“Mambo a Lesa. . . Aji Bingi na Bulume”

1. Mambo ka o twashiinwa kuba’mba Mambo a Lesa aji na bulume? (Monai kipikichala kitanshi.)

ATWEBA bantu ba Yehoba twashiinwa kuba’mba byambo bya Lesa ‘byumi kabiji biji bingi na bulume.’ (Heb. 4:12) Bavula twimwena bulume bwa byambo biji mu Baibolo byo bwapimpula bwikalo bwetu. Balongo ne banyenga yetu bamo kala bajinga bangivi, baingijishanga bizhima, nangwa kuba bulalelale. Bakwabo baikelenga bwikalo bwa ntentente, bino bamwene kuba’mba kechi bwibaletelanga lusekelo ne. (Sapwi. 2:3-11) Bantu bavula bajinga mu jishinda ja lufu bataaine jishinda jaya ku bumi kupichila mu kufunda Baibolo. Twaketekela mwatanga mashimikila avula a bano balongo mu bibaaba bya kuba’mba “Baibolo Upimpula Bwikalo Bwa Bantu,” bitaanwa mu Kyamba kya Usopa. Kabiji mwamona kuba’mba nangwatu byo baikele bena Kilishitu, Binembelo bitwajijila kwibakwasha kupimpula byubilo byabo.

2. Mambo a Lesa akwashishe byepi bantu mu myaka ya batumwa?

² Nanchi twafwainwa kukumya pa kumona bantu bavula mu ano moba byo babena kupimpula byubilo inge bafunda Baibolo nyi? Ine, kwalepeshatu! Luno lupimpu lwituvululamo byaubile balongo ne banyenga ba mu moba a batumwa bajinga na luketekelo lwa kuya mwiulu. (Tangai 1 Kolinda 6:9-11.) Patanshi, Paulo watongwele byubilo byatama byakonsha kulengela muntu kubula kuswana Bufumu bwa Lesa, kepo aambile’mba: “Bamo mwajinga byonka bino.” Bino Binembelo ne mupashi wazhila wa Lesa bibakwashishe kupimpula byubilo byabo. Nangwa kya kuba baikele bena Kilishitu, bamo balengele mambo. Baibolo waambapo pa mwina Kilishitu washingwa umo wajingako mu yoya myaka ye bapangile mu kipwilo, bino palutwe kacheche bamubwezhezhe. (1 Ko. 5:1-5; 2 Ko. 2:5-8) Nanchi kechi kitusangajika inge twalanguluka pa makatazho apichilemo bano balongo ne kumona Mambo a Lesa byo ebakwashishe kushinda nenyi?

3. Ñanyi bintu byo tusakwisambapo mu uno mutwe?

³ Na mambo a kuba’mba Baibolo uji bingi na bulume, twafwainwa kumwingijishanga kimye kyonse. (2 Timo. 2:15) Mu uno mutwe, tusakwisamba byo twakonsha kwingijisha bulongo bulume bwa Mambo a Lesa (1) mu bwikalo bwetu, (2) mu mwingilo wa kusapwila, ne (3) pa kufunjisha pa mutuntamo. Kuba bino kusakwitukwasha kusanchila Shetu wa mwiulu ne kumwesha byo twamutemwa, mambo witufunjisha kuba’mba tumwenemo.—Isa. 48:17.

MU BWIKALO BWETU

4. (a) Twafwainwa kuba byepi inge tukeba’mba Mambo a Lesa engilenga mwi atweba? (b) Ñanyi mutanchi ye muji nanji wa kutanga Baibolo?

⁴ Pa kuba’mba Mambo a Lesa etukwashe mu bwikalo bwetu, twafwainwa kwiatanganga pa juba pa juba. (Yosh. 1:8) Atweba bavula tuji na bya kuba byavula. Pano bino, nangwa twikale na mingilo yanema byepi kechi twafwainwa kuleka kutanga Baibolo pa juba pa juba ne. (Tangai Efisesa 5:15, 16.) Bantu ba Yehoba bavula balenga mitanchi yapusana pusana ya kutangilamo Baibolo, bamo lukelo ku makya, bakwabo bufuku pa kulaala nangwa kimye kikwabotu. Bomvwatu byonka byaumvwanga nyimbi wa masalamo wanembele’mba: ‘Mizhilo yenu byo neitemwapo! Kimye kyonse neilanguluka langulukapo.’—Sala. 119:97.

5, 6. (a) Mambo ka o kyanemena kulanguluka langulukapo pa byo tutanga mu Baibolo? (b) Twakonsha kuba byepi pa kuba’mba tulangulukenga pa bintu byo tutanga? (c) Nga anweba mwamwenamo byepi mu kutanga Baibolo ne kulanguluka langulukapo?

⁵ Kununga pa kutanga Baibolo, kyanema bingi kwikalangapo na kimye kya kulanguluka langulukapo pa byo tutanga. (Sala. 1:1-3) Inge ketube bino, po po tukakonsha kwingijisha bintu byo tutanga mu Baibolo. Inge tubena kutanga Baibolo ye bapulinta nangwa uji pa intaneti, kintu kyanema ke kuswisha Mambo a Lesa kwitukwasha kupimpula byubilo byetu.

⁶ Twakonsha kuba byepi pa kuba’mba tulangulukenga pa bintu byo tutanga? Bavula bataana kuba’mba inge babena kutanga Baibolo, kyanema kutulumanako ne kwiipuzha mepuzho nabiji ano: ‘Nga bino byambo bibena kumfunjishapo ka pe Yehoba? Mu ñanyi mashinda mo mbena kwingijisha mafunde aji mu bino byambo byo natanga mu Mambo a Lesa? Mwepi mo nakonsha kuwamishako?’ Inge ketulanguluke langulukepo pa bintu byo tutanga mu Mambo a Lesa, po po tukebingijishanga mu bwikalo bwetu. Kabiji umvwe ketube bino, bulume buji mu Mambo a Lesa bukengilanga mwi atweba.—2 Ko. 10:4, 5.

MU MWINGILO

7. Mambo ka o twafwainwa kwingijishanga Mambo a Lesa pa kusapwila?

⁷ Ñanyi kintu kiketukwasha kwingijisha bulongo Mambo a Lesa mu mwingilo? Kintu kitanshi ke kwingijisha Baibolo kimye kyonse kyo tubena kusapwila ne kufunjisha bantu. Mulongo umo waambile’mba, “Fwanyikizhai’mba mubena kusapwila ku nzubo ku nzubo pamo ne Yehoba. Nanchi yenu mwakonsha kwambangatu nyi, inyi mwakonsha kuswisha Yehoba kwamba?” Kishinka kyo aambilengapo ke kino: Inge ketwingijishe Mambo a Lesa pa kusapwila, ko kuba’mba tubena kuswisha Yehoba kwamba na mwina nzubo. Umvwe mwaingijisha kinembelo kyafwainwa, kikafika muntu pa muchima kukila byambo byonse byo mwakonsha kwamba. (1 Tesa. 2:13) Ishikishai’mba, ‘Nanchi ñingijisha Mambo a Lesa pa kusapwila mambo awama nyi?’

8. Mambo ka o kyanemena kulumbulwila bantu binembelo kimye kyo tuji mu mwingilo?

⁸ Pano bino, kechi twafwainwa kupelelatu pa kutangila bantu Binembelo ne. Mambo ka? Mambo bantu bavula bayukakotu bintu bicheche biji mu Baibolo, kabiji bakwabo nabo kafwako byo bayuka ne. Byo byo kyajinga ne mu kimye kya batumwa. (Loma 10:2) Onkao mambo, kechi twafwainwa kulanguluka’mba muntu mwine usakumvwa kishinka kyo twatanga mu Baibolo ne. Twafwainwa kusalamo byambo biji mu kyepelo kyo twatanga, kampe ne kwibitanga jibiji ne kwibilumbulula. Umvwe ketube bino, tukwasha bantu kumvwisha Mambo a Lesa.—Tangai Luka 24:32.

9. Pa kutanga binembelo, twakonsha kumwesha byepi amba twanemeka Baibolo? Ambaipo mashinda amo.

⁹ Inge tubena kwambila muntu amba tutange kinembelo, twafwainwa kwingijisha byambo bimwesha’mba twanemeka Baibolo. Kampe twakonsha kwamba’mba, “Twayai tumone Mulenga wetu byo aambapo pa kino.” Inge tubena kwisamba na muntu wa mu bupopweshi bwabula bwa bwina Kilishitu, twakonsha kwamba’mba, “Monai Binembelo Byazhila byo byaamba.” Nangwa inge twataana muntu wabula kunemeka bya bupopweshi, twakonsha kwamba’mba, “Abya mwakyumvwapo kala bino byambo bya maana byanembelwe kala nyi?” Twafwainwa kwingijisha mashinda apusana pusana kwesakana na muntu ye tubena kwisamba nanji.—1 Ko. 9:22, 23.

10. (a) Shimikizhaipo kyamwekejile mulongo umo. (b) Nanchi mwimwena bulume buji mu Mambo a Lesa kimye kyo musapwila nyi?

¹⁰ Basapwishi bavula bataana kuba’mba kwingijisha Mambo a Lesa mu mwingilo kukwasha bingi bantu. Akilangulukai pa kino kyamwekele. Mulongo umo wafuukwilepo kubwela ku mwanamulume wa kikulumpe watanganga magazini etu pa myaka yavula. Saka akyangye kumupa Kyamba kya Usopa kya katataka, wamutangijile kinembelo kyajingamo. Watangile 2 Kolinda 1:3, 4, paamba’mba: “Shanji bya lusa kabiji Lesa wa lutekenesho lonse, witutekenesha mu meseko etu onse.” Mwina nzubo byo aumvwine bino byambo, byamufikile pa muchima kabiji waambijile mulongo kwibitanga jibiji. Kepo uno mwanamulume aambile makatazho o apichilengamo pamo na mwinakwanji, kabiji waswile kufunda Baibolo. Nanchi kechi mwaswa kuba’mba Mambo a Lesa aji na bulume bwa kukwasha bantu mu mwingilo nenyi?—Byu. 19:20.

KIMYE KYO MUBENA KUFUNJISHA PA MUTUNTAMO

11. Ñanyi mwingilo mukatampe uji na balongo bamba majashi?

¹¹ Atweba bonse twiyowa bingi kupwila, kubuñana ne kushonkena. Kintu kikatampe kyo tuyila na kupwila ke kupopwela Yehoba. Kabiji tumwenamo bingi mu bintu byo tufunda pa kupwila. Balongo bamba majashi pa mutuntamo bafwainwa kuyuka’mba kufunjisha bantu ke mwingilo wanema bingi. (Yako. 3:1) Bafwainwa kumona kuba’mba bintu byo babena kufunjisha byaimena pa Mambo a Lesa. Umvwe mubena kufunjisha pa mutuntamo, mwakonsha kwingijisha byepi bulume buji mu Baibolo ne kufika bantu pa muchima?

12. Ñambi wakonsha kuba byepi pa kuba’mba jashi janji jimene pa Binembelo?

¹² Umvwe mubena kwamba jashi, mwafwainwa kumona kuba’mba byo mubena kwamba byaimena pa Binembelo. (Yoa. 7:16) Mwakonsha kuba byepi bino? Patanshi, mwafwainwa kumona kuba’mba jishinda jo mubena kwambilamo, bimwesho byo mubena kwingijisha nangwa bintu byamwekele byo mubena kushimikizha kechi bibena kuvulañanya bantu kya kuba bakankalwa kuyuka mwatala Binembelo ne. Kabiji yukai kuba’mba kutanga binembelo byavula kechi kulumbulula’mba mubena kufunjisha bantu Baibolo ne. Kutanga Binembelo byavula kwakonsha kulengelatu bantu kubula kuvulukapo nangwa kinembelo kimo pa byo mwaji kwingijisha. Onkao mambo, mwafwainwa kusala binembelo byo mwafwainwa kutanga, kwibilumbulula ne kwamba byo twakonsha kwibingijisha. (Ne. 8:8) Umvwe bemupa jashi mo banembela jimo mutanchi wa byambo byo mwafwainwa kwamba, mwafwainwa kupitulukamo mu byambo bijimo ne binembelo. Mwafwainwa kumvwisha lukwatankano luji pa bishinka biji mu jashi ne binembelo byo babikamo. Kepo mwafwainwa kwingijishapo binembelo bimo kulumbulula bishinka biji mu jashi. (Mwakonsha kutaana mashinda akonsha kwimukwasha kunengezha jashi mu buku wa Mwenaimo mu Sukulu wa Lufunjisho lwa Mwingilo wa Lesa, kutendekela pa lufunjisho 21 kufika ku 23.) Kyakila pa byonse ke kulomba kwi Yehoba kuba’mba emukwashe kulumbulula bulongo Mambo anji.—Tangai Ezela 7:10; Byambo bya Maana 3:13, 14.

13. (a) Binembelo byo batangile pa kupwila byakwashishe byepi nyenga umo? (b) Nga anweba mumwenamo byepi mu Binembelo byo bengijisha pa kupwila?

¹³ Nyenga umo wa ku Australia wamwenejilemo bingi mu Binembelo byo batangile pa kupwila. Mu kukoma kwanji, uno nyenga wapichile mu bya malwa, pano bino wafunjile Baibolo ne kubatizhiwa. Nangwa byonkabyo, kyamukatezhe bingi kuswa’mba Yehoba wamutemwa. Mu kuya kwa kimye, washiinwe kuba’mba Lesa wamutemwa. Ñanyi kintu kyamukwashishe kushiinwa? Walangulukile pa kinembelo kyo batangile pa kupwila ne kwikyesakanya na byepelo bikwabo biji mu Baibolo.a Nanchi mwavulukapo kinembelo kyo baingijishe pa kupwila, pa kubuñana nangwa pa kushonkena kimufikile pa muchima nyi?—Ne. 8:12.

14. Twakonsha kumwesha byepi amba tusanta pa Mambo a Yehoba?

¹⁴ Nanchi kechi musanchila Yehoba pa kwimupa Byambo byanji byanembwa mu Baibolo nenyi? Wapa bantu byambo byanji kabiji wafikizha mulaye wanji wa kuba’mba byambo byanji bikekalanga myaka ne myaka. (1 Pe. 1:24, 25) Onkao mambo, twafwainwa kutanganga Mambo a Lesa pa juba pa juba ne kwingijisha byo tutanga mu bwikalo bwetu ne kufunjisha bantu. Kuba bino kumwesha’mba twanemeka Mambo a Lesa ne Mwine mwina Baibolo, Yehoba Lesa.