MUTWE WA PA NKUPIKO | BAMALAIKA—NANCHI KO BAJI NYI? MAMBO KA O KYANEMENA KUYUKILA BINO?

Bamalaika byo Baji

Nanchi mukeba kuyuka bamalaika byo baji nyi? Nanchi bamalaika bo bañanyi? Bafumine pi kabiji ñanyi mingilo yo bengila? Tusakutana mikumbu ya ano mepuzho mu Baibolo. (2 Timoti 3:16) Baibolo waambapo’mba ka pa bamalaika?

Lesa Mupashi kabiji bamalaika nabo bilengwa bya mupashi bibula kumweka kabiji kechi baji na mubiji wa “nyama ne bikupa” ne. Bamalaika bakishinka bekala mwiulu kabiji bamumona Lesa.—Luka 24:39; Mateo 18:10; Yoano 4:24.
Pa kimye kimo, bamalaika bealwile mibiji yabo kimye kyo baingijilenga mingilo ya Lesa pano pa ntanda. Kabiji panyuma ya kupwisha mwingilo ye bebapele, babwelele baikala na mubiji wa mupashi.—Mitonyi 6:11-23; 13:15-20.
Nangwa kya kuba Baibolo umwesha kuba’mba bamalaika banabalume, bino kafwako malaika wamulume nangwa wamukazhi ne. Kechi basongola nangwa kwikala na baana ne. Bamalaika kechi baikelepo bantu pano pa ntanda ne. Yehoba ye walengele bamalaika, kabiji Baibolo wibatele’mba “baana ba Lesa wa kine.”—Yoba 1:6; Salamo 148:2, 5.
Baibolo waamba pa “njimi ya bantu ne ba malaika.” Kino kimwesha kuba’mba kuji mulaka bamalaika ye bamba. Nangwa kya kuba Lesa waingijishepo kala bamalaika kwisamba na bantu, bino kechi witutundaika kwibapopwela nangwa kulombanga kwi abo ne.—1 Kolinda 13:1; Lumwekesho 22:8, 9.
Kuji biumbi ne biumbi bya bamalaika, kino kibena kulumbulula’mba bamalaika bavula bingi.a—Danyela 7:10; Lumwekesho 5:11.
Bamalaika baji na “bulume bukatampe,” kabiji kechi baesakana na bantu ne. Bano bamalaika baji bingi na maana kabiji bakonsha kwenda kufika kwalepa bingi.—Salamo 103:20; Danyela 9:20-23.
Nangwa kya kuba baji na maana ne bulume kukila bantu, kuji bintu byo bakankalwa kuba, kabiji kechi bayuka bintu byonse ne.—Mateo 24:36; 1 Petelo 1:12.
Bamalaika baji na byubilo byapusana pusana. Baji na byubilo bya Lesa kabiji baji ne na luusa lwa kwifuukwila bintu. Byonka byuba bantu, bamalaika nabo bakonsha kusalapo kuba byawama nangwa byatama. Kyatamakotu ke kya kuba’mba bamalaika bamo basatukijile Lesa.—Yuda 6.

a Kiumbi kimo kya bamalaika kyaesakana na 10,000. Ko kuba’mba biumbi 10 ke 100 milyonyi. Buku wa Lumwekesho waamba’mba kuji bamalaika “biumbi bya biumbi.” Kino kilumbulula’mba kuji bilengwa bya mupashi byavula bingi.

Bamalaika Ba Lesa Byo Bengila

Malaika mwine mukatampe Mikela, ye malaika mwine mukatampe kabiji uji bingi na bulume. Binembelo bimwesha’mba Mikela jo jizhina jikwabo ja kwa Yesu Kilishitu.—1 Tesalonika 4:16; Yuda 9.

Baselafi ke jibumba ja bamalaika bengila mwingilo wa kupana munema kabiji bazhokoloka jitanda ja Lesa.—Isaya 6:1-3.

Bakelubi nabo bengila mingilo yanema yazhila ya Lesa imwesha bulume bwanji bukatampe. Bano bamalaika nabo baya na kwimana ku meso a Lesa.—Ntendekelo 3:24; Ezikyo 9:3; 11:22.

Biumbi bya bamalaika bakwabo bengila mingilo yanema ya kufikizha kyaswa muchima wa Lesa.b—Bahebelu 1:7, 14.

b Inge mukeba kuyukilapo byavula pa bamalaika, monai kitango 10 mu buku wa kuba’mba Nanchi Baibolo Waamba’mba Ka? Nangwa monai byambo byo balumbulula bya kuba’mba “Mikela Malaika Mwine Mukatampe” wanemba Bakamonyi ba kwa Yehoba. Uji ne pa keyala wa www.jw.org/kqn.