Kabokoshi Ka Mepuzho

◼ Nanchi baasha bakonsha kukwasha byepi bansemi kukwasha bana babo kwikala kishinshi pa kimye kya kupwila?

Bana mu kisemwa baji bingi na ngovu, kabiji kechi bapijilwa kwikala bimye byabaya ne. Pa nyuma ya kupwila, bana bekala na ngovu bingi ya kukitauka lubilo ne kupangisha banyike bakwabo mu Nzubo ya Bufumu nangwa mu mapunzha akwabo mo tupwila, mu mapunzha mwakwimika myotoka, nangwa mu mashinda. Nangwa kikale byonkabyo, kwesakana na byonka bya amba kishimpi: ‘Mwana ye babula kufunda uletela inanji bumvu.’—Mana. 29:15.

Ke kya bulanda bingi kuba’mba, balongo ne banyenga yetu bamo bakikulumpe bakozhewa bingi mambo a banyike ba kitauka lubilo bebapunka nangwa kwi baponesha panshi. Kino kyalengela bansemi ne kipwilo buyanji bwabula kufwainwa, ne kutaya mali avula. Na mambo a kuvimbilwa kwabo ne kwa bakwabo, bana kechi bwafwainwa kulekelwa’mba bakitaukenga lubilo ne kukaya mukachi nangwa pangye ya Nzubo ya Bufumu ne.

Bansemi bo baji na mwingilo wa mu Byanembwa wa kufunjisha bana babo kushingika mapunzha etu o tupwilamo. (Sapwi. 5:1a) Pa kupwila kwetu kwa Bwina Kilishitu, pa kupwila kukatampe, ne pa kupwila kwa nkambi, baasha bapewa mwingilo wa kumona kuba’mba “bintu byonse byubiwe na mushingi ne mo byalondankena,” kabiji kwikale “bulongo.” (1 Ko. 14:40; Kolo. 2:5) Bafwainwa kwikala ba kukenkenta pulogalamu saka akyangye kutendeka, kimye kya pulogalamu ne panyuma ya pulogalamu mukachi ne pangye. Umvwe mwana ubena kukitauka nangwa kechi ubena kumvwa ne, asha ukakanya mwanyike ne kumubula ene mambo kukaya pa kimye kya kupwila kyo kwatamina. Bansemi ya mwana nabo bafwainwa kubulwa luno lukatazho lwa mwana ne kwibabula nkebelo ya kusopa mwanabo. Bansemi bafwainwa kuba byonka byo babulwa.

Twayuka kuba namba pa bimye bimo, twana twa lukeke ne banyike bakonsha kujila nangwa kwikala ba kuvulañanya mu kimye kya kupwila. Baasha, bafwainwa kufika sakwakishala maminiti 20, kupwila saka kukyangye kutendeka, ne kusungako bipona bya ku nyuma mu nzubo ya bufumu bya bansemi bakeba kwikala ku nyuma na bana babo ba bacheche. Atweba bonse bashala twafwainwa kumvwina baasha ne kushila bansemi baji na bana ba bacheche bino bipona bya ku nyuma.

Umvwe mwana ubena kuvulañanya, bansemi bafwainwa kubapo kimo. Umvwe kyakuba nsemi kafwako kyo aubapo ne, ne kuvulañanya kwakilamo, asha ukalomba nsemi kutwala mwana pangye. Inge twaita bantu bapya baji na bana babo ku kupwila, twafwainwa kwikala nabo pamo ne kwibakwashako inge bana batendeka kujila nangwa kuvulañanya mu mashinda akwabo.

Kituletela bingi lusekelo inge twamona bana babimino byonse pa Nzubo ya Bufumu ne kumona byubilo byabo byawama mu nzubo ya Lesa. (1 Tim. 3:15) Kupichila mu kushingika lunengezho lwa kupwila lwa kwa Yehoba, bamunemeka ne kusanchilwa ku bonse mu kipwilo.