Lufu Bakelushinda Byepi?

NANGWA kya kuba mizhilulwila ya bansemi betu batanshi ba Adama ne Evwa yaletele bundengamambo ne lufu ku bantu bonse, bino Lesa kechi wapimpwile mulanguluko wanji wa byo akebelenga’mba bantu bakekalenga ne. Binembelo byavula bimwesha’mba ne lunotu Lesa kechi wapimpula mulanguluko wanji ne.

• “Baoloka bakaswana ntanda, kabiji bakekalangamo myaka ne myaka.”—Salamo 37:29.

• “Lesa ukamina lufu myaka ne myaka, kabiji Nkambo Mfumu Yehoba ukashiimuna mipolo ku meso a bantu bonse.”—Isaya 25:8.

• “Mulwanyi wapelako, ko kuba’mba lufu, bakeluzhiya.”—1 Kolinda 15:26.

• “Lufu, mabingo, kujila ne misongo kechi bikekalako jibiji ne.”—Lumwekesho 21:4.

Pano Lesa ‘ukamina byepi lufu,’ ne kuzhiya uno mulwanyi wetu? Baibolo waamba’mba: ‘Baoloka bakekala myaka ne myaka.’ Bino Baibolo waamba ne kuba’mba “kafwako muntu nangwa umo pano pa ntanda ubatu byawama kimye kyonse” ne. (Musapwishi 7:20) Pa kuba’mba Lesa akashinde lufu, nanchi ukaleka kuzhachisha bantu balenga mambo kya nshiji kubatu amba ebaswishe kwikala myaka ne myaka nyi? Ine! Kechi ukoba bino ne mambo ‘Lesa kechi ubepa ne.’ (Titusa 1:2) Pano Lesa ukoba byepi pa kuba’mba akafikizhe mulaye wanji?

LESA WAPAINE BUKUZHI PA KUBA’MBA AKASHINDE LUFU

Yehoba Lesa wapaine bukuzhi bwa kukuula bantu ne kwibapokolola ku lufu. Kyambo kya bukuzhi kilumbulula mali nangwa kintu kipana muntu pa kuba’mba apokolole muntu ye bakwata, nangwa kufuta mambo. Na mambo a kuba’mba bantu bonse ke bandengamambo kabiji bonse bakafwa, Baibolo waamba’mba: “Kafwako nangwa umo mwi abo wakonsha kukuula mulongo wanji nangwa kupa Lesa bukuzhi bwa kumukuujilamo ne, (bukuzhi bwa bumi bwabo, bwa mutengo mukatampe bingi kya kuba kechi bakonsha ne kwibupota ne).”—Salamo 49:7, 8.

Inge muntu wafwa, kijitu nobe bamuzhachisha pa bundengamambo bwanji, kabiji kechi wakonsha kwikuula aye mwine nangwa kukuula bakwabo ne. (Loma 6:7) Muntu wakonshatu kwitukuula ke muntu walumbuluka kabiji wabula kulengapo mambo; ye wakonsha kupana bumi bwanji kwitufwila pa bundengamambo bwetu.—Bahebelu 10:1-4.

Abino byo byaubile Lesa. Watumine Mwananji aye Yesu kuba’mba eye pano pa ntanda kufuma mwiulu ne kusemwa mu bumuntu, kabiji Yesu kechi walengelepo mambo ne. (1 Petelo 2:22) Yesu waambile’mba waishile na “kupana bumi bwanji kwikala bukuzhi bwa kukuula bavula.” (Mako 10:45) Byo etufwijile, washinjile lufu ne kwitupa luketekelo lwa kwikala myaka ne myaka.—Yoano 3:16.

ÑANYI KIMYE LUFU KYO BAKELUSHINDA?

Byonka byaamba bungauzhi bwa mu Baibolo, lelo jino tuji mu “bimye byakatazha” na mambo a kuba’mba tubena kwikala mu “moba a kupelako.” (2 Timoti 3:1) Ano moba a kupelako akapwa inge “juba ja kije ne ja lonaiko lwa bantu babula kwakamwa Lesa” jafika. (2 Petelo 3:3, 7) Bantu batemwa Lesa bakapuluka jino juba ja lonaiko kabiji Lesa ukebapa “bumi bwa myaka ne myaka.”—Mateo 25:46.

Bantu bavula bo bakasangula nabo bakekala na bumi bwa myaka ne myaka. Yesu byo ayile mu muzhi wa Naina, wasangwile muntu wafwa. Mwana umotu wa mwanamukazhi wafwilwa byo afwile, Yesu “wamubijile lusa” ne kumusangula. (Luka 7:11-15) Kabiji Mutumwa Paulo waambile ne kuba’mba: “Naketekela mwi Lesa . . . kuba’mba, kukekala lusanguko lwa baoloka ne babula koloka.” Uno mulaye wanema bingi mambo umwesha Lesa byo atemwa bantu pano pa ntanda.—Byubilo 24:15.

Bantu bavula lelo jino, babena kutengela kwikala myaka ne myaka. Baibolo waamba’mba: “Baoloka bakaswana ntanda, kabiji bakekalangamo myaka ne myaka.” (Salamo 37:29) Pa kyokya kimye, bakekala bingi na lusekelo inge byambo byanembele mutumwa Paulo myaka nobe 2,000 yapitapo byo bikafika bya kuba’mba: “Obewa lufu, kushinda kobe kuji pi? Obewa lufu, lumuna wobe uji pi?” (1 Kolinda 15:55) Pa kyokya kimye lufu lubena kukatazha bantu bonse pano pa ntanda popo bakeluzhiya.