Lubaji 8—Kufunjishanga Mafunjisho a Baibolo Anunguluka
Kubula Botufunjisha Kwiya mu Jibumba
1. Mambo ka o kyanemena mulungu ne mulungu pa lufunjisho lwa Baibolo kwisambapo kishinka kimo kyaamba pa jibumba ja Yehoba?
1 Nkebelo yetu ya kufunjisha mafunjisho a Baibolo kechi ya kufunjishatu mafunjisho ne, bino ke ya kukwasha ne botufunjisha kwiya mu kipwilo kya bwina Kilishitu. (Zeka. 8:23) Buloshuwa wa Inte sha kwa Yehova—Ni Bani? Finshi Basuminamo? wakonsha kukwashañana bingi. Bashilai kope bo mwatatula kufunjisha Baibolo, kabiji ne kwibatundaika kutangangamo. Kunungapo, mulungu ne mulungu pa lufunjisho, ikalaiko na kimye kya kwisamba nabo kishinka kimo kyaamba pa jibumba ja Yehoba.
2. Twakonsha kutundaika byepi botufunjisha Baibolo kutanwa ku kupwila kwa kipwilo?
2 Kupwila kwa Kipwilo: Jishinda jimo janema bafunda Baibolo jo bamwesheshamo lusanchilo lwa kusanchila jibumba ja Yehoba ke kupichila mu kupwanañena pamo ne atweba pa kupwila kwa kipwilo. (1 Ko. 14:24, 25) Onkao mambo, mwakonsha kwibakwasha kutendeka kuyuka kupwila byo kuji kupichila mu kwibabula kupwila kutanu kubiwa mulungu ne mulungu, pa kimye pa kimye kwibabulapo kupwila kumo. Tongolai mutwe wa jashi ja mvula bantu jikekalako. Bamweshai byambo bikafunjiwa mu Lufunjisho lwa Kyamba kya Usopa kabiji ne Lufunjisho lwa Buku lwa Kipwilo. Lumbululai Sukulu ya Mwingilo wa Teokalasi ne Kupwila kwa Mwingilo. Umvwe muji na jashi mu sukulu, mwakonsha kupitulukamo nabo pamo. Babulai bishinka byanema byafunjiwe pa kupwila. Ingijishai bipikichala biji mu mabuku etu kwibakwasha kufwanyikizha bimweka. Jonka juba jitanshi ja lufunjisho lwa Baibolo, babulai kutanwako ku kipwilo.
3. Ñanyi mbaji ya jibumba yo twakonsha kwisambapo?
3 Inge kya kuba’mba Kivuluko, kupwila kukatampe, kufwakasha kwa mukulumpe wa kijiiji kwafwenya pepi, ikalaiko na kimye kya kwibalumbulwila ne kubaisha mujojo wa luno lunengezho. Pa kimye pa kimye kumbulainga mepuzho nabiji a kuba’mba: Mambo ka o tutelelwa’mba Bakamonyi ba kwa Yehoba? Mambo ka o tutongwela mapunzha po tupwila’mba Mazubo a Bufumu? Mingilo ka Bakulumpe ne Bankwasho mu bipwilo yo baji nayo? Nga mwingilo wa kusapwila ne manyaunda anengezhiwa byepi? Nga mabuku etu anengezhiwa byepi? Kwepi jibumba ko jifumya mali? Ñanyi mitembo ofweshi wa musampi ne Jibumba Jitangijila yo baji nayo mu mwingilo?
4, 5. Mavidyo etu akonsha kulengela byepi botufunjisha kumvwisha kabiji ne kwikala na lusanchilo lukatampe lwa kusanchila jibumba?
4 Mavidyo: Jishinda jikwabo bafunda Baibolo jo bakonsha kuyukilamo jibumba ja Yehoba ke kupichila mu mavidyo etu. Ingijishai mavidyo nabiji: To the Ends of the Earth; Our Whole Association of Brothers; United by Divine Teaching. Mwanamukazhi watanga magazini ne mabuku etu pa myaka itanu wajijile pa kutamba vidyo iji na mutwe wa kuba’mba Jehovah’s Witnesses—The Organization Behind the Name. Waketekejile bingi Bakamonyi bamufwakashilanga, pano byo atambile ino vidyo, wiumvwine kuba’mba wakonsha ne kuketekela jibumba. Batendekele kufumunjisha lufunjisho, kabiji mulungu walondejilepo watainwe ku kupwila pa Nzubo ya Bufumu.
5 Umvwe saka twikalako na kimye mulungu ne mulungu na botufunjisha Baibolo kabiji ne kwingijisha bingijisho byanengezhiwa, mukuya kwa kimye kikakonsha kwitukwasha kubulako botufunjisha Baibolo kwiya mu jibumba jo abena kwingijisha Yehoba lelo jino.