Mali Engijisha Bakamonyi ba kwa Yehoba mu Mwingilo Wabo Afuma Pi?

Mwingilo wetu wa ntanda yonse utundaikwa na mali apana Bakamonyi ba kwa Yehoba.a Babika tubilambwilo pa mapunzha po bapwijila mwa kubika mali. Kabiji mashinda akwabo a kupainamo mali beatongola pa jw.org pa kipungu kya kuba’mba: Donations. Paji mashinda apusana pusana. Muntu mwine wafwainwa kusalapo jishinda ja kupainamo mali a kutundaikilamo mwingilo wetu wa ntanda yonse nangwa a kwingijisha pa kipwilo nangwa kupana konse kubiji.

Bakamonyi ba kwa Yehoba kechi bapana bya bujikumi ne. Kabiji kechi batongola kibelengelo kya mali kuba’mba muntu yense kyo asakupananga ne. (2 Kolinda 9:7) Kechi tupishamo masanyi a kubikapo mali nangwa kulipilisha bantu mali beya na kupwila ne. Kabiji bantangi betu kechi balipilisha bantu pa kuba’mba bebabatizhe, bebakwashe pa kijilo, pa masongola nangwa mu bintutu bikwabo bya bupopweshi ne. Kechi tuya na kwingijila bantu nabiji kwingila mu majimi abo nangwa kulomba mali a kutundaikilamo mwingilo wetu wa ntanda yonse ne. Kabiji kechi tusolola mazhina a bantu bapana bupe nangwatu kubuulañana bupe bo bapana ne. (Mateo 6:2-4) Kechi tuswisha basulu kwingijisha keyala wetu wa jw.org ne mabuku etu kubuulañenapo busulu bwabo ne.

Pa ñondo pa ñondo mu bipwilo byonse bya Bakamonyi ba kwa Yehoba babijika pa kupwila mali onse o batambwijile ne byo beengijishe. Mapepala po banemba mali o batambwila ne byo aingila beapitulukamo javula pa kuba’mba bayuke’mba mali apaine bantu beengijishetu bulongo.—2 Kolinda 8:20, 21.

Mashinda a Kupainamo Bupe

• Tubilambwilo: Mwafwainwa kubika mali nangwa macheki mu tubilambwilo tuji mu Mazubo a Bufumu ne a Kubuñenamo nangwa pa mapunzhatu akwabo po tupwijila.

• Kupana bupe kwingijisha intaneti: Mu byalo byavula mwafwainwa kwingijisha kipungu kiji pa jw.org kya kuba’mba: “Donate to Jehovah’s Witnesses.” Mwafwainwa kwingijisha kino kipungu kupainapo bupe kwingijisha tubikachi twa ku banki, kutuma mali ku banki nangwa kwingijisha intaneti.b Bakamonyi bamo ‘batulapo bya bupe bimo’ bya kupana pa ñondo pa ñondo kwingijisha ano mashinda.—1 Kolinda 16:2.

  

• Kufuukwila jimo jishinda ja kupainamo bupe: Mashinda amo a kupainamo bupe akeba kufuukwila jimo bya kwibupana nangwa kuyuka mizhilo ya mu kyalo byo yaambapo pa jishinda jo mukeba kwingijisha. Mashinda a uno mutundu akonsha kwimulengela kumwenamo mu misonko yo mupana kwesakana na mizhilo ya kafulumende wa mu kyalo kyenu. Bantu bavula bamwenamo mu mali a kukwashishamo bantu o bapana saka bakiji na bumi nangwa o bafuukulapo’mba inge bafwa bakeapane ku muntu ye basala. Saka mukyangye kufuukulapo jishinda jo mukeba kwingijisha, patanshi isambai na ofweshi wa musampi wa Bakamonyi ba kwa Yehoba wa mu kyalo kyenu inge mukeba kupana bupe kwingijisha ano mashinda:

  • mali aji ku banki

  • mali a kwivimbila (inshuwalansi) ne a penshonyi

  • bishimikwa nangwa mpunzha

  • nsubu

  • bipe bipana muntu mwine saka akyangye kufwa

Pa kuba’mba muyukilepo byavula pa mashinda a kupainamo bupe aji koko kwenu, monai kipungu kiji pa jw.org kya kuba’mba: “Donate to Jehovah’s Witnesses.”