Nanchi Mwayuka Nyi?

Mambo ka Setepena o abujile kubambisha muchima kimye kyo bamumanyikilenga?

SETEPENA bamutotolweshenga ku banabalume bakanamine bingi. Bano bantu bajinga ba mu kije kikatampe kya mu Isalela kya Saniedilini. Bano bamitonyi 71 bajinga banabalume bajinga bingi na bulume. Bebakonkenye kwi Ñanga Mukatampe aye Kaifasa yenka watangijile kije kyazhachishe Yesu ne kumwipaya. (Mat. 26:57, 59; Byu. 6:8-12) Byo baletelenga bakamonyi ba bubela ba kumushinawina, bamwene kya kukumya pe Setepena, kilungi kyanji kyamwekelenga “nobe kya malaika.”—Byu. 6:13-15.

Mambo ka Setepena o abujile kubambisha muchima ne kumvwa moyo? Saka bakyangye kumutwala ku kije kya Saniedilini, Setepena waingijilenga na mukoyo mwingilo wa kusapwila na bulume bwa mupashi wa Lesa. (Byu. 6:3-7) Kimye kyo bamutotolweshenga, mupashi wamutekeneshe ne kumukwasha kuvuluka byambo bya kwamba. (Yoa. 14:16, tubyambo twa munshi.) Setepena byo aambilenga na kuchinchika byonka byaamba Byubilo kitango 7, mupashi wazhila wamuvulwilemo Binembelo bya Kihebelu 20 nangwa kukilapo. (Yoa. 14:26) Bino lwitabilo lwa kwa Setepena lwakosejileko byo amwene Yesu saka aimana ku kuboko kwa kilujo kya Lesa.—Byu. 7:54-56, 59, 60.

Ne atweba bakonsha kwituzakamisha ne kwitumanyika ku balwanyi betu. (Yoa. 15:20) Umvwe ketutange Mambo a Lesa moba onse ne kwingila mwingilo wa kusapwila, mupashi wa Yehoba uketukwasha. Kabiji tukekala na bulume bwa kuchinchika mu kimye kya lumanamo ne kutwajijila kwikala na mutende wa mu milanguluko.—1 Pe. 4:12-14.