Ñanyi Bupe Bo Twakonsha Kupa Yehoba?

YESU waambile’mba: “Mu kupana mufuma lusekelo lukatampe kukila mu kutambula.” (Byu. 20:35) Kino kishinka kitulengela kwikala na bulunda bwakosa ne Yehoba. Mambo ka? Yehoba witupa bintu byavula bingi bitulengela kwikala na lusekelo. Pano bino, twakonsha kwikala na lusekelo lukatampe inge ketumupepo bintu byetu. Ñanyi kintu kyo twakonsha kupa Yehoba? Byambo bya Maana 3:9, byaamba’mba: “Nemeka Yehoba na bintu byawamisha byo uji nabyo.” “Bintu byawamisha” byo tuji nabyo, mwavwangwa kimye kyetu, busendwe bwetu, ngovu ne bintu bya ku mubiji. Inge ke twingijishe bino bintu kutundaikilamo bupopweshi bwa kine, ko kuba’mba tubena kupapo Yehoba bintu byetu, kabiji tukekala na lusekelo lukatampe.

Ñanyi kintu kyakonsha kwitukwasha kutwajijila kupapo Yehoba bintu byetu? Mutumwa Paulo wabuujile bena Kolinda “kutulapo bya bupe bimo” bya kupa Lesa. (1 Ko. 16:2) Mwafwainwa kuba byepi inge mukeba kuyuka mashinda a kupainamo bupe ku mpunzha ko mwikala? Monai kakitenguluzha kaji panshi.

Mu byalo bimo kechi mwakonsha kupana mali kwingijisha Intaneti ne. Pano bino, mashinda akwabo akupainamo bupe mwakonsha kwiataana pa keyala wetu wa pa Intaneti. Mu byalo bimo banengezha pepala pataanwa mikumbu ya mepuzho a bantu bakeba kupanako bupe.