Kabokoshi ka Mepuzho

◼ Ñanyi wafwainwa kulomba pa kupwila kwa kipwilo?

Lulombelo lwa kipwilo lwanema bingi mu mpopwelo yetu. Kwimenako bantu bakwenu kwi Yehoba mu lulombelo ke jishuko janema kabiji mwingilo wabaya bingi. Na mambo a buneme bwa lulombelo, bakulumpe mu kipwilo bafwainwa kulangulukapo bulongo pa kusala balongo bafwainwa kulomba pa kupwila. Balongo babatizwa babena kwimenako kipwilo mu lulombelo bafwainwa kwikala basapwishi ba Bwina Kilishitu bafikapo lwa ku mupashi baji na bya kumwenako byawama kabiji babula kaneneno mu kipwilo. Kulomba kwabo mu kwikepesha ne mu mushingi kwafwainwa kumwesha bulunda bwabo bwawama ne Yehoba Lesa. Kipungu kiji mu Ulupungu lwa kwa Kalinda lwa May 15, 1986, kiji na mutwe wa kuba’mba “Ukupepa pa Ntanshi ya Bambi no Mutima Wafuuka,” kilondolola mafunde anema akwasha kikatakata balomba pa mvula-bantu mu kwimenako kipwilo.

Bakulumpe mu kipwilo kechi bafwainwa kusala mulongo uji na kaneneno nangwa wabula kushiñama kuba’mba alombe ne. Mulongo wafichishiwa pa muchima nangwa watemwa kwingijisha lulombelo lwa pa mvula-bantu kwamba pa lupusano lo aji nalo na balongo kechi wafwainwa kusalwa kulomba mu kipwilo ne. (1 Timo. 2:8) Nangwa nsongwalume umo wabatizhiwa, bakulumpe mu kipwilo bafwainwa kumona bulongo inge uno nsongwalume wafikapo lwa ku mupashi kyakuba walomba mu kwimenako kipwilo.—Byu. 16:1, 2.

Bimye bimo pa kusambakana kwa kwinengezha kuya mu mwingilo wa mu bujimi, kyakonsha kuwama nyenga wabatizwa kulomba umvwe kafwapo mulongo wafikapo wakonsha kwimenako jibumba. Pa kulombela wafwainwa kuvwala kitambala kyafwainwa ku mutwe. Umvwe bakulumpe mu kipwilo bayuka kuba’mba mulongo wafikapo kechi usakutanwako ku kusambakana kwa kuya mu mwingilo wa mu bujimi ne, bafwainwa kutongola nyenga umo wafikapo kuba’mba akatangijile ko ko kusambakana.

Javula pa kupwila kwa pa Mvula-bantu, cheyamani ye ulomba lulombelo lwa kushinkwila. Nangwa byonkabyo, pa kupwila kukwabo kwa kipwilo, inge paji balongo bafikapo bavula, mulongo mukwabo wabula yewo uji na jashi ja kushinkwila nangwa wabula yewo uji na jashi japelako wakonsha kutongolwa kuba’mba alombe lulombelo lwa kushinkwila nangwa lwa kupezhako. Nobe kimye kyonse, mulongo wafwainwa kulomba pa kupwila kwa kipwilo wafwainwa kubujiwa jimo saka ku kiji kimye kuba’mba alangulukile jimo bya kwamba mu lulombelo. Apa bino akonshe kulomba lulombelo lwa umvwanyika lwa kufuma pa muchima kabiji lwaesakana na kupwila kwa pa kyokyo kimye.

Milombelo ya yewo mutundu kechi yafwainwa kulepesha ne. Inge mulongo kalombe pa mvula-bantu, javula wakonsha kumvwanyika bulongo inge waimana pa kulomba, saasansulako jiwi, ne kwamba bibena kumvwanyika. Akyo kikalengela bonse bapwila pamo kumvwa lulombelo ne pa kupezhako bakamba’mba “Amena!,” kufuma panshi ya muchima.—1 Moba. 16:36; 1 Ko. 14:16.

◼ Ñanyi wafwainwa katambula baji ya kupwila kwa nkambi?

Mabaji akwasha bingi kuyuka balongo betu ne kutaya mbila ya kupwila. Bino kechi afwainwa kupanyiwatu kipane-pane ne. Mabaji ayukisha beavwala kuba’mba baji na byubilo byawama ku kipwilo kyo bapwilako kya Bakamonyi ba kwa Yehoba.

Baji iji na pa kunemba jizhina ne pa kunemba jizhina ja kipwilo. Onkao mambo, muntu wafwainwa kwikala wa ku kipwilo kyonka kyanembwa pa baji yo avwala. Sosaiti ituma mabaji ku bipwilo byonse. Kyakonsha kuwama kupana mabaji ku bonse basapwishi babatizwa ne basapwishi babula kubatizwa. Kabiji bana betu ne bakwabotu batanwa ku kupwila kimye kyonse kabiji babena kununguluka kuba’mba batendeke mwingilo wa mu bujimi nabo bakonsha kupewa mabaji. Kechi kyafwainwa kwikala bulongo kupana baji ku muntu wapangiwa mu kipwilo ne.

Umvwe mabaji afika pa kipwilo, bakulumpe mu kipwilo bafwainwa kumona kuba’mba balondela uno mukambizho pa kupana mabaji.