bo tusapwilako bayuka kino kishinka ne. Nangwatu inge bantu batemwa byamba Baibolo, bino kechi bamona buneme bwa kufunda Baibolo ne atweba ne.

Akilangulukai pe ba Gavin. Bayanga na kupwila pa Nzubo ya Bufumu, bino kechi bakebanga kufunda Baibolo ne. Ba Gavin baamba’mba kechi bayukile byavula pa Baibolo ne, kabiji kechi bakebelenga bantu kuyuka kino ne. Bachinanga amba bakeya kwibabuula kutwela mu bya bupopweshi, kabiji kechi bakebanga kwibabepa ne. Mwalangulukapo byepi? Nanchi kyapelele kukwasha ba Gavin nyi? Langulukai pa bintu byawama bifumamo inge muntu wafunda Baibolo. Yehoba wabuujile bena Isalela amba: “Byambo byami bikapanganga nobe kime, byonka biji mvula umimina pa nsono.” (Mpitulukilo ya mu Mizhilo 31:19, 30; 32:2) Twayai tufundeko bintu bimo byuba kime ne kwesakanyako busapwishi bwetu pa kuba’mba tuyuke bya kukwasha “bantu bonse.”—1 Timoti 2:3, 4.

BUSAPWISHI BWETU BWAKONSHA KWIKALA BYEPI NOBE KIME?

Kime kiji nobe mvula umima. Kime kilengwa bichebiche kimye luuya luji mu mwela kyo lwaluka ke mindondo ya mema. Nga byambo bya kwa Yehoba ‘byapangilenga byepi nobe kime’? Wisambanga na bantu banji mu jishinda ja lusa, saka atekanya ne kumwesha’mba wibata muchima. Twakonsha kulondela byuba Yehoba kupichila mu kunemeka byaitabilamo bantu. Twibatundaika kulanguluka pa bishinka ne kwifuukwilapo abo bene. Inge twamwesha’mba twibata muchima mu jino jishinda, bantu bakonsha kuswa byo tubena kwibafunjisha, kabiji mu mwingilo wetu mukafumanga byawama.

Kime kikokolosha. Mwingilo wetu wa kusapwila ukakokolosha bantu inge twaingijisha mashinda apusana pusana a kwibafunjishishamo bukine. Mulongo wa jizhina ja Chris patanshi washikishe ba Gavin inge bakebelenga kufunda Baibolo, bino kechi wibakanjikizhe kuswa kufunda ne. Pakuba, wakebelepo mashinda akwabo a kukwashishamo ba Gavin kukasuluka kufunda Baibolo. Ba Chris babuujile ba Gavin amba kuji byambo byanema biji mu Baibolo yense, kabiji kufunda pa bino byambo kukebakwasha kumvwisha byo bafunda pa kupwila. Kepo ba Chris balumbulwile’mba bungauzhi bwa mu Baibolo bo bwibalengejile kushiinwa’mba Baibolo wamba bya kine. Na mambo a kino, besambile bimye byavula pa bungauzhi bwafika kala. Ino misambo yakokolweshe ba Gavin, onkao mambo baswile kufunda Baibolo.

Kime kikwasha bijimwa kubula kuuma. Mu kimye kya kisalo mu Isalela, kwikala bingi kyuya kabiji pa bañondo bavula, mvula kechi unoka ne. Kwa kubula kime, bijimwa byuuma ne kufwa. Yehoba waambile amba mu moba etu, kukekala kyashi, ko kuba’mba bantu bakomvwanga kilaka “kya kukeba kumvwa byambo bya Yehoba.” (Amosi 8:11) Walayile’mba bashingwa bakekala “nobe kime kyafuma kwi Yehoba” kimye kyo bakasapwilanga mambo awama a Bufumu pamo na “mikooko ikwabo.” (Mika 5:7; Yoano 10:16) Mambo awama o tusapwila ke jishinda jimo Yehoba jo apainamo bumi ku boba bomvwa kilaka kya bukine. Nanchi munemeka ano mambo awama nyi?

Kime ke mapesho afuma kwi Yehoba. (Mpitulukilo ya mu Mizhilo 33:13) Mwingilo wetu wakonsha kwikala mapesho, nangwa bupe ku boba baswa kufunda Baibolo. Kufunda Baibolo kwajinga ke mapesho ku ba Gavin mambo bataaine mikumbu ya mepuzho abo onse. Mu kimye kicheche, bafunjile ne kubatizhiwa, kabiji luno beyowa kusapwila mambo awama a Bufumu pamo na bakazhi babo ba Joyce.

NEMEKAI MWINGILO WENU WA KUSAPWILA

Kwesakanya mwingilo wetu ku kime kwakonsha ne kwitukwasha kuyuka’mba kwibikako kwetu pa muntu pa muntu kwanema bingi. Mu ñanyi jishinda? Mundondo wa mema umo kechi wakonsha kuba byavula ne, bino inge mindondo yavula ne kulenga kime, izobesha mushiji. Kyo kimotu, mwingilo wetu pa muntu pa muntu wakonsha kumweka nobe kechi wanema ne. Bino inge twavwanga pamo mingilo ibena kwingila bakalume ba Yehoba bonse, yakwasha kushimuna bukamonyi “ku bisaka byonse bya bantu.” (Mateo 24:14) Twayai tulengele mwingilo wetu kwikala mapesho afuma kwi Yehoba o abena kupana ku bantu. Kine, mambo awama o tusapwila akekala nobe kime, ko kuba’mba nobe mvula umima, akakokoloshanga bantu, ne kwibakwasha kwikala na bumi.