Mwakonsha Kwikala Na Lusekelo Ne Mu Ano Moba

KATATAKATU bantu bakekalenga bwikalo bwa lusekelo, bwa kubula misongo, kukolwa, kukota ne kufwa. Ne anweba mwakonsha kwikala buno bwikalo. Bino pa kino kimye, bwikalo bwayulatu na makatazho. Mwakonsha kwikala byepi na lusekelo mu ano moba. Baibolo wakonsha kwimukwasha kwikala bwikalo bwa lusekelo lonka luno. Akimonai makatazho amo o tupitamo luno ne Baibolo byo akonsha kwimukwasha.

KUSEKELA MU BINTU BYONKA BYO MUJI NABYO

Baibolo witujimunako amba: “Mwikale babula kutemwa mali, sekelainga mu bintu byonka byo muji nabyo.”—Bahebelu 13:5.

Lelo jino, ntanda ibena kwitutundaika kwikala na bintu byavula bingi. Bino Baibolo waamba’mba twafwainwa ‘kusekela mu bintu byonka byo tuji nabyo.’ Twakonsha kuba byepi bino?

Chinuzhukai “kutemwa mali.” Bantu basankilapo bisemi byabo, butuntulu bwa mubiji, byubilo byabo byawama nangwatu mushingi ye bebapa mu kimasamasa na mambotu a “kutemwa mali.” (1 Timoti 6:10) Kino ke kya bulanda bingi! Bino kishinka ke kya kuba’mba, ‘muntu watemwa mali kechi utondwa na mali ne.’—Musapwishi 5:10.

Nemekainga bantu kukila bintu bya ku mubiji. Ibyo kuba’mba bintu bya ku mubiji byakonsha kwitukwasha, pano bino, kechi byakonsha kwitutemwa nangwa kwitutundaika ne. Bantu bo bonkatu bakonsha kuba bino. Kwikala na “mulunda wa kine” kwitukwasha kwikala na lusekelo mu bwikalo.—Byambo bya Maana 17:17.

NE MU ANO MOBA, TWAKONSHA KWIKALA NA LUSEKELO MU BWIKALO INGE KETULONDELE LUTANGIJILO LWA MU BAIBOLO

KUCHINCHIKA BIKOLA

Baibolo waamba’mba: “Muchima wa lusekelo ye muchi wawama.”—Byambo bya Maana 17:22.

Lusekelo lujitu nobe “muchi wawama” mambo lwakonsha kwitukwasha kuchinchika inge tubena kukolwakolwa. Pano twakonsha kwikala byepi na lusekelo saka tubena kukolwa?

Ikalai na muchima wa kusanta. Inge ketulanguluketu pa buyanji bwetu, tukamonanga nobe “moba onse” atama. (Byambo bya Maana 15:15) Bino Baibolo witutundaika’mba: “Saka musanta.” (Kolose 3:15) Santainga pa bintu byo muji nabyo, nangwa kya kuba byakepa. Mwakonsha kusanta pa kumona juba byo jibena kuzhika, mwela byo abena kupupa, nangwa mutemwe wenu ubena kwimumwemwesela.

Ubilainga bakwenu byawama. Nangwatu inge twakolwa twafwainwa kupananga mambo “mu kupana mufuma lusekelo lukatampe kukila mu kutambula.” (Byubilo 20:35) Inge bantu betusanchila pa byo twibobila, kituletela lusekelo ne kwitulengela kulubako pa kimye kicheche ku makatazho etu. Twakonsha kwikala bwikalo bwa lusekelo inge ketukwashe bantu kwikala na lusekelo mu bwikalo bwabo.

KUKOSESHA MASONGOLA

Baibolo witujimunako amba: “Muyuke bintu byanemesha.”—Filipai 1:10.

Baji mu masongola inge ke babule kwikala pamo kimye kyabaya, masongola abo akonsha kwikala mu kizumba. Onkao mambo, bamulume ne mukazhi bafwainwa kutangizhako masongola abo ne kwianemeka bingi.

Ubilainga bintu pamo. Mwafwainwa kwisambanga ne kubila bintu pamo, kechi kwiubilangatu bintu bunke ne. Baibolo waamba’mba: “Bantu babiji bawama kukila uji bunke.” (Musapwishi 4:9) Onkao mambo ubilainga pamo bintu, nabiji kutekela pamo kajo, kwendela pamo ne bintutu bikwabo.

Mweshainga benakwenu amba mwibatemwa. Baibolo watundaika baji mu masongola kwitemwa mulwabo ne kwipa mushingi. (Efisesa 5:28, 33) Mwafwainwa kwiubilanga tubintu tucheche nabiji kumwemwesela, kwikumbachilamo nangwa kupotelako bena kwenu kakivwalo, kuba bino kukosesha masongola enu. Kabiji bantu baji mu masongola kechi bafwainwa kuba bukende ne.—Bahebelu 13:4.

“PANO NJI NA LUSEKELO MU BWIKALO BWAMI!”

—Byashimikizha ba Ryoko Miyamoto, ba ku Japan.

Bwikalo bwetu bwakatezhe. Bamwatawami batomanga bingi maalwa, onkao mambo kechi babandanga pa nkito ne. Bandekejile mwingilo wa kukomesha baana betu bana bunke bwami. Nangwa kya kuba naingijilenga papelele bulume bwami, bino makatazho kechi apwilenga ne. Neipuzhanga namba: ‘Nanchi kyanembelwetu’mba byo byo nkekalanga nyi, inyi mbena kumanama na mambo a mambo o nalengele?’

Kepo Kamonyi wa kwa Yehoba umo waishile pa nzubo petu. Wangimwine na lusekelo ne kwamba na kizaku pa mambo awama aamba pa Bufumu bwa Lesa ne bumi bwa myaka ne myaka. Watendekele kumfunjisha Baibolo. Byo natendekele kufunda Baibolo, nafunjile kuba’mba Lesa koaji, kabiji ye Lesa wa maana, butemwe ne bunchibamambo bwaoloka. Nafunjile ne kimweka inge muntu wafwa, ne kuba’mba buyanji bo napichilengamo kechi bwaishile na mambo a mambo o nalengele ne.

Kyakila mu kunema, nafunjile kuba’mba nakonsha kwikalatu bwikalo bwa lusekelo inge naikala mulunda na Lesa. Kufunda bukine bwa mu Baibolo kwankwasha bingi ne kuntekenesha, kabiji kwandengela kwikala na bwana bwa bene bo nakebelenga. “Pano nji na lusekelo mu bwikalo bwami!”