Lubaji 7—Kufunjishanga Mafunjisho a Baibolo Anunguluka
Kulomba Lulombelo Kimye kya Lufunjisho
1. (a) Mambo ka o kyanemena kutendeka ne kupezhako na lulombelo pa lufunjisho? (b) Kimye ka kyo twakonsha kutendeka kulomba pa lufunjisho lwa Baibolo?
1 Pa kuba’mba bo tufunjisha Baibolo bakomeneko ku mupashi, mapesho a Yehoba akebewa bingi. (1 Ko. 3:6) Onkao mambo, kyanema bingi kutendeka ne kupezhako na lulombelo pa lufunjisho. Twafwainwa kubanga bino kimyetu kitanshi kyo twatendeka kufunjisha muntu wayukako byamba Baibolo. Bakwabo babula kuyukako byamba Baibolo, twafwainwa kuyuka kimye kyo twakonsha kutendeka kulomba pa lufunjisho. Mwakonsha kwingijisha binembelo nabiji Masalamo 25:4, 5 ne 1 Yoano 5:14 kukwasha bo mufunjisha kuyuka ene mambo lulombelo kyo lwafwainwa kulombewa, kabiji mwakonsha ne kwingijisha Yoano 15:16 kulondolola buneme bwa kulomba kwi Yehoba kupichila mwi Yesu Kilishitu.
2. Umvwe nyenga waya na mulongo wabatizwa ku lufunjisho lwa Baibolo nangwa na musapwishi wamulume wabula kubatizwa, ñanyi wafwainwa kulomba?
2 Ñanyi wafwainwa kulomba pa lufunjisho lwa Baibolo? Umvwe mulongo wabatizwa waya na nyenga ku lufunjisho, mulongo wafwainwa kulomba nangwa kya kuba nyenga wakonsha kufunjisha saka avwala kitambala ku mutwe. (1 Ko. 11:5, 10) Pano bino, umvwe musapwishi wamulume wabula kubatizwa waya na nyenga ku lufunjisho, nyenga ye wafwainwa kulomba. Mu bimye bya uno mutundu, nyenga wafwainwa kuvwala kitambala ku mutwe pa kulomba ne pa kufunjisha lufunjisho.
3. Ñanyi bintu byo twakonsha kwamba mu lulombelo kimye kya lufunjisho lwa Baibolo?
3 Byambo Byakonsha Kwambiwa mu Lulombelo: Milombelo pa lufunjisho lwa Baibolo kechi yafwainwa kulepa ne, yafwainwa kwikala ya kushinkamika pa kintu. Kununga pa kulomba mapesho a Lesa kimye kya lufunjisho ne kusanta pa bukine bwafunjiwa, kyawama bingi kutota Yehoba aye Nsulo ya mafunjisho. (Isa. 54:13) Twakonsha ne kwambapo byambo bya kumwesha amba kine twamutemwa ye tufunjisha ne kusanchila jibumba Yehoba jo abena kwingijisha. (1 Tesa. 1:2, 3; 2:7, 8) Kulomba mapesho a Yehoba kuba’mba ye tufunjisha engijishenga byo abena kufunda kwakonsha kumukwasha kuyuka buneme bwa “kwioba mambo.”—Yako. 1:22.
4. Kutendeka ne kupezhako na lulombelo pa lufunjisho kuleta ñanyi mfweto?
4 Muji bingi mfweto yavula mu kulomba pa lufunjisho lwa Baibolo. Lulombelo lulengela kwikala na mapesho a Lesa. (Luka 11:13) Lumwesha buneme bwa kufunda mambo a Lesa. Umvwe ye tufunjisha ke ateleke ku milombelo yo tulomba, naye ufunda bya kulomba. (Luka 6:40) Kabiji milombelo ifuma panshi ya muchima imwesha butemwe bo twatemwa Lesa ne lusanchilo lo tuji nalo pa mambo a byubilo byanji byawamisha, yakonsha kukwasha ye tufunjisha kwikala mulunda na Yehoba.