Kakitenguluzha ka Mepuzho

◼ Nanchi Twakonsha Kulomba Kimye kyo Tubena Kufunjisha Muntu Baibolo Pangye Nyi?

Kulomba pa kutendeka ne pa kupwisha kufunjisha muntu Baibolo mufuma mapesho avula bingi. Kupichila mu lulombelo, tulomba Yehoba kwitupa mupashi wanji wazhila kimye kyo tubena kwisamba pa mambo anji. (Luka 11:13) Kabiji lulombelo lulengela ye tufunjisha kumona buneme bwa lufunjisho lwa Baibolo ne kumufunjisha bya kulomba. (Luka 6:40) Onkao mambo, kyawama kutendeka kulombanga pa kufunjisha yewo muntu kwa kubula kubanda amba kana papite moba avula ne. Nangwa byonkabyo, byo kiji kuba’mba mapunzha aenda kupusana pusana, musapwishi wafwainwa kwingijisha milangwe kuyuka inge kyafwainwa kulomba kimye kyo abena kufunjisha muntu Baibolo pangye nangwa ne.

Kintu kimo kyakila mu kunema ke kumona mpunzha po mubena kufunjishisha. Inge pa mpunzha po mufunjishisha muntu pabengakanako, mwakonsha kulomba lulombelo lwipi lwa kushinkwila ne kupezhako. Nangwa byonkabyo, umvwe ako kulomba kwakonsha kulengela bantu kumona byo mubena kuba nangwa kulengela ye mufunjisha kubula kukasuluka, kyakonsha kuwama kupembelela kimye kyo mukatana mpunzha yawama kufunjilapo. Kechi na mambo a mpunzha ko tubena kufunjishisha ne, twafwainwa kumona umvwe twakonsha kulomba pa lufunjisho lwa Baibolo nangwa ne.—Monai Mwingilo Wetu wa Bufumu wa March 2005, jipa 4.