Kwashai Bakwenu Kutanwa ku Kipwilo
1 “Bakwetu bonse bakinkalankulo ... bakeba kutanwa ku kipwilo twibatambwila na maboko abiji.” Kutatula kimye kyabijikilwe kino mu Zion’s Watch Tower, ya November 1880 Bakamonyi ba kwa Yehoba beta bantu kwiya na kupwila pamo na kumvwa mikambizho ya mu Baibolo. (Lum. 22:17) Kino kyanema bingi mu mpopwelo ya bukine.
2 Kyanema Bingi Kutanwako: Twikala na mapesho inge saka tupwañana pamo na kipwilo. Tumupwiluluka bulongo Yehoba Lesa wetu wakilapo kuwama. Tupwila pamo mu kipwilo ne ‘kufunjishiwa kwi Yehoba.’ (Isa. 54:13) Jibumba janji jatanchika pologalamu wa kimye kyonse wa kufunda Baibolo witulengela kufwenya kwipi ne aye ne kwitukwasha “monse mwasakila Lesa.” (Byu. 20:27; Luka 12:42) Kupwila kwitufunjisha busendwe bwa kufunjisha Byambo bya Lesa. Binembelo bituvululako byo twakonsha kwiyowa bulunda na bakwetu ne aye mwine Yehoba. Kupwañana pamo na bakwetu batemwa Lesa kukosesha lwitabilo lwetu.—Loma 1:11, 12.
3 Betai: Kutatwilatu pa lufunjisho lutanshi, itai ye mufunjisha Baibolo uji yense kwiya na kupwila nenu. Isambaipo nanji kishinka kimo kya lutundaiko kimukoseshe pa kupwila kwafumako ne kumubulapo bimo bikambiwa pa kupwila kukalondelapo. Lumbululai bimweka Nzubo ya Bufumu, ne kumubula mpunzha koiji pa kuba’mba akabule kulubilamo.
4 Umvwe ufunda Baibolo kechi waishileko kimye kitanshi kyo mwamwichile ne, twajijilai na kumwita. Mu mulungu ne mulungu pa maminiti acheche mulumbulwilai bingila jibumba jetu. Ingijishai buloshuwa wa Inte sha kwa Yehova Ni Bani? Finshi Basuminamo? kabiji umvwe muji na vidyo wa Jehovah’s Witnesses—The Organization Behind the Name, mutambishaiye pa kuba’mba etupwiluluke ne kuyuka byotupwila. Byo mubena kuya na kumufwakesha, sendaipo basapwishi bakwenu pa kuba’mba nabo ebayukenga. Mu lulombelo, sanchilai Yehoba pa mambo a jibumba ne kumutongola pa jizhina ubena kufunda Baibolo kuba’mba apwañanenga na jino jibumba.
5 Kange mukankazhame kukwasha bapya baji na lusekelo lwa kukeba kufunda bukine kupwila ne atweba ne. Byo bakakoma mu kusanchila kwabo Yehoba, bakatatula kwingijisha byo bafunda kabiji bakekala mu jibumba ja kwa Lesa jakwatankana.—1 Ko. 14:25.